ສຳນັກມະຕິຊົນ ລາຍງານວ່າ ເມື່ອວັນທີ 8 ທັນວາ 2020 ສາດສະດາຈານ ປະສິດ ວັດທະນາພາ ຄະນະບໍດີຄະນະແພດສາດສີຣິຣາຊພະຍາບານ ມະຫາວິທະຍາໄລມະຫິດົນ ໄດ້ຖະແຫຼງການກ່ຽວກັບສະພາບການໂຄວິດ-19 ແລະ ການຜະລິດວັກຊີນປ້ອງກັນໂຄວິດຜ່ານເຟສບຸ໊ກ Mahidol university ວ່າ ຈາກການຖອດຖອນບົດຮຽນການລະບາດໃນມຽນມາທີພົບການລະບາດຢ່າງໄວວາຈາກຄັ້ງທຳອິດທີ່ພົບຜູ້ປ່ວຍໂຄວິດໃນວັນທີ 23 ມີນາ ຈົນເຖິງ 6 ທັນວາ 2020ນີ້ ມີຈຳນວນຜູ້ປ່ວຍເພີ່ມຂຶ້ນກວ່າ 200 ເທົ່າ ແລະ ແພ່ກະຈາຍໄປພື້ນທີ່ຕ່າງໆທົ່ວປະເທດຢ່າງໄວວາ.

ໂຄວິດ-19 ທີ່ລະບາດໃນມຽນມາເປັນສາຍພັນ G614 ທີ່ພົບການລະບາດເປັນວົງກວ້າງໃນປະເທດທາງຕະເວັນຕົກ ແລະ ທົ່ວໂລກໃນປັດຈຸບັນ ເຊິ່ງຄວາມແຕກຕ່າງຂອງສາຍພັນນີ້ກໍ່ຄື ຕົວເຊື້ອສາມາດເພີ່ມຈຳນວນໄດ້ໄວກວ່າ 20% ເຮັດໃຫ້ເກີດການລະບາດໄວກວ່າສາຍພັນເກົ່າ.

ສາດສະດາຈານ ປະສິດ ວັດທະນາພາ ໄດ້ກ່າວວ່າ 3 ປັດໄຈທີ່ໜ້າເປັນຫ່ວງທີ່ເຮັດໃຫ້ເກີດການລະບາດໃນຕອນນີ້ຄື ອາກາດເຢັນທີ່ເຮັດໃຫ້ຄົນມັກຢູ່ແຕ່ໃນອາຄານເຊິ່ງເປັນພື້ນທີ່ປິດ ແລະ ບໍ່ໃສ່ຜ້າປິດປາກ-ດັງ, ຊາຍແດນທີ່ມີການລະບາດຮຸນແຮງຫຼາຍຂຶ້ນ ໂດຍສະເພາະມີການລັກລອບເຂົ້າເມືອງກໍ່ເປັນປັດໄຈທີ່ເຮັດໃຫ້ເກີດການລະບາດໄດ້ ແລະ ການຈັດງານຊຸມນຸມຕ່າງໆ.

ຮຽບຮຽງຂ່າວ: ພຸດສະດີ