spot_img
Homeຂ່າວທ້ອງຖິ່ນຊີ້ແຈ້ງເຫດການ ທ້າວ ຄຳໄພ ກໍ່ອາລະວາດ ຢູ່ຈຸດກວດກາພະຍາດໂຄວິດ-19 ບ້ານດອນຕະລາດ

ຊີ້ແຈ້ງເຫດການ ທ້າວ ຄຳໄພ ກໍ່ອາລະວາດ ຢູ່ຈຸດກວດກາພະຍາດໂຄວິດ-19 ບ້ານດອນຕະລາດ

Published on

ໃນຕອນບ່າຍ ຂອງວັນທີ 17 ພຶດສະພາ ນີ້, ພັທ ຄຳແດງ ວົງຄຳສອນ ຄະນະຮັບຜິດຊອບຕ້ານພະຍາດໂຄວິດ-19 ເມືອງຈຳປາສັກ ຖະແຫຼງຊີ້ແຈງເຫດການ ທ້າວ ຄຳໄພ ກໍ່ອາລະວາດໂວຍວາຍ ຢູ່ຈຸດກວດກາຕ້ານພະຍາດໂດວິດ-19 ບ້ານດອນຕະລາດ ເມືອງຈຳປາສັກ ໃນວັນທີ 14 ພຶດສະພາ 2021 ເຊິ່ງມີລາຍລະອຽດ ດັ່ງນີ້:

ໃນວັນທີ 14 ພຶດສະພາ 2021 ເວລາ 16:00 ໂມງ ທ້າວ ຄຳໄພ ເອື້ອອາລີ ຫຼື ຕຸ້ຍ ອາຍຸ 37 ປີ ຢູ່ບ້ານທາງຄົບ ເມືອງຈໍາປາສັກ ແຂວງຈຳປາສັກ ຂີ່ລົດຈັກຍີ່ຫໍ້ຢິນຊິງ ສີແດງ ບໍ່ມີປ້າຍທະບຽນ, ພ້ອມຖືພ້າ ຍາວ 1 ດວງ, ບໍ່ໃສ່ຜ້າອັດປາກ-ດັງ ມາອາລະວາດ ຢູ່ຈຸດກວດກາຕ້ານໂຄວິດ-19 ຄຸ້ມແສນສຸກ ບ້ານດອນຕະລາດ ເມືອງຈໍາປາສັກ ເຊິ່ງແມ່ນຈຸດທີ່ຕັ້ງຢູ່ໜ້າໂຮງຮຽນ ມສ ດອນຕະລາດ ໂດຍໄດ້ຂີ່ລົດຈັກຜ່ານເຊືອກກັ້ນທາງຈຸດກວດກາ ໄປປະມານ 10 ແມັດ, ແລ້ວກັບຄືນ ເອົາພ້າມາຟັນໃສ່ໂຕະ ຂອງເຈົ້າໜ້າທີ່ ຈຳນວນ 3 ບາດ.

ຈາກນັ້ນ, ຜູ້ກ່ຽວກໍໄດ້ຂີ່ລົດຈັກ ມຸ້ງໜ້າເມືອບ້ານທາງຄົບ, ຮອດເວລາປະມານ 16:15 ໂມງ ຜູ້ກ່ຽວໄປຮອດຈຸດກວດກາຕ້ານໂຄວິດ-19 ເປັນຈຸດກວດກາວັດແທກອຸນຫະພູມຂອງເມືອງ ແລະ ໄດ້ຂີ່ຜ່າເຊືອກກັ້ນຈຸດກວດກາ ເອົາພ້າຟັນລົດຕົນເອງ ໃຊ້ທ່າທີ່ໂວຍວາຍ ກັບເຈົ້າໜ້າທີ່ ກວດກາຢູ່ຈຸດດັ່ງກ່າວ. ຈາກນັ້ນ, ເຈົ້າໜ້າທີ່ ຈຶ່ງໄດ້ກັກຕົວຜູ້ກ່ຽວມາດຳ ເນີນການສອບສວນ.

ຜ່ານການສອບສວນ ຜູ້ກ່ຽວສາລະພາບວ່າ: ໃນວັນທີ 14 ພຶດສະພາ 2021 ເວລາປະມານ 9:00 ໂມງ  ໄດ້ອອກຈາກເຮືອນ ບ້ານທາງຄົບ ໂດຍຂັບຂີ່ລົດຈັກ ມຸ້ງໜ້າມາບ້ານດອນຕະລາດ, ຜູ້ກ່ຽວໄດ້ໄປຫາໝູ່ ຊື່ ທ້າວ ໄພມະນີ ແລະ ໄດ້ເອົາ ເງິນໃຫ້ ທ້າວ ໄພມະນີ 20.000 ກີບ ເພື່ອໄປຊື້ຢາບ້າ 2 ເມັດ ມາເສບນຳກັນ, ພາຍຫຼັງເສບຢາບ້າແລ້ວ, ຜູ້ກ່ຽວໄດ້ມາຫາ ພໍ່ກູນ ຢູ່ຄຸ້ມໂຄກອີໂຕນ ບ້ານດອນຕະລາດ ເຊິ່ງເປັນຊ່າງຕີພ້າ ພ້ອມທັງຂໍເງິນນຳພໍ່ກູນ 10.000 ກີບ.

ຫຼັງຈາກນັ້ນ, ພໍ່ກຸນ ຈຶ່ງໄດ້ບອກຜູ້ກ່ຽວວ່າ: ຖ້າຢາກໄດ້ເງິນເພີ່ມ ແມ່ນໃຫ້ເອົາພ້າ ໄປສົ່ງໃຫ້ ນາງ ວັນໄຊ ຢູ່ຄຸ້ມໜອງ ດອນຕະລາດ ແຕ່ເມື່ອໄປຮອດ ກໍ່ບໍ່ພົບ ນາງ ວັນໄຊ, ແລ້ວຜູ້ກ່ຽວ ຈຶ່ງໄດ້ຂີ່ລົດມາ ເຮືອນ ພໍ່ບົວລີ ຢູ່ຄຸ້ມໜອງຂີ້ເຫຼັກ ບ້ານດອນຕະລາດ ເຊິ່ງຜູ້ກ່ຽວໄດ້ດື່ມເຫຼົ້າ 1 ແກ້ວ (ແກ້ວM150) ແລະ ອີກ 1 ຈອກ, ແລ້ວຂໍເງິນນໍາ ພໍ່ບົວລີ  20.000 ກີບ.

ຕໍ່ມາ, ຜູ້ກ່ຽວໄດ້ຂີ່ລົດລົງເມືອ ທາງຄຸ້ມໂຄກອີໂດນ ແລ້ວໄດ້ແວ່ໃສ່ນໍ້າມັນ, ພາຍຫຼັງໃສ່ນໍ້າມັນລົດແລ້ວ ເກີດມີນໍ້າມັນຍ້ອຍ ຍ້ອນກະບິວລົດມີບັນຫາ, ຜູ້ກ່ຽວຈຶ່ງໄດ້ຂີ່ລົດ ພ້ອມທັງເອົາພ້າ ຟັນຫົວລົດຈັກ ພ້ອມຮ້ອງໂວຍວາຍໄປນໍາທາງ, ຈົນຮອດຈຸດກວດກາ ຄຸ້ມແສນສຸກ ບ້ານດອນຕະລາດ ໜ້າໂຮງຮຽນ ມສ ດອນຕະລາດ ຜູ້ກ່ຽວໄດ້ຜ່ານຈຸດກວດກາ ໄປປະມານ 10 ແມັດ ໃຊ້ພ້າຟັນລົດຈັກຂອງຜູ້ກ່ຽວ ພ້ອມທັງຮ້ອງໂວຍວາຍ ແລ້ວຂີ່ລົດກັບຄືນມາ, ໃນເວລານັ້ນ ຜູ້ກ່ຽວ ໄດ້ເອົາພ້າ ຟັນໂຕະບ່ອນເຮັດວຽກຂອງເຈົ້າໜ້າທີ່ 3 ບາດ ແລ້ວຜູ້ກ່ຽວ ກໍຂີ່ລົດມຸ້ງໜ້າມາຮອດຈຸດກວດກາວັດແທກອຸນຫະພູມຂອງເມືອງ ຜູ້ກ່ຽວໄດ້ຂີ່ລົດ ຜ່ານຈຸດກວດກາ ພ້ອມເອົາພ້າຟັນຫົວລົດ ຂີ່ກາຍໄປໄດ້ໄລຍະໜຶ່ງ ຜູ້ກ່ຽວກໍຂີ່ກັບຄືນມາຈຸດກວດກາອີກ.

ຈາກນັ້ນ, ເຈົ້າໜ້າທີ່ ຈຶ່ງໄດ້ສະກັດກັ້ນ ຍາດເອົາພ້າ ອອກຈາກມື ແລະ ໃຫ້ຜູ້ກ່ຽວມອດຈັກລົດ ແຕ່ຜູ້ກ່ຽວບໍ່ມອດ ໂດຍໃຫ້ເຫດຜົນວ່າ ມອດບໍ່ໄດ້. ຈາກນັ້ນ, ເຈົ້າໜ້າທີ່ ປກສ ກຸ່ມ ຈຶ່ງດຶງສາຍໄຟຫົວທຽນລົດອອກ ເຮັດໃຫ້ລົດມອດ ແລ້ວໃຊ້ມືຕົບຫົວ 1 ບາດ, ພ້ອມທັງເວົ້າວ່າ: ເປັນຫຍັງຊິມອດບໍ່ໄດ້, ເຊິ່ງພວກກ່ຽວທັງສອງຄົນ ແມ່ນຮູ້ຈັກກັນດີ. ຫຼັງຈາກນັ້ນ, ທ້າວ ຄໍາໄພ ຈຶ່ງໄດ້ໂວຍວາຍຂຶ້ນອີກ ພ້ອມທັງເອົາກຳປັ້ນທຸບລົດຈັກຕົນເອງ, ສະນັ້ນເຈົ້າໜ້າທີ່ ຈຶ່ງໄດ້ສະກັດກັ້ນຄຸມຕົວ ແລະ ກັກຕົວຜູ້ກ່ຽວ.

ຜູ້ກ່ຽວ ຍັງສາລະພາບອີກວ່າ: ໄດ້ເສບຢາເສບຕິດ (ຢາບ້າ) ມານັບແຕ່ປີ 2019 ເປັນຕົ້ນມາ ແລະ ດື່ມເຫຼົ້າ ເປັນປະຈຳ, ຜ່ານການກວດການໍ້າປັດສະວະ ແມ່ນມີສີມ້ວງ. ຕໍ່ກັບການກະທຳຂອງ ທ້າວ ຄຳໄພ ເອື້ອອາລີ ເຈົ້າໜ້າທີ່ພວມສືບຕໍ່ສອບສວນ ປະກອບຂໍ້ມູນ ແລະ ຫຼັກຖານ; ສ່ວນ ປກສ ກຸ່ມ ຈະໄດ້ຄົ້ນຄວ້າ ນຳສະເໜີຂັ້ນເທິງ ເພື່ອພິຈາລະນາ ໃນຂັ້ນຕໍ່ໄປ.

ໃນໂອກາດນີ້, ພັທ ຄຳແດງ ວົງຄຳສອນ ໄດ້ຮຽກ ຮ້ອງມາຍັງທົ່ວສັງຄົມ ຈົ່ງມີສະຕິໃນການບໍລິໂພກຂ່າວ ເພື່ອຫຼີກລ່ຽງການບໍລິໂພກ ຂ່າວທີ່ບໍ່ມີມູນຄວາມຈິງ ທີ່ເປັນການປັ່ນປ່ວນ ເຮັດໃຫ້ສັງຄົມບໍ່ ມີຄວາມສະຫງົບ, ບໍ່ມີຄວາມເປັນລະບຽບຮຽບຮ້ອຍ.

ບົດຄວາມຫຼ້າສຸດ

ມີລາຍຮັບ 94 ລ້ານໂດລາ ໃນປີ 2025 ຂະແໜງການທ່ອງທ່ຽວແຂວງຈໍາປາສັກ ສາມາດສ້າງລາຍຮັບຫຼາຍກວ່າ 94 ລ້ານໂດລາ

ໃນໄລຍະ 1 ປີຜ່ານມາ ຫຼື ປີ 2025 ທີ່ຜ່ານມາ, ແຂວງຈໍາປາສັກມີລາຍຮັບຫຼາຍກວ່າ 94 ລ້ານໂດລາຈາກຂະແໜງທ່ອງທ່ຽວໂດຍມີນັກທ່ອງທ່ຽວເຂົ້າມາທ່ຽວພາຍໃນແຂວງ ທັງໝົດ 728,064 ເທື່ອຄົນ, ໃນນັ້ນ,​...

ເສີມຂະຫຍາຍສາຍພົວພັນ ສອງນາຍົກລັດຖະມົນຕີ ລາວ-ກໍາປູເຈຍ ພົບປະປຶກສາຫາລືເສີມຂະຫຍາຍການພົວພັນຮ່ວມມືສອງຝ່າຍ

ໃນວັນທີ 7 ກຸມພາ 2026 ທີ່ຜ່ານມາ, ທີ່ນະຄອນຫຼວງພະນົມເປັນ ຣາຊະອານາຈັກກໍາປູເຈຍ, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ...

ລາວ-ສະຫະນະຄອນ ເອເມຣັດ ອາຣັບ ເຊັນບົດບັນທຶກ ກ່ຽວກັບການຮ່ວມມືເພື່ອການພັດທະນາໂຄງການສູນກາງດີຈິຕອນ-ປັນຍາປະດິດອາຊຽນ ແລະ ຄວາມປອດໄພທາງໄຊເບີ-ລະບົບນິເວດການເງິນດີຈິຕອນ

ພິທີເຊັນບົດບັນທຶກຄວາມເຂົ້າໃຈ ລະຫວ່າງ ລັດຖະບານ ແຫ່ງ ສປປ ລາວ ແລະ ພາກທຸລະກິດຊັ້ນນໍາ ຂອງ ສະຫະນະຄອນ ເອເມຣັດ ອາຣັບ ວັນທີ 3...

ມອບທຶນຊ່ວຍເຫຼືອ 900 ລ້ານເຢນ ລັດຖະບານຍີ່ປຸ່ນມອບທຶນຊ່ວຍເຫຼືອ ໂດຍການສະໜອງລົດເມໄຟຟ້າ ເພື່ອສົ່ງເສີມການທ່ອງທ່ຽວຢູ່ແຂວງຫຼວງພະບາງ

ໃນຕອນບ່າຍວັນທີ 6 ກຸມພານີ້ ທີ່ກະຊວງການຕ່າງປະເທດ ໄດ້ມີພິທີລົງນາມເອກະສານແລກປ່ຽນ ສໍາລັບໂຄງການຊ່ວຍເຫຼືອຈາກລັດຖະບານຍີ່ປຸ່ນໃນໂຄງການພັດທະນາເສດຖະກິດ ແລະ ສັງຄົມ ເພື່ອສະໜອງອຸປະກອນການຂົນສົ່ງສາທາລະນະ (The Economic and Social Deve...