ໃນວັນທີ 11 ພຶດສະພາ 2021 ທີ່ຜ່ານມາ ສໍານັກຂ່າວຕ່າງປະເທດໄດ້ລາຍງານວ່າ: ມີນັກຂ່າວ 3 ຄົນ ແລະ ນັກເຄື່ອນໄຫວ 2 ຄົນຈາກມຽນມາ ຖືກຈັບກຸມທີ່ປະເທດໄທໂດຍການລັກລອບເຂົ້າປະເທດແບບຜິດກົດໝາຍ.
ສໍານັກຂ່າວ DVC (Democratic Voice of Burma) ຂອງມຽນມາໄດ້ອອກຖະແຫຼງການວ່າ: ທັງ 5 ຄົນທີ່ລັກລອບເຂົ້າປະເທດໄທນັ້ນແມ່ນເພື່ອລົບໜີອອກຈາກຊາຍແດນມຽນມາເຂົ້າມາປະເທດໄທເພື່ອຫຼົບໜີຈາກການປາບປາມຜູ້ຕໍ່ຕ້ານລັດຖະປະຫານຂອງລັດຖະບານມຽນມາ ກ່ອນທີ່ຈະຖືກເຈົ້າໜ້າທີ່ໄທຈັບກຸມໃນວັນອາທິດ ທີ 9 ທີ່ຜ່ານມາ ຢູ່ແຂວງຊຽງໃໝ່ ພາກເໜືອຂອງປະເທດໄທ ແລະ ຖືກຕັ້ງຂໍ້ຫາເຂົ້າປະເທດແບບຜິດກົດໝາຍ.
ທາງສໍານັກຂ່າວ DVC ໄດ້ຂໍຮ້ອງໃຫ້ທາງເຈົ້າໜ້າທີ່ໄທບໍ່ໃຫ້ສົ່ງພວກເຂົາທັງ 5 ຄົນກັບປະເທດມຽນມາ ເພາະຈະເຮັດໃຫ້ຊີວິດຂອງພວກເຂົາຕົກຢູ່ໃນອັນຕະລາຍ ແລະ ສໍານັກຂ່າວ DVC ຍັງໄດ້ຂຽນຈົດໝາຍໄປຍັງສໍານັກງານຜູ້ລີ້ໄພຂອງອົງການສະຫະປະຊາຊາດໃຫ້ເຂົ້າມາຮັກສາຄວາມປອດໄພ ແລະ ຂໍໃຫ້ປະຊາຄົມໂລກຊ່ວຍກັນຮຽກຮ້ອງບໍ່ໃຫ້ລັດຖະບານໄທສົ່ງໂຕພວກເຂົາທັງ 5 ຄົນກັບປະເທດມຽນມາ. ສໍາລັບສໍານັກຂ່າວ DVC ເອງກໍຖືກລັດຖະບານມຽນມາຍົກເລີກໃບອະນຸຍາດການການເຮັດຂ່າວ ແລະ ຖືກບໍ່ໃຫ້ເຮັດຂ່າວອີກຕໍ່ໄປ.
ຈາກການລາຍງານທາງເຈົ້າໜ້າທີ່ຂອງໄທບອກວ່າຈະດໍາເນີນຕາມກົດໝາຍ ແຕ່ເນື່ອງຈາກສະພາບການລະບາດຂອງພະຍາດໂຄວິດ-19 ຈຶ່ງຈໍາເປັນຕ້ອງໄດ້ກັກໂຕທັງ 5 ຄົນເປັນຈໍານວນ 14 ມື້ກ່ອນທີ່ຈະສົ່ງທັງ 5 ຄົນໃຫ້ກັບເຈົ້າທີ່ທີ່ກວດສອບຄົນເຂົ້າເມືອງໃນຂັ້ນຕໍ່ໄປ.