ກະຊວງປ້ອງກັນປະເທດສະຫະລັດ ໄດ້ກ່າວວ່າ: ໃນວັນສຸກທີ 26 ກຸມພາ 2021, ກອງກຳລັງໂຈມຕີທາງອາກາດຢູ່ພາກຕາເວັນອອກຂອງຊີເຣຍ ໃກ້ກັບຊາຍແດນຂອງປະເທດອີຣັກ ຕາມຄຳສັ່ງຂອງປະທານາທິບໍດີ ໂຈ ໄບເດນ, ໂດຍມີເປົ້າໝາຍຄື ແນໃສ່ຕຶກອາຄານບໍລິເວນຊາຍແດນ ຂອງກອງກຳລັງທີ່ໄດ້ຮັບການສະໜັບສະໜູນຈາກອີຣານຫຼາຍກຸ່ມ ເຊິ່ງລວມທັງກຸ່ມ ຄາຕາອິບ ແຫັດບອນເລາະ ແລະ ຄາຕາອິບ ໄຊຍິດອັນ-ຊູຮາດາ ເຊິ່ງເປັນພັນທະມິດກັບລັດຖະບານຊີເຣຍ.
ເພນຕາກອນ (ສຳນັກງານໃຫຍ່ຂອງກະຊວງປ້ອງກັນປະເທດຂອງສະຫະລັດ) ເປີດເຜີຍວ່າ: ການໂຈມຕີດັ່ງກ່າວໄດ້ທຳລາຍອາຄານຫຼາຍຫຼັງ ແຕ່ພວກເຂົາບໍ່ມີການຢືນຢັນວ່າມີຜູ້ໃດໄດ້ຮັບບາດເຈັບຫຼືເສຍຊີວິດຫຼືບໍ່ ເຖິງຢ່າງໃດກໍ່ຕາມ ກອງກຳລັງອິຣັກປະກອບອາວຸດກຸ່ມໜຶ່ງ ແຈ້ງກັບສຳນັກງານຂ່າວເອພີ ວ່າ: ມີກອງກຳລັງປະກອບອາວຸດ 1 ຄົນໄດ້ເສຍຊີວິດ ແລະ ອີກ 4 ຄົນໄດ້ຮັບບາດເຈັບ.
ເພນຕາກອນ ໄດ້ກ່າວເຕີ່ມວ່າ: ການໂຈມຕີຄັ້ງຫຼ້າສຸດນີ້ເກີດຂື້ນເພື່ອຕອບໂຕ້ການໂຈມຕີຕໍ່ເຈົ້າໜ້າທີ່ຂອງສະຫະລັດ ແລະ ບັນດາປະເທດທີ່ເປັນພັນທະມິດໃນອີຣັກ ແລະ ການເຮັດແບບນີ້ແມ່ນເປັນການສົ່ງຂໍ້ຄວາມທີ່ຈະແຈ້ງວ່າ: “ ປະທານາທິບໍດີ ໂຈ ໄບເດນ ຈະເຄື່ອນໄຫວ ເພື່ອປ້ອງກັນຊາວອາເມລິກາ ແລະ ເຈົ້າໜ້າທີ່ຂອງພັນທະມິດ ໃນເວລາດຽວກັນ ພວກເຮົາຈະເຄື່ອນໄຫວຢ່າງລະມັດລະວັງ ໂດຍມີຈຸດປະສົງເພື່ອຫຼຸດຜ່ອນຄວາມຕຶງຄຽດ ຂອງສະຖານະການໂດຍລວມທັງໃນພາກຕາເວັນອອກຂອງຊີເຣຍ ແລະ ອີຣັກ”.
ກະຊວງການຕ່າງປະເທດຂອງຊີເຣຍ ໄດ້ອອກຖະແຫຼງການໂດຍກ່າວປະນາມການໂຈມຕີຂອງສະຫະລັດ. “ຊີເຣຍກ່າວປະນາມຢ່າງຮຸນແຮງຕໍ່ການໂຈມຕີທີ່ໂຫດຮ້າຍຂອງສະຫະລັດໃນພື້ນທີ່ຂອງ ເມືອງ ເດຍ ເອົາ-ຊໍ ເຊິ່ງໃກ້ກັບຊາຍແດນຊີເຣຍ-ອີຣັກ.” “ ລັດຖະບານສະຫະລັດ ຄວນປະຕິບັດຕາມກົດໝາຍລະຫວ່າງປະເທດ ຢ່າງເຂັ້ມງວດ ມັນບໍ່ແມ່ນຜູ້ໃດທີ່ເຂັ້ມແຂງແມ່ນຜູ້ລອດ ຄືກັບລັດຖະບານຊຸດກ່ອນ” ໃນຫຼາຍເດືອນທີ່ຜ່ານມາ ຖານທັບ ແລະ ອາຄານກໍ່ສ້າງຂອງສະຫະລັດອາເມລິກາ ໃນເມືອງເອີບິວ ທາງພາກເໜືອ ເຊີ່ງເຈົ້າໜ້າທີ່ສັນຍາຈ້າງຂອງສະຫະລັດ ເສີຍຊີວິດ 1 ຄົນ ເມື່ອຊ່ວງການເດືອນທີ່ຜ່ານມາ ໂດຍກຸ່ມຕິດອາວຸດນິລະນາໃນປະເທດອີຣັກອອກມາປະກາດເປັນຜູ້ຢູ່ເບື້ອງຫຼັງ ແຕ່ເຈົ້າໜ້າທີ່ຝ່າຍພາກຕາເວັນຕົກກ່າວວ່າ: ກອງກຳລັງນີ້ເປັນກຸ່ມແນວໜ້າ ຂອງກອງກຳລັງທີ່ອີຣານ ສະໜັບສະໜູນຄື ຄາຕາອິບ ແຫັດບອນເລາະ.
ໂຈ ໄບເດນ ໄດ້ສັ່ງໃຫ້ໂຈມຕີສະເພາະໃນປະເທດຊີເຣຍເທົ່ານັ້ນ ເພື່ອໃຫ້ລັດຖະບານອີຣັກມີພື້ນທີ່ຫາຍໃຈເພື່ອກວດກາການໂຈມຕີເມືອງ ເອີບິວ. ໃນເວລາດຽວກັນ ກຸ່ມຄາຕາອິບ ແຫັດບອນເລາະ ໄດ້ຢືນຢັນວ່າພວກເຂົາບໍ່ມີສ່ວນຮ່ວມໃນການໂຈມຕີຜົນປະໂຫຍດຂອງສະຫະລັດໃນຊ່ວງທີ່ຜ່ານມາ ເຊິ່ງລັດຖະບານອີຣານກໍ່ໄດ້ປະຕິເສດການມີສ່ວນຮ່ວມໃນການໂຈມຕີຖານທັບສະຫະລັດ.
ຮຽບຮຽງຂ່າວ: ມົນລະດີ