ກາຍເປັນຂ່າວເສົ້າຂອງວົງການບັນເທີງໄທ ເມື່ອຕະຫຼົກຊື່ດັງ “ນ້າຄ້ອມ” ໄດ້ຈາກໄປຢ່າງສະຫງົບ ເມື່ອເວລາ 7:30ນາທີ ຂອງເຊົ້າວັນທີ 30 ເມສາ 2021 ເນື່ອງຈາກມີພາວະໂຄມ່າ ເຮັດໃຫ້ອະໄວຍະວະຫຼາຍສ່ວນຫຼົ້ມເຫຼວ ລວມເຖິງການທຳງານຂອງຮ່າງກາຍ ໂດຍສະເພາະຊີບພະຈອນກັບຄວາມດັນ ຮ່າງກາຍບໍ່ຕອບສະໜອງຕໍ່ຢາ.
ນ້າຄອມ ໄດ້ປ່ວຍຕິດເຊື້ອໂຄວິດ-19 ກ່ອນທີ່ເຊື້ອຈະລາມລົງປອດ, ອາການປອດອັກເສບ, ໝາກໄຂ່ຫຼັງບໍ່ທຳງານ ຈົນຕ້ອງໃຊ້ເຄື່ອງຊ່ວຍຫາຍໃຈ, ໄດ້ຟອກໝາກໄຂ່ຫຼັງ ກ່ອນຈະຍ້າຍຈາກໂຮງໝໍວິພາຣາມ ໄປຮັກສາຕົວທີ່ໂຮງໝໍ ຣາມາທິບໍດີຈັກກຣີນະຣຶບໍດິນ.
ຫຼ້າສຸດ, ເມື່ອຕອນເຊົ້າວັນທີ 30 ເມສາ 2021 ລູກສາວຂອງນ້າຄ້ອມ ໄດ້ໂພສຂໍ້ຄວາມຜ່ານທາງເຟສບຸ໊ກ ນ້າຄ້ອມ ຊວນຊື່ນ ວ່າ “ພໍ່ຫຼັບສະບາຍແລ້ວ”.
ທັງນີ້, ໄດ້ມີແຟນຄລັບສະແດງຄວາມເສຍໃຈຕໍ່ການຈາກໄປຂອງນ້າຄ້ອມເປັນຈຳນວນຫຼາຍ ໃນຂະນະທີ່ທະວິດເຕີໄດ້ຕິດແຮັສແທັກ ນ້າຄ້ອມ ຈົນຕິດເທຣນອັນດັບ 1 ໂດຍມີຊາວເນັດຈຳນວນຫຼາຍຮ່ວມສະແດງຄວາມອາໄລຕໍ່ການຈາກໄປຂອງນ້າຄ້ອມ.
ກະຊວງສາທາລະນະສຸກໄທ ໄດ້ລາຍງານສະພາບການລະບາດຂອງໂຄວິດ-19 ປະຈຳວັນເບື້ອງຕົ້ນໃນວັນທີ 30 ເມສາ ພົບຜູ້ຕິດເຊື້ອກໍລະນີໃໝ່ 1,583 ຄົນ ແລະ ມີຜູ້ເສຍຊີວິດ 15 ຄົນ.