ອໍານາດການປົກຄອງແຂວງອັດຕະປືມີຄວາມພ້ອມແລ້ວທີ່ຈະຈັດງານສົມໂພດ ຫຼື ງານສູດຮູບປັ້ນພຣະເຈົ້າໄຊຍະເສດຖາທິລາດຊົງປະທັບຊ້າງ ເພື່ອປະດິດສະຖານໄວ້ທີ່ອະນຸສາວະລີ ທີ່ບ້ານຫາດຊາຍຂາວ ເມືອງໄຊເສດຖາ ແຂວງອັດຕະປື ເພື່ອໃຫ້ປະຊາຊົນແຂວງອັດຕະປືໄດ້ກາບໄຫວ້ ແລະ ບູຊາ, ເຊິ່ງງານສົມໂພດດັ່ງກ່າວຈະຈັດຂຶ້ນໃນລະຫວ່າງວັນທີ 21-27 ມັງກອນ 2021 ນີ້ ແຕ່ຈະໄດ້ຈັດ ຫຼື ບໍ່ນັ້ນຍັງລໍຖ້າການອະນຸຍາດຈາກລັດຖະບານ.
ທ່ານ ທອງທັດ ແກ້ວບຸນໄຊ ຮອງພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງອັດຕະປື ເຊິ່ງເປັນຜູ້ຊີ້ນໍາລວມວຽກງານຂົງເຂດວັດທະນະທໍາ ແລະ ຫໍພິພິທະພັນ-ຫໍສະໝຸດ ຢູ່ແຂວງອັດຕະປື ໄດ້ກ່າວຕໍ່ ທີມງານວຽງຈັນທາຍ ກ່ຽວກັບງານດັ່ງກ່າວເມື່ອວັນທີ 8 ມັງກອນນີ້ວ່າ: ປັດຈຸບັນນີ້ທາງແຂວງມີຄວາມພ້ອມແລ້ວທີ່ຈະຈັດງານດັ່ງກ່າວໂດຍມີການກະກຽມສະຖານທີ່ໄວ້ຮັບແຂກ, ກອງບຸນ 38 ກອງ ແລະ ອື່ນໆ ຕາມແຜນແລ້ວງານດັ່ງກ່າວຈະເລີ່ມແຕ່ວັນທີ 21 ຫາ 27 ມັງກອນ 2021. ພາຍໃນງານຈະມີພິທີທາງສາດສະໜາ, ງານຕະຫຼາດນັດ, ງານສະແດງສິລະປະທ້ອງຖິ່ນ, ງານເດີນແບບຊຸດຊົນເຜົ່າ ທີ່ມີ 11 ຊົນເຜົ່າພາຍໃນແຂວງອັດຕະປື, ງານປະກວດສາວເມືອງອົງການ (ເມືອງອົງການເປັນເມືອງຕົ້ນກໍາເນີດແຂວງອັດ ຕະປືໃນສະໄໝກ່ອນ) ແລະ ກິດຈະກໍາອື່ນໆ.
ທ່ານ ທອງທັດໄດ້ກ່າວຕື່ມວ່າ: ງານດັ່ງກ່າວນີ້ຈະໄດ້ຈັດຂຶ້ນຕາມໄລຍະເວລາທີ່ກໍານົດເວລາໄວ້ ຫຼື ບໍ່ນັ້ນແມ່ນຍັງລໍຖ້າຄໍາຕອບຈາກລັດຖະບານວ່າຈະອະນຸຍາດໃຫ້ຈັດ ຫຼື ບໍ່ ເພາະໃນໄລຍະນີ້ໄດ້ມີການແຜ່ລະບາດຂອງພະຍາດໂຄວິດ-19 ເຊິ່ງງານດັ່ງກ່າວອາດຈະຖືກເລື່ອນກໍ່ເປັນໄດ້ ແຕ່ເມື່ອຖາມຄວາມພ້ອມທາງແຂວງແມ່ນພ້ອມແລ້ວ 100% ສໍາລັບຈັດງານນີ້.
ຮຽບຮຽງຂ່າວ: ພຸດສະດີ