ສໍານັກຂ່າວຈາກ CNN ຂອງສະຫະລັດອາເມລິກາໄດ້ເປີດເຜີຍວ່າ: ມີກຸ່ມຂອງແພດໝໍ, ນັກສຶກສາ ແລະ ນັກວິສະວະກອນຈໍານວນໜຶ່ງຈາກມຽນມາຫຼົບໜີເຂົ້າປ່າເພື່ອເຂົ້າຮ່ວມການຝຶກຝົນຈາກກອງກໍາລັງຂອງກຸ່ມຊາດພັນເຊັ່ນ: ອົງກອນປ້ອງກັນຕົນເອງແຫ່ງຊາດກະຫຼ່ຽງ ແລະ ກອງທັບອິດສະຫຼະພາບກະຊີ່ນ ເພື່ອປ້ອງກັນຕົນເອງຈາກທະຫານມຽນມາ. ອົງການສະຫະປະຊາຊາດບອກວ່າກຸ່ມຂອງທະຫານຍັງໄລ່ຍິງຜູ້ປະທ້ວງຕາມຫົນທາງ ແລະ ໄລ່ຈັບກຸມປະຊາຊົນທີ່ຕໍ່ຕ້ານການເຮັດລັດຖະປະຫານຕາມເຮືອນຕ່າງໆໃນຍາມກາງຄືນ.
ພົນຕີ ເນີດາ ໂບມະຍາ ຫົວໜ້າສະມາຊິກອົງກອນປ້ອງກັນຕົນເອງແຫ່ງຊາດກະຫຼ່ຽງໄດ້ເປີດເຜີຍກັບທາງສໍານັກຂ່າວ CNN ວ່າ: “ກຸ່ມຂອງຕົນເອງມີໜ້າທີ່ປ້ອງກັນຊີວິດຄົນ ແລະ ຖ້າຫາກພວກຕົນເອງບໍ່ຊ່ວຍຝຶກຝົນໃຫ້ກັບແພດ ແລະ ນັກສຶກສາກຸ່ມນີ້ ແລ້ວໃຜຈະມາຊ່ວຍເຫຼືອພວກເຂົາ” ເຊິ່ງກຸ່ມຜູ້ປະທ້ວງປະມານ 200 ຄົນທີ່ມາເຂົ້າຮ່ວມກັບອົງກອນບໍ່ເຄີຍຈັບປືນມາກ່ອນໃນຕອນທີ່ຮຽນຢູ່ ບາງຄົນກໍອາຍຸຍັງນ້ອຍ, ບາງຄົນກໍເປັນໝໍ ເປັນພະຍາບານ ຫຼື ບຸກຄະລາກອນທາງການແພດ.
