ຊາວມຽນມາຮຽກຮ້ອງນານາຊາດໃຫ້ຊ່ວຍເຫຼືອປະເທດຂອງຕົນ ພ້ອມທັງຊ່ວຍປົກປ້ອງ ນາງງາມມຽນມາ ນາງ ທູຊາ ວິນ ລວິນ “Thuzar Wint Lwin” ເພາະນາງໄດ້ຖືກອອກໝາຍຈັບຈາກລັດຖະບານມຽນມາ ຫຼັງຈາກທີ່ໄດ້ຊູປ້າຍທີ່ມີຂໍ້ຄວາມວ່າ “Pray for Myanmar”.
ນາງ ທູຊາ ວິນ ລວິນ ໄດ້ໃຫ້ສຳພາດກັບທາງ ນິວຢອກທາມ ວ່າ ກ່ອນໜ້າທີ່ນາງຈະເດີນທາງມາທີ່ອາເມລິການັ້ນ ນາງຕ້ອງໄດ້ກວດເບິ່ງວ່າຕົວເອງມີຢູ່ໃນລາຍຊື່ທະຫານທີ່ຕ້ອງການຕົວ ຫຼື ບໍ່ ເພາະນາງເຫັນລາຍງານຂອງບຸກຄົນທີ່ມີຊື່ສຽງຖືກຄວບຄຸມຕົວໃນຂະນະທີ່ພວກເຂົາພະຍາຍາມເດີນທາງອອກນອກປະເທດ.
ຫຼັງຈາກເກີດການລັດຖະປະຫານໃນມຽນມາຂຶ້ນ ນາງ ທູຊາ ວິນ ລວິນ ໄດ້ເຂົ້າຮ່ວມເດີນຂະບວນກັບປະຊາຊົນມຽນມາຫຼາຍຄັ້ງ ນາງກ່າວວ່າການໂຈມຕີຂອງທະຫານເຮັດໃຫ້ປະເທດຕ້ອງຕົກຢູ່ໃນຄວາມຢ້ານກົວ “ທະຫານລາດຕະເວນໃນເມືອງທຸກມື້ ແລະ ບາງຄັ້ງພວກເຂົາກໍ່ຕັ້ງເຄື່ອງກີດຂວາງເພື່ອຂັດຂວາງຄົນທີ່ຜ່ານໄປມາ ໃນບາງຄັ້ງພວກເຂົາກໍ່ຍິງຄົນໂດຍບໍ່ລັງເລ ພວກເຮົາຢ້ານທະຫານຂອງເຮົາເອງ ເວລາພວກເຮົາພົບທະຫານ ພວກເຮົາເຮັດໄດ້ພຽງຮູ້ສຶກຄຽດ ແລະ ຮູ້ສຶກຢ້ານ”.
ແນວໃດກໍ່ຕາມ ມີຂໍ້ມູນເປີດເຜີຍວ່າຫຼັງຈາກຈົບການປະກວດແລ້ວ ນາງຈະເດີນທາງໄປທີ່ນິວຢອກ ເພື່ອໄປຫາ ບິວຕີ້ ເພື່ອນຊາວມຽນມາທີ່ເປັນນາງແບບໃນສັງກັດແຫ່ງໜຶ່ງ ແລະ ຈະເຮັດວຽກຮ່ວມກັນໃນງານ ນິວຢອກແຟຊັ່ນວີກ ທີ່ກຳລັງຈະເກີດຂຶ້ນ ຈົນກວ່າສະພາບການໃນປະເທດຈະດີຂຶ້ນ.
ກ່ອນໜ້ານີ້, ນາງ ຮານ ເລ ຜູ້ເຂົ້າປະກວດມີສແກຣນມຽນມາ ທີ່ເດີນທາງເຂົ້າມາປະກວດໃນປະເທດໄທ ກໍ່ໄດ້ສະແດງອອກ ແລະ ເວົ້າເຖິງສະພາບການໃນມຽນມາເຮັດໃຫ້ນາງຖືກອອກໝາຍຈັບ ແລະ ບໍ່ສາມາດກັບເຂົ້າໄປເທດບານເກີດໄດ້ ເນື່ອງຈາກມີຄວາມກັງວົນເລື່ອງຄວາມປອດໄພຂອງຕົນເອງ.
ນາງງາມມຽນມາ ນາງ ທູຊາ ວິນ ລວິນ “Thuzar Wint Lwin” ໄດ້ປະກົດຕົວເທິງເວທີ Miss Universe 2020 ເຖິງຈະຜ່ານເຂົ້າຮອບພຽງ 21 ຄົນສຸດທ້າຍ ແລະ ໄດ້ຮັບລາງວັນຊະນະເລີດຊຸດປະຈຳດີເດັ່ນ. ເຖິງແມ່ນວ່າຊຸດປະຈຳຊາດໂຕຈິງຈະຫາຍໄປພ້ອມກັບການເດີນທາງ ແຕ່ຊຸດທີ່ນາງສວມໃສ່ຂຶ້ນປະກວດເທິງເວທີກໍ່ເປັນຊຸດທີ່ຊົງອິດທິພົນບໍ່ໜ້ອຍ ເນື່ອງຈາກເປັນຊຸດທີ່ ທ່ານ ນາງ ອອງຊານ ຊູຈີ ເຄີຍສວມໃສ່ ແລະ ເທິງເວທີນາງໄດ້ສົ່ງສຽງໃຫ້ຄົນທົ່ວໂລກຮັບຮູ້ດ້ວຍການຍົກປ້າຍ “Pray for Myanmar”.
ຮຽບຮຽງຂ່າວ: ພຸດສະດີ