ມີລາຍງານວ່າ Apple ເລີ່ມເຮັດການທົດສອບຮູບແບບຂອງ iPhone ຈໍພັບໄດ້ 2 ລຸ້ນທີ່ໂຮງງານ Foxconn ໃນປະເທດຈີນແລ້ວ.

ໂດຍລາຍງານຈາກສື່ UDN ເຜີຍວ່າ Apple ກຳລັງພັດທະນາ iPhone ຈໍພັບໄດ້ 2 ລຸ້ນ ເຊິ່ງລຸ້ນທຳອິດຈະເປັນຈໍພັບແຍກແບບ 2 ຈໍ ສ່ວນອີກລຸ້ນຈະເປັນການພັບແບບຝາພັບ ຄ້າຍກັບ Samsung Galaxy Z Flip ແລະ Lenovo Moto RAZR.

ຫຼ້າສຸດ, Ming-Chi Kuo ໄດ້ເຜີຍລາຍລະອຽດອອກມາ ໂດຍຄາດວ່າຈະມີໜ້າຈໍກ້ວາງ 7.5 – 8 ນິ້ວ ແລະ ຄາດວ່າຈະເປີດຕົວໃນປີ 2023 ເຫດຜົນທີ່ຕ້ອງໃຊ້ເວລາລໍຄອຍທີ່ຍາວນານຍ້ອນວ່າເທັກໂນໂລຢີຢູ່ໃນລະດັບ Mess Production ລວມເຖິງການພັດທະນາທີ່ Apple ຍັງເລີ່ມຕົ້ນເຮັດ ຄົງຕ້ອງລໍຖ້າໄປກ່ອນ.

ທາງດ້ານ Foxconn ໄດ້ເລີ່ມເຮັດການທົດສອບຄວາມທົນທານຂອງຮູບແບບຝາພັບ ເຊິ່ງຈາກການລາຍງານກ່ອນໜ້າເປີດເຜີຍວ່າ ຈະຕ້ອງທົນທານຕໍ່ການພັບໄດ້ຫຼາຍກວ່າ 100,000 ຄັ້ງ ແລະ ເມື່ອການທົດສອບສຳເລັດແລ້ວ Apple ຈະເລືອກໂມເດລທີ່ຜ່ານການທົດສອບໄດ້ດີທີ່ສຸດມາເປີດຕົວ.

ຮຽບຮຽງຂ່າວ: ພຸດສະດີ