ແບຣນເສື້ອຜ້າຂອງປະເທດໃນຕາເວັນຕົກຫຼາຍຍີ່ຫໍ້ຖືກປະເທດຈີນ, ຄົນມີຊື່ສຽງຂອງຈີນຍົກເລີກສັນຍາ ຫຼັງຖືກຫາວ່າຈີນບັງຄັບຊາວອຸຍກູເກັບຝ້າຍທີ່ລະເມີດສິດທິມະນຸດຊົນຢ່າງຮ້າຍແຮງ
ໃນວັນທີ 25 ມີນາ 2021 ທີ່ຜ່ານມາ ສໍານັກຂ່າວຕ່າງປະເທດໄດ້ລາຍງານວ່າ ບໍລິສັດຄ້າສົ່ງແຫ່ງໃຫຍ່ຂອງປະເທດໃນຕາເວັນຕົກຫຼາຍຍີ່ຫໍ້ທັງ H&M, Nike ແລະ Adidas ກໍາລັງຖືກປະເທດຈີນຍົກເລີກສັນຍາ ຫຼັງຈາກທີ່ປະເທດໃນຕາເວັນຕົກອອກມາສະແດງຄວາມກັງວົນກ່ຽວກັບອຸດສາຫະກໍາຝ້າຍໃນເຂດປົກຄອງພິເສດຊິນຈຽງວ່າມີການບັງຄັບໃຊ້ແຮງງານຊາວອຸຍກູໃນການເກັບຝ້າຍ ແລະ ພ້ອມຢືນຢັນວ່າພວກເຂົາບໍ່ໄດ້ໃຊ້ຝ້າຍຈາກຊິນຈຽງ.
ຂ່າວດັ່ງກ່າວໄດ້ຖືກເຜີຍແຜ່ຕັ້ງແຕ່ປີກ່ອນ ແຕ່ກາຍມາເປັນປະເດັນອີກຄັ້ງໃນອາທິດທີ່ຜ່ານມາຫຼັງຈາກປະເທດໃນຕາວັນຕົກລວມທັງສະຫະລັດອາເມລິກາ ແລະ ສະຫະພາບເອີຣົບລົງມະຕິຄວໍ້າບາດເຈົ້າໜ້າທີ່ຈີນ ໂດຍກ່າວຫາວ່າລະເມີດສິດທິມະນຸດຊົນຕໍ່ຊາວມຸດສະລິມອຸຍກູໃນຊີນຈຽງຢ່າງຮ້າຍແຮງ ແຕ່ປະເທດຈີນເອງກໍປະຕິເສດຕໍ່ກັບຄໍາກ່າວຫາດັ່ງກ່າວ.
ເຊິ່ງກະແສນີ້ເກີດຂື້ນໂດຍການເຜີຍແຜ່ຜ່ານທາງສື່ສັງຄົມອອນລາຍເວີຍປໍຂອງກຸ່ມ “ສັນນິບາດເຍົາວະຊົນກອມມູນິດ” ຂອງພັກກອມມູນິດຈີນເມື່ອວັນພຸດທີ່ຜ່ານມາ. ຫຼັງຈາກນັ້ນສໍານັກຂ່າວຕ່າງໆຂອງຈີນກໍອອກແຄມເປນຕ່າງໆເພື່ອປົກປ້ອງອຸດສາຫະກໍາຝ້າຍໃນຊິນຈຽງ ແລະ ກ່າວປະນາມຍີ່ຫໍ້ເສື້ອຜ້າຂອງປະເທດຕາເວັນຕົກ
ຈົນເຖິງຕອນນີ້ມີແພດຟອມຮ້ານຄ້າຂະໜາດໃຫຍ່ຂອງຈີນຢ່າງໜ້ອຍ 3 ບໍລິສັດທີ່ເອົາສິນຄ້າຂອງ H&M ອອກຈາກເວັບໄຊ້ໄດ້ແກ່: Pinduoduo, JD.com ແລະ Tmall, ນອກຈາກນີ້ຍັງມີດາລານັກສະແດງຢ່າງໜ້ອຍ 30 ຄົນປະກາດຍົກເລີກສັນຍາກັບແບຣນເສື່ອຜ້າຂອງປະເທດໃນຕາເວັນຕົກ.