ອີງຕາມການລາຍງານຂ່າວ ວິທະຍຸກະຈາຍສຽງແຫ່ງຊາດ ໃຫ້ຮູ້ວ່າ ໃນວັນທີ 21 ເມສາ 2021 ທ່ານ ພູວົງ ວົງຄໍາຊາວ ຮອງເຈົ້າຄອງນະຄອນຫຼວງວຽງຈັນ ຫົວໜ້າຄະນະສະເພາະກິດໂຄວິດ-19 ພ້ອມຄະນະ ໄດ້ລົງເຄື່ອນໄຫວກວດກາສະຖານທີ່ກະກຽມໃຫ້ແກ່ການກວດຄັດກອງ ເກັບຕົວຢ່າງຜູ້ສໍາຜັດໃກ້ຊິດກັບຜູ້ຕິດເຊື້ອເບີ 59 ແລະ 60.
ສໍາລັບສະຖານທີ່ກຳນົດໃຫ້ບໍລິການ ມີຈຸດເມືອງຈັນທະບູລີ ກຳນົດເອົາສະໂມສອນສະໜາມກິລາເຈົ້າອານຸວົງ ເຂົ້າເບື້ອງຕະຫຼາດວັງທອງ (ຮ້ານອາຫານລາວເດີມ) ເມືອງໄຊເສດຖາ ກຳນົດເອົາຈຸດໂຮງຮຽນມັດທະຍົມ ມິດຕະພາບ ລາວ-ຫວຽດ ເມືອງສີສັດຕະນາກກໍານົດຢູ່ຈຸດສະໂມສອນກິລາຮົ່ມບຶງຂະຫຍອງ ເມືອງສີໂຄດຕະບອງ ກຳນົດເອົາໂຮງຮຽນ ມສ ມິດຕະພາບໂຮ່ຈີມິງ (ມສ ສີໂຄດ) ນອກນີ້ ຍັງກຳນົດເອົາໂຮງໝໍມິດຕະພາບ ແລະ ໂຮງໝໍເຊດຖາທິຣາດ.
ຮຽບຮຽງຂ່າວ: ພຸດສະດີ