ເມື່ອວັນທີ 15 ເມສາ 2021 ສໍານັກຂ່າວຕ່າງປະເທດລາຍງານວ່າ: ກອງກໍາລັງຄວາມໝັ້ນຄົງຂອງມຽນມາໄດ້ໃຊ້ປືນຍິງໃສ່ຜູ້ປະທ້ວງທີ່ເປັນບຸກຄະລາກອນທາງການແພດຈົນມີຜູ້ໄດ້ຮັບບາດເຈັບ ແລະ ເສຍຊີວິດໃນເມືອງມັນທະເລ.

ໃນການປະທ້ວງໃນຄັ້ງນີ້ມີບຸກຄະລາກອນທາງການແພດຈໍານວນໜຶ່ງໄດ້ມີການປະທ້ວງຕໍ່ຕ້ານການເຮັດລັດຖະປະຫານ ແຕ່ເຖິງຢ່າງໃດກໍຕາມກອງກໍາລັງຄວາມໝັ້ນຄົງຂອງມຽນມາໄດ້ໃຊ້ອາວຸດປືນຍິງໄປທີ່ກຸ່ມຜູ້ປະທ້ວງເພື່ອບໍ່ໃຫ້ມີການຊຸມນຸມ ລວມທັງມີການຈັບໂຕຜູ້ປະທ້ວງ ແລະ ບຸກຄະລາກອນທາງການແພດເຊັ່ນກັນ.

ເຖິງແມ່ນວ່າໃນຂະນະນີ້ມຽນມາຈະຢູ່ໃນຊ່ວງວັນພັກປີໃໝ່ ຫຼື ເອີ້ນວ່າ “ຕະຈານ” ເຊິ່ງເລີ່ມນັບຕັ້ງແຕ່ວັນອັງຄານທີ່ຜ່ານມາ ແຕ່ກຸ່ມຜູ້ປະທ້ວງຝ່າຍປະຊາທິປະໄຕໃນມຽນມາຈໍານວນຫຼາຍໄດ້ຍົກເລີກການສະເຫຼີມສະຫຼອງ ແລະ ມຸ່ງນັ້ນໄປທີ່ການຕໍ່ຕ້ານການລັດຖະປະຫານຂອງກອງທັບມຽນມາ.

ກຸ່ມນັກເຄື່ອນໄຫວ ສະມາຄົມຊ່ວຍເຫຼືອນັກໂທດການເມືອງ ໄດ້ເປີດເຜີຍວ່າໃນຂະນະນີ້ກອງກໍາລັງຄວາມໝັ້ນຄົງຂອງມຽນມາໄດ້ສັງຫານຜູ້ປະທ້ວງໄປຫຼາຍກວ່າ 715 ຄົນ ນັບຕັ້ງແຕ່ທີ່ມີການລັດຖະປະຫານໃນມຽນມາ.