ທ່ານ ແຈັກໝ່າ ຜູ້ກໍ່ຕັ້ງອາລີບາບາ ກຣຸ໊ບ ໄດ້ປະກົດຕົວຄັ້ງທຳອິດໃນວັນທີ 20 ມັງກອນ 2021 ຜ່ານການປະຊຸມຜ່ານທາງອອນລາຍຮ່ວມກັບຄູໃນຊົນນະບົດກວ່າ 100 ຄົນ ຫຼັງຈາກທີ່ເຂົາຫາຍໜ້າໄປຈາກສາທາລະນະນັບຕັ້ງແຕ່ເດືອນ ຕຸລາ 2020.
ເວັບໄຊຂ່າວທ້ອງຖິ່ນຈາກມົນທົນເຈີຈຽງລາຍງານວ່າ ທ່ານ ໝ່າ ຢູ່ໃນຊຸດເສື້ອແຂນຍາວສີດີ ໄດ້ຮ່ວມພິທີມອບລາງວັນໃຫ້ຄູຊົນນະບົດຜ່ານທາງວິດີໂອຄອນເຟີເຣນ ໂດຍງານດັ່ງກ່າວເປັນການມອບລາງວັນປະຈຳປີໃຫ້ແກ່ຄູຊົນນະບົດທີ່ສ້າງຜົນງານໃນຫຼາກຫຼາຍ ເຊິ່ງຖືກຈັດຂຶ້ນເປັນຄັ້ງທຳອິດເມື່ອປີ 2015 ໂດຍມູນນິທິແຈັກໝ່າ.
ທ່ານ ແຈັກໝ່າ ໄດ້ກ່າວວ່າ “ເຮົາຈະພົບກັນໃໝ່ເມື່ອການລະບາດຂອງໂຄວິດ-19 ສິ້ນສຸດລົງແລ້ວ”
ກ່ອນ ໜ້າ ນີ້, ການຫາຍຕົວໄປຂອງ ທ່ານ ແຈັກ ໝ່າ ໄດ້ກາຍເປັນປະເດັນທີ່ຖືກລາຍງານຢ່າງກວ້າງຂວາງໃນສື່ມວນຊົນຕາເວັນຕົກ. ຫຼາຍພາກສ່ວນຄາດວ່າການຫາຍຕົວໄປອາດຈະກ່ຽວຂ້ອງກັບກຸ່ມບໍລິສັດ Ant Group ທີ່ລັດຖະບານຈີນໂຈະການຄ້າຂາຍ IPO ໃນຕະຫຼາດແລກປ່ຽນຫຸ້ນຊຽງໄຮແລະ ຮ່ອງກົງ.
ແຈັກ ໝ່າ ໄດ້ປະກົດຕົວເປັນເທື່ອທຳອິດໃນທ່າມກາງກະແສຂ່າວວ່າ ບັນດານັກລົງທືນທີ່ເປັນລູກຄ້າທະນາຄານ ພາກັນເທຂາຍ ຫຼື ຫຼຸດຈຳນວນການຖືຫຸ້ນຂອງອາລີບາບາ ກຣຸ໊ບ ຫຼັງຈາກມີລາຍງານວ່າ ລັດຖະບານຈີນ ກຳລັງເລີ່ມກວດສອບອາລີບາບາໃນຂໍ້ຫາຜູກຂາດທາງການຄ້າ ນີ້ແມ່ນຄວາມຄືບໜ້າ ທີ່ໄດ້ດຳເນີນພາຍຫຼັງທີ່ເຈົ້າໜ້າທີ່ຈີນສັ່ງຫ້າມໃນການຂາຍ IPO.
ຮຽບຮຽງຂ່າວ: ພຸດສະດີ