ແຫຼ່ງຂ່າວ Khaosod ຂອງໄທ ໄດ້ລາຍງານວ່າ: ມີເຄື່ອງບິນຂັບໄລ່ຈໍານວນ 2 ລໍາໄດ້ຖິ້ມລະເບີດໃສ່ບ້ານເຮືອນຂອງຊາວຊົນເຜົ່າກະຫຼ່ຽງໃນຕອນກາງຄືນຂອງວັນອາທິດຈົນເຖິງເວລາ 2 ໂມງເຊົ້າຂອງວັນຈັນ ທີ 29 ມີນາ 2021 ທີ່ຜ່ານມາ ເຮັດໃຫ້ມີຜູ້ເສຍຊີວິດ 3 ຄົນ ແລະ ບາດເຈັບຢ່າງຕໍ່າ 7 ຄົນ.

ກອງທັບມຽນມາໄດ້ໃຊ້ເຄື່ອງບິນຂັບໄລ່ຈໍານວນ 2 ລໍາເປັນການໂຈມຕີຕໍ່ຕ້ານກອງທັບປົດປ່ອຍແຫ່ງຊາດຊົນເຜົ່າກະຫຼ່ຽງ (Karen National Liberation Army) ແລະ ສູນລັດຖະການສະຫະພາບແຫ່ງຊາດຊົນເຜົ່າກະຫຼ່ຽງ (Karen National Union – KNU) ທີ່ຕັ້ງຢູ່ບ້ານ ເດໂປໂນ ແຂວງ ຜາປູນ ເຮັດໃຫ້ຊາວຊົນເຜົ່າກະຫຼ່ຽງຢ່າງໜ້ອຍ 1,000 ກວ່າຄົນຕ້ອງໄດ້ໜີອອກຈາກທີ່ຢູ່ອາໄສ ເຊິ່ງຄາດວ່າຊາວຊົນເຜົ່າບາງສ່ວນຈະພະຍາຍາມໜີເຂົ້າໄປຍັງປະເທດໄທ.

ສະຖານະການໃນມຽນມາຕອນນີ້ຍັງຢູ່ໃນຂັ້ນຮຸນແຮງ ເນື່ອງມາຈາກການເຮັດລັດຖະປະຫານຂອງນາຍພົນ ມິນ ອ່ອງ ຫຼາຍ ແລະ ການໂຈມຕີທາງອາກາດທີ່ເກີດຂື້ນໃນຄັ້ງນີ້ ຖືໄດ້ວ່າເປັນການຍົກລະດັບການປາບປາມ ແລະ ສ້າງຄວາມຮຸນແຮງຂື້ນອີກຂອງກອງທັບມຽນມາ. ສະຫະພາບແຫ່ງຊາດຊົນເຜົ່າກະຫຼ່ຽງເປັນອົງກອນຕິດອາວຸດທີ່ເກົ່າແກ່ທີ່ສຸດຂອງມຽນມາ ໂດຍໃນວັນຈັນທີ່ຜ່ານມາ ສູນລັດຖະການສະຫະພາບແຫ່ງຊາດຊົນເຜົ່າກະຫຼ່ຽງ ໄດ້ຍື່ນຂໍ້ຮຽກຮ້ອງໃຫ້ກອງທັບມຽນມາຢຸດຂ້າປະຊາຊົນ ແລະ ປ່ອຍໂຕຄົນທີ່ຕິດຄຸກທາງການເມືອງທັງໝົດ.