ຊາວບ້ານເຂດເທິງເກາະໂຊໂລມອນ (Solomon Island) ເຊິ່ງຕັ້ງຢູ່ພາກໃຕ້ຂອງປາຊີຟິກ, ຕົກໃຈ ຫຼັງຈາກເຂົ້າໄປລ່າສັດໃນປ່າ ແຕ່ພັດເຫັນ “ກົບຍັກ” ທີ່ມີຂະໜາດ ຊໍ້າແອນ້ອຍ ແລະ ມີນໍ້າໜັກ ເກືອບ 1 ກິໂລ.

ເມື່ອວັນທີ 10 ພຶດສະພາ ທີ່ຜ່ານມານີ້, ເວັບໄຊທ໌ຂ່າວ Daily Mail ໄດ້ລາຍງານວ່າ: ທ້າວ ຈີມມີ້ ຮູໂກ (Jimmy Hugo), ອາຍຸ 35 ປີ, ເຈົ້າຂອງໂຮງໄມ້ ທີ່ເມືອງ ໂຮໄນຣ່າ (Honira) ຢູ່ເກາະໂຊໂລມອນ (solomon) ບັງເອີນເຫັນກົບຍັກໂຕໜຶ່ງ ຕອນທີ່ກຳລັງລ່າໝູປ່າໃນປ່າ ລາວເລີຍໄດ້ເອົາກົບເມື່ອເຮືອນນຳ ແຕ່ມັນແມ່ນຕາຍກ່ອນໜ້ານີ້ແລ້ວ ແລະ ເມື່ອລາວເອົາມັນມາໃຫ້ລູກຊາຍອຸ້ມ, ພົບວ່າມັນມີຄວາມຍາວຊໍາເຄິ່ງໂຕ ຂອງລູກລາວ.

ກົບຍັກໂຕນີ້ ເປັນກົບສາຍພັນ ຄໍນູເຟີ້ ກັບປີ້ (Cornufer guppyi) ເຊິ່ງເປັນສາຍພັນທ້ອງຖິ່ນ ທ້າວ ຈີມມີ້ ກ່າວວ່າ: ລາວຮູ້ຈັກກົບຊະນິດນີ້ ແຕ່ບໍ່ເຄີຍເຫັນໂຕໃຫຍ່ຊໍານີ້ມາກ່ອນ ແລະ ຄົນແຖວນີ້ ເອີ້ນ ກົບສາຍພັນນີ້ວ່າ ໄກ່ປ່າ ແລະ ມັກກິນກົບຊະນິດນີ້ຫຼາຍກວ່າໄກ່ອີກ ແຕ່ມັນເປັນກົບທີ່ຫາຍາກ.

ທ້າວ ຈີມມີ້ ໄດ້ກ່າວອີກວ່າ: ຫຼັງຈາກຈັບມັນຖ່າຍຮູບແລ້ວ, ລາວກໍເອົາມັນມາເຮັດອາຫານ ແລະ ລາວຫວັງວ່າ: ເທື່ອໜ້າ ລາວຢາກເຈີກົບ ຕອນຍັງບໍ່ທັນຕາຍ ເພື່ອຈະນຳເອົາມັນມາລ້ຽງໄວ້.