ຫ້ອງການພະແນກສຶກສາ ແລະ ກີລາແຂວງບໍ່ແກ້ວ ໃນວັນທີ 22 ມັງກອນ 2021 ໄດ້ອອກແຈ້ງການເລື່ອນການຮຽນຂອງຊັ້ນອະນຸບານ ແລະ ປະຖົມທົ່ວແຂວງ ເນື່ອງຈາກມີຄົນຈີນທີ່ຕິດເຊື້ອ ແລະ ລັກລອບເຂົ້າມາແຂວງບໍ່ແກ້ວ.
ປັດຈຸບັນ, ຄະນະສະເພາະກິດຄວບຄຸມ ແລະ ແກ້ໄຂການ່ລະບາດຂອງເຊື້ອພະຍາດໂຄວິດ-19 ຂອງແຂວງພວມດຳເນີນການກວດເຂັ້ມງວດ ຕໍ່ກັບພາກສ່ວນທີ່ກ່ຽວຂ້ອງ.
ສະນັ້ນ, ເພື່ອປ້ອງກັນ ແລະ ຄວບຄຸມການລະບາດຂອງພະຍາດໂຄວິດ-19 ບໍ່ໃຫ້ແຜ່ລະບາດເຂົ້າໃນໂຮງຮຽນ, ຂະແໜງການສຶກສາ ແລະ ກີລາ ແຂວງບໍ່ແກ້ວ. ພະແນກສຶກສາທິການ ແລະ ກີລາແຂວງ ຈຶ່ງເຫັນດີເປັນເອກະພາບເລື່ອນເວລາການເຂົ້າຮຽນຂອງຊັ້ນລ້ຽງເດັກ, ອະນຸບານ ແລະ ຊັ້ນປະຖົມສຶກສາທົ່ວແຂວງນັບທັງພາກລັດ ແລະ ເອກະຊົນ ໄປເຂົ້າຮຽນໃນວັນທີ 1 ກຸມພາ 20 ພ້ອມກັບຊັ້ນມັດທະຍົມສຶກສາ.
ຮຽບຮຽງຂ່າວ: ພຸດສະດີ