ສຳນັກຂ່າວ ວຽງຈັນທາມ ລາຍງານວ່າ: ນັກທ່ອງທ່ຽວ ແລະ ຮ້ານອາຫານທ້ອງຖິ່ນກຳລັງສ້າງຄວາມເສຍຫາຍຕໍ່ສະພາບແວດລ້ອມອ້ອມຂ້າງນໍ້າຊອງໃນເມືອງວັງວຽງ ແຂວງວຽງຈັນ, ພາຍຫຼັງທີ່ໄດ້ຖິ້ມຂີ້ເຫຍື້ອລົງໃນແມ່ນໍ້າຢ່າງຕໍ່ເນື່ອງໃນຊ່ວງວັນພັກຜ່ອນ ແລະ ງານລ້ຽງຕ່າງໆ.
ນັບຕັ້ງແຕ່ການລະບາດຂອງໂຄວິດ-19, ປະເທດລາວມີການຈຳກັດບໍ່ໃຫ້ທ່ອງທ່ຽວພາຍນອກເຂົ້າມາ, ເຮັດໃຫ້ນັກທ່ອງທ່ຽວພາຍໃນຕ່າງກໍ່ເດີນທາງໄປພັກຜ່ອນທີ່ເມືອງວັງວຽງ ເພາະມີໄລຍະທາງ 110 ກິໂລແມັດ ຜ່ານທາງດ່ວນຈາກນະຄອນຫຼວງວຽງຈັນ.
ວັງວຽງແມ່ນເມືອງນັກທ່ອງທ່ຽວແບກເປ້, ເຊິ່ງຫຼັກໆຈະເຕັມໄປດ້ວຍ ເຮືອນພັກ, ຮ້ານອາຫານ, ຮ້ານກິນດື່ມ, ຮ້ານອິນເຕີເນັດ, ແລະ ບໍລິສັດທ່ອງທ່ຽວ. ກິດຈະກຳທີ່ດຶງດູດນັກທ່ອງທ່ຽວໄດ້ແກ່ການຂີ່ກົງເບັງ ແລະ ພາຍເຮືອຄາຢັກ(kayak) ຕາມນໍ້າຊອງ.
ນັກສັງເກດການດ້ານສິ່ງແວດລ້ອມມີຄວາມກັງວົນກ່ຽວກັບປະລິມານຂີ້ເຫຍື້ອໃນນໍ້າຊອງ ເພາະມີຂີ້ເຫຍື້ອເພີ່ມຂື້ນຈຳນວນຫຼາຍຢູ່ທົ່ວແມ່ນ້ຳ ຫຼັງຈາກທີ່ມີນັກທ່ອງທ່ຽວມາທ່ຽວເມືອງວັງວຽງໃນຕົ້ນເດືອນມັງກອນທີ່ຜ່ານມາ.
ນັກສັງເກດການສົງໄສວ່າ: ສາເຫດອາດເກີດມາຈາກບັນດາຮ້ານອາຫານທ້ອງຖິ່ນ ທີ່ຕັ້ງຢູ່ຕາມແຄມແມ່ນໍ້າ ເຮັດໃຫ້ນັກທ່ອງທ່ຽວງ່າຍຕໍ່ການຖີ້ມຂີ້ເຫຍື້ອລົງແມ່ນໍ້າ ເຖິງວ່າຈະມີການຕິດປ້າຍຫ້າມຖີ້ມຂີ້ເຫຍື້ອກໍ່ຕາມ. ນັກທ່ອງທ່ຽວທີ່ຈອດລົດ ແລະ ກິນດື່ມ ແຄມແມ່ນໍ້າຊອງກໍ່ຖິ້ມຂີ້ເຫຍື້ອລົງໃນນໍ້າຢ່າງບໍ່ມີຄວາມຮັບຜິດຊອບ.
ສິ່ງເຫຼົ່ານີ້ ສົ່ງຜົນກະທົບຕໍ່ປາໃນນໍ້າ ແລະ ທີ່ຢູ່ອາໄສຂອງສັດນໍ້າຊະນິດອື່ນໆ. ນັກອະນຸລັກສິ່ງແວດລ້ອມໄດ້ອະທິບາຍວ່າ: ນໍ້າເປື້ອນ ຍ້ອນການທ່ອງທ່ຽວ ແລະ ການອາບນໍ້າຂອງປະຊາຊົນ.
ເຈົ້າໜ້າທີ່ຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ ເມືອງວັງວຽງກ່າວເຕືອນ ເມືອງອາດຈະພົບຄວາມທ້າທາຍໃນການຮັບມືກັບການເພີ່ມຂື້ນຂອງປະລິມານຂີ້ເຫຍື້ອທີ່ຖີ້ມໃນແມ່ນໍ້າ ຈາກພາກສ່ວນນັກທ່ອງທ່ຽວ ຜູ້ທີ່ຖີ້ມຂີ້ເຫຍື້ອຊະຊາຍ.
ປະລິມານຂີ້ເຫຍື້ອໃນນໍ້າຊອງໄດ້ຫຼຸດລົງ 60 ສ່ວນຮ້ອຍ ຫຼັງຈາກລັດຖະບານໄດ້ປິດພາກສ່ວນນັກທ່ອງທ່ຽວທີ່ຈັດງານສ້າງສັນຕ່າງໆຕາມແຄມແມ່ນໍ້າໃນປີ 2012.
ເຈົ້າໜ້າທີ່ຫ້ອງການດ້ານສິ່ງແວດລ້ອມວັງວຽງກ່າວວ່າ: ໄດ້ມີການແຈ້ງໃຫ້ເຈົ້າຂອງຮ້ານອາຫານປະຕິບັດຕາມກົດລະບຽບຢ່າງເຂັ້ມງວດ ຖ້າຫາກພົບເຫັນວ່າ ມີປ່ອຍນໍ້າເປື້ອນ ແລະ ຂີ້ເຫຍື້ອລົງໃນແມ່ນໍ້າ ຈະຖືກປັບໃໝ 500,000 ກີບ. ບາງຄັ້ງກໍເປັນເລື່ອງຍາກສຳລັບເຈົ້າໜ້າທີ່ຕ້ອງລົງໄປກວດກາເລື່ອຍໆ ສະນັ້ນ,ຈຶ່ງເປັນຊ່ອງວ່າງສຳລັບເຈົ້າຂອງທຸລະກິດໃນການສ່ວຍໂອກາດລະເມີດກົດລະບຽບຫຼາຍຂື້ນ. ເຖິງຢ່າງໃດກໍ່ຕາມ, ນັກທ່ອງທ່ຽວພາຍໃນ ກໍ່ຄວນມີຄວາມຕື່ນຕົວໃຫ້ຫຼາຍຂື້ນໃນການຮັກສາຄວາມສະອາດແມ່ນໍ້າ, ມີຄວາມຮັບຜິດຊອບຕໍ່ຂີ້ເຫຍື້ອຂອງຕົນເອງໃນເວລາເດີນທາງໄປທ່ຽວສະຖານທີ່ທ່ອງທ່ຽວຕ່າງໆ.