ໜັງສືພິມວຽງຈັນທາມ ລາຍງານອີງຕາມຂໍ້ມູນຈາກບໍລິສັດຮ່ວມທຶນພັດທະນາລາວ-ຈີນຈໍາກັດ ເຊິ່ງເປັນບໍລິສັດລົງທຶນກ່ຽວກັບການກໍ່ສ້າງທາງດ່ວນວຽງຈັນ-ວັງວຽງໃຫ້ຮູ້ວ່າ: ການເກັບຄ່າບໍລິການຜ່ານທາງດ່ວນດັ່ງກ່າວແມ່ນ 8.000 ກີບຕໍ່ດ່ານ ເຊິ່ງລວມມີ 8 ດ່ານ (ລວມໄປກັບ 16 ດ່ານ) ນັບແຕ່ນະຄອນຫຼວງວຽງຈັນ ຫາ ເມືອງວັງວຽງ ແຂວງວຽງຈັນ.

ທາງດ່ວນວຽງຈັນ ຫາ ເມືອງວັງວຽງນີ້ມີຈຸດເລີ່ມຕົ້ນທີ່ສາມແຍກສີເກີດເມືອງນາຊາຍທອງ ນະຄອນ ຫຼວງວຽງຈັນ ຜ່ານເມືອງໂພນໂຮງ, ເມືອງຫີນເຫີບ ແລະ ສິ້ນສຸດທີ່ເມືອງວັງວຽງແຂວງວຽງຈັນ, ມີມູນຄ່າການກໍ່ສ້າງຫຼາຍກວ່າ 1 ຕື້ໂດລາ, ຍາວປະມານ 109,9 ກິໂລແມັດ ແລະ ກວ້າງ 23 ແມັດ, ເປັນເສັ້ນທາງຄູ່ຂະໜານ, ມີ 4 ຊ່ອງທາງຈະລາຈອນ ແລະ 2 ແລວໄປ-ກັບ, ສ່ວນຄວາມໄວຢູ່ໃນລະດັບແຕ່ 80-100 ກິໂລແມັດ/ຊົ່ວໂມງ, ມີວົງວຽນຈຸດເຊື່ອມຕໍ່ເຂົ້າ-ອອກ 7 ຈຸດ, ອຸໂມງ 1 ແຫ່ງ (ເຂດພູພະນັງ), ຂົວ 45 ແຫ່ງ, ເຊິ່ງຂ້າມທາງເລກທີ 13 ເໜືອ 3 ຈຸດ, ຂ້າມທາງລົດໄຟ 4 ຈຸດ ແລະ ຂ້າມທາງເຂົ້າບ້ານ 23 ຈຸດ.

ຮຽບຮຽງຂ່າວ: ພູດສະດີ