ປະຊາຊົນເກີດຄວາມສັບສົນກ່ຽວກັບການເກັບຄ່າທາງດ່ວນກັບລົດອຳບູລັງຂົນສົ່ງຄົນເຈັບ ຕົກລົງຕ້ອງອີງໃສ່ຂໍ້ຕົກລົງສະບັບໃດກັນແທ້. ພາຍຫຼັງຫ້ອງການສາທາລະນະສຸກເມືອງວັງວຽງ ໄດ້ອອກຂໍ້ຕົກລົງສະບັບເລກທີ 1904/ຫສມ ໃນວັນທີ 28 ທັນວາ 2020 ຕົກລົງເຫັນດີໃຫ້ມີການເກັບຄ່າທາງດ່ວນກັບລົດອຳບູລັງສົ່ງຄົນເຈັບຂຶ້ນທາງດ່ວນ ສຳລັບຄົນເຈັບທີ່ບໍ່ຢາກຈ່າຍຄ່າທາງດ່ວນເພີ່ມ ແມ່ນຈະເດ່ີນຕ້ອງເດີນທາງດ້ວຍທາງເກົ່າ (ທາງເລກທີ 13 ເໜືອ).
ຄົນເຈັບ ຫຼື ພີ່ນ້ອງຄົນເຈັບຕ້ອງຊ່ວຍຈ່າຍຄ່າທາງດ່ວນຈາກໂຮງໝໍວັງວຽງ ຫາ ໂຮງໝໍແຂວງແມ່ນຈ່າຍ 114,000 ກີບ/ຕໍ່ຄັ້ງ, ລາຄາທາງດ່ວນຈາກໂຮງໝໍວັງວຽງ ຫາ ໂຮງໝໍສູນກາງ (ນະຄອນຫຼວງວຽງຈັນ) ແມ່ນຈ່າຍ 224,000ກີບ/ຕໍ່ຄັ້ງ.
ກ່ອນໜ້ານີ້, ໄດ້ມີຂໍ້ຕົກລົງເລກທີ 20482/ຍທ, ອອກໃນວັນທີ 18 ທັນວາ 2020 ໂດຍລະບຸໃນມາດຕາ 40 ວ່າດ້ວຍພາຫະນະທີ່ຍົກເວັ້ນຄ່າຜ່ານທາງດ່ວນ ເຊິ່ງລວມມີ: ພາຫະນະລົດຕຳຫຼວດຈະລາຈອນທາງດ່ວນ ທີ່ປະຕິບັດໜ້າທີ່ສຸກເສີນ ແລະ ແກ້ໄຂອຸບັດເຫດຕາມທາງດ່ວນທີ່ມີເຄື່ອງໝາຍການຕິດຂ້າງລົດ, ລົດໂຮງໝໍ, ກູ້ໄພ, ລົດດັບເພີງ ແລະ ຍານພາຫະນະອື່ນໆທີ່ຜູ້ສຳປະທານເປັນຜູ້ຕົກລົງ.
ຕາມການລາຍງານກໍ່ພົບວ່າໃນໄລຍະຜ່ານມາລົດໂຮງໝໍ, ລົດໜ່ວຍກູ້ໄພ ແມ່ນໄດ້ເສຍຄ່າຜ່ານທາງປົກກະຕິຄືກັນກັບພາຫະນະທົ່ວໄປ.
ດັ່ງນັ້ນ, ເພື່ອບໍ່ໃຫ້ເກີດຄວາມສັບສົນໃນສັງຄົມຈົນເກີດມີກະແສຫາງສຽງດ້ານລົບຕາມມາ ຈຶ່ງຮຽກຮ້ອງໃຫ້ທາງພາກສ່ວນທີ່ກ່ຽວຂ້ອງຊ່ວຍໃຫ້ຄວາມກະຈ່າງແຈ້ງຕໍ່ປະຊາຊົນ ໂດຍສະເພາະກັບບັນດາພາຫະນະທີ່ຖືກກຳນົດໃນມາດຕາ 40 ຂ້າງເທິງ ແມ່ນຕ້ອງອີງໃສ່ຂໍ້ຕົກລົງສະບັບໃດກັນແທ້.
ຮຽບຮຽງຂ່າວ: ພຸດສະດີ