ອຸບັດເຫດເຮືອນັກທ່ອງທ່ຽວຫຼົ້ມຢູ່ອ່າງນໍ້າງື່ມເຂດແດນສະຫວັນ ແຂວງວຽງຈັນ ໃນຕອນເຊົ້າວັນທີ 4 ເມສາ 2021, ເກີດຂຶ້ນໃນເວລາປະມານ 9:00 ໂມງ, ຍ້ອນສະພາບອາກາດມືດຄື້ມ ມີລົມພັດແຮງມາກະທັນຫັນ ເຮັດໃຫ້ເຮືອລໍາດັ່ງກ່າວຈົມຫ່າງຈາກຝັ່ງປະມານ 40 ແມັດ.
ອີງຕາມການລາຍງານຂ່າວຈາກ ວິທະຍຸກະຈາຍສຽງແຫ່ງຊາດ ໃຫ້ຮູ້ວ່າ ອຸບັດເຫດທາງເຮືອຢູ່ເຂດທ່ອງທ່ຽວອ່າງນໍ້າງື່ມ ແດນສະຫວັນ ແຂວງວຽງຈັນ ເປັນເຫດບັງເອີນ ຍ້ອນມີພາຍຸ ແລະ ລົມມາແຮງກະທັນຫັນຈົນເຮັດໃຫ້ເຮືອລໍາດັ່ງກ່າວຫຼົ້ມ, ທ່ານ ອະດີດປະທານປະເທດ ຈູມມາລີ ໄຊຍະສອນ ຢູ່ໃນເຮືອລໍາດັ່ງກ່າວໄດ້ຮັບການຊ່ວຍເຫຼືອຢ່າງປອດໄພພ້ອມດ້ວຍຜູ້ໂດຍສານ 30 ຄົນ ລວມເປັນ 31 ຄົນ ເຊິ່ງທັງໝົດພວມໄດ້ຮັບການປິ່ນປົວເປັນຢ່າງດີທີ່ໂຮງໝໍໃນນະຄອນຫຼວງວຽງຈັນ.
ທ່ານ ຄຳພັນ ສິດທິດຳພາ ເຈົ້າແຂວງວຽງຈັນ ກ່າວວ່າ: ເຫດການຄັ້ງນີິ້ເກີດຂຶ້ນຍ້ອນມີລົມແຮງກະທັນຫັນ, ອະດີດປະທານປະເທດ ໄດ້ຮັບການຊ່ວຍເຫລືອປອດໄພ. ເຮືອນີ້ມີຜູ້ໂດຍສານ 39 ຄົນ, ພາຍຫລັງເກີດເຫດການ, ທາງອົງການຈັດຕັ້ງທີ່ກ່ຽວຂ້ອງທັງສູນກາງ ແລະ ທ້ອງຖິ່ນ ໄດ້ພ້ອມກັນສຸມໃສ່ ນໍາເອົາໜ່ວຍກູ້ໄພເຂົ້າກອບກູ້ຢ່າງກະທັນຫັນ, ກອບກູ້ຜູ້ທີ່ລອດຊີວິດໄດ້ທັງໝົດ 31 ຄົນ ນໍາສົ່ງໄປປິ່ນປົວຢູ່ໂຮງໝໍນະຄອນຫລວງວຽງຈັນ. ສ່ວນຜູ້ເສຍຊີວິດ 8 ຄົນ, (ຍິງ 05 ຄົນ), ເຊີ່ງຄອບຄົວໄຊຍະສອນ ໄດ້ສູນເສຍ ແມ່ ແກ້ວສາຍໃຈ ໄຊຍະສອນ, ລູກຊາຍ ວີດົງ ໄຊຍະສອນ ພ້ອມດ້ວຍລູກຫຼານໆ ແລະ ຜູ້ໃກ້ສິດໃນຄັ້ງນີ້ດ້ວຍ.” ສົບໄດ້ບໍາເພັນກຸສົນຢູ່ທີ່ສະໂມສອນໃຫຍ່ກະຊວງການປ້ອງກັນປະເທດ.
ຮຽບຮຽງຂ່າວ: ພຸດສະດີ