ໜັງສືພິມວຽງຈັນທາມ ລາຍງານວ່າ ກະຊວງແຜນການ ແລະ ການລົງທຶນ ແຈ້ງໃຫ້ຮູ້ວ່າ ມາຮອດປະຈຸບັນ, ການລົງທຶນຂອງບັນດາວິສາຫະກິດຂອງຫວຽດນາມຢູ່ລາວ ລວມມູນຄ່າສູງເຖິງ 4,1 ຕື້ ໂດລາສະຫະລັດ ຈັດຢູ່ໃນອັນດັບ 3 ຂອງນັກລົງທຶນຕ່າງປະເທດທີ່ມາລົງທຶນຢູ່ ສປປ ລາວ ແລະ ມູນຄ່າການຄ້າສອງຝ່າຍ ໃນ 10 ເດືອນ ປີ 2020 ບັນລຸໄດ້ 815 ລ້ານ ໂດລາສະຫະລັດ, ສະເພາະການຮ່ວມມືໃນຂົງເຂດການສຶກສາ-ບຳລຸງສ້າງ ກໍໄດ້ເປີດກວ້າງດ້ວຍຫຼາຍຮູບການ, ປະຈຸບັນ ຈໍານວນນັກສຶກສາລາວ ທີ່ກໍາລັງຄົ້ນຄວ້າຮ່ຳຮຽນ ຢູ່ ສສ. ຫວຽດນາມ ມີຫຼາຍກວ່າ 16.000 ຄົນ.
ສຳລັບທິດທາງແຜນການຮ່ວມມືດ້ານການຄ້າ, ການລົງທຶນ ແລະ ການສຶກສາ ໃນປີ 2021, ເຖິງແມ່ນ ວ່າ ມູນຄ່າການຄ້າລາວ-ຫວຽດນາມ ໃນປີນີ້ບໍ່ສາມາດບັນລຸໄດ້ຕາມຄາດໝາຍທີ່ສອງລັດຖະບານໄດ້ຕົກລົງກັນຍ້ອນການແຜ່ລະບາດຂອງເຊື້ອພະຍາດໂຄວິດ-19, ໃນຊຸມປີຕໍ່ໜ້າ, ສອງຝ່າຍເຫັນດີສູ້ຊົນຊຸກຍູ້ເປົ້າໝາຍມູນຄ່າການຄ້າສອງຝ່າຍໃຫ້ເພີ່ມຂື້ນ 10-15% ທຽບໃສ່ປີຜ່ານມາ, ສືບຕໍ່ຜັນຂະຫຍາຍບົດບັນທຶກຄວາມເຂົ້າໃຈ ກ່ຽວກັບ ການຮ່ວມມືດ້ານຄົມມະນາຄົມ ແລະ ຂົນສົ່ງ, ການຮ່ວມມືພັດທະ ນາບັນດາໂຄງການໄຟຟ້າຢູ່ລາວ, ເຊື່ອມຕໍ່ລະບົບໄຟຟ້າ ແລະ ການຊື້-ຂາຍ ໄຟຟ້າ. ຄຽງຄູ່ກັນນີ້, ສອງຝ່າຍ ກໍຈະພ້ອມກັນ ສືບຕໍ່ເພີ່ມທະວີການຮ່ວມມື ແລະ ສ້າງເງື່ອນໄຂເພື່ອເອື້ອອໍານວຍຄວາມສະດວກ ໃຫ້ແກ່ການຮ່ວມມືດ້ານການຄ້າ, ການລົງທຶນ, ການສຶກສາ ກໍຄື ການພັດທະນາຊັບພະຍາກອນມະນຸດຂອງສອງປະເທດ ແລະ ການຮ່ວມມືໃນບັນດາຂົງເຂດ ທີ່ສອງຝ່າຍມີທ່າແຮງບົ່ມຊ້ອນ.
ຮຽບຮຽງຂ່າວ: ພຸດສະດີ