ທ່ານ ດຣ.ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ລາຍງານວັນທີ 4 ພະຈິກນີ້ວ່າ: ສໍາລັບການເຝົ້າລະວັງ ໂຄວິດ-19 ຢູ່ ສປປ ລາວ ຮອດ 5 ໂມງແລງ ຂອງວັນທີ 03 ທັນວາ 2020 ໄດ້ເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດໃນວັນທີ 03 ທັນວາ 2020, ໄດ້ເກັບຕົວຢ່າງມາກວດວິເຄາະທັງໝົດ 774 ຄົນ, ໃນນັ້ນ ມີ 01 ຕົວຢ່າງຈາກບຸກຄົນທົ່ວໄປທີ່ມີອາການ; 149 ຕົວຢ່າງຈາກບຸກຄົນທົ່ວໄປບໍ່ມີອາການ; 205 ຕົວຢ່າງຈາກແຮງງານມາແຕ່ໄທ; ແຮງງານຈີນ 319 ຕົວຢ່າງ; ແຮງງານຫວຽດນາມ 99 ຕົວຢ່າງ ແລະ ແຮງງານລາວມາແຕ່ຈີນ 01 ຕົວຢ່າງ; ຜົນກວດວິເຄາະທັງໝົດແມ່ນ ບໍ່ພົບເຊື້ອ, ໝາຍຄວາມວ່າ ວັນທີ 03 ທັນວາ 2020 ບໍ່ພົບຜູ້ຕິດເຊື້ອໃໝ່.
ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 03 ທັນວາ 2020 ໄດ້ເກັບຕົວຢ່າງມາກວດທັງໝົດ 80,962 ຕົວຢ່າງ, ກວດພົບເຊື້ອສະສົມ 39 ຄົນ.
ສຳລັບການຕິດຕາມປີ່ນປົວຄົນເຈັບຢູ່ໂຮງໝໍ ປະຈຸບັນ ສຳລັບຄົນເຈັບຕິດເຊື້ອພະຍາດໂຄວິດ-19 ນ້ຳເບີ 27 ຫາ ນ້ຳເບີ 39 ແມ່ນສືບຕໍ່ນອນປິ່ນປົວຢູ່ໂຮງໝໍມິດຕະພາບ, ທຸກຄົນແມ່ນມີອາການເບົາບາງ.
ຂ້າພະເຈົ້າ ຂໍອະທິບາຍເພິ່ມເຕີມ ສຳລັບ ຂ່າວ ຄົນຈີນ 2 ຄົນ ທີ່ໄດ້ເດີນທາງມາຈາກປະເທດເພື່ອນບ້ານ ເຂົ້າມາທາງເມືອງຕົ້ນເຜິ້ງ, ແຂວງບໍ່ແກ້ວ ແລະ ມາຮອດເຂດເສດຖະກິດພິເສດ ບໍ່ເຕັນແດນງານ ແລະ ໄດ້ເຂົ້າພັກຢູ່ໂຮງແຮມແຫ່ງໜຶ່ງ ຫຼັງຈາກໄດ້ນັ້ນ ພວກກ່ຽວ ໄດ້ເດີນທາງກັບໄປ ສປ ຈີນ ໂດຍບໍ່ຖືກລະບຽບ ພ້ອມດຽວກັນນັ້ນ ສປ ຈີນ ກໍ່ໄດ້ເກັບຕົວຢ່າງຂອງພວກກ່ຽວມາກວດ ຜົນກວດ ແມ່ນພົບເຊື້ອພະຍາດໂຄວິດ-19 ທັງ 2 ຄົນ. ຕໍ່ກັບເຫດການດັ່ງກ່າວນີ້ ແມ່ນເປັນຄວາມຈິງແທ້, ຄະນະສະເພາະກິດຂອງພວກເຮົາ ບໍ່ໄດ້ນິ້ງນອນໃຈແຕ່ຢ່າງໃດ, ໄດ້ແຕ່ງຕັ້ງທີມງານລົງສອບສວນຢ່າງທັນທີ ເພື່ອເກັບກຳຂໍ້ມູນຢ່າງລະອຽດ, ພ້ອມດຽວກັນ ຍັງໄດ້ຄົ້ນຫາ ແລະ ຕິດຕາມຜູ້ສຳຜັດໃກ້ຊິດ ທີ່ມີການພົວພັນກັບ ຄົນຈີນທັງ 2 ຄົນດັ່ງກ່າວ ຢ່າງຮີບດ່ວນ ເພື່ອທຳການເກັບຕົວຢ່າງມາກວດ ແລະ ເຂົ້າຈຳກັດບໍລິເວນ 14 ວັນ ຕາມຄຳແນະນຳຂອງຄະນະສະເພາະກິດວາງອອກ ຢ່າງເຄັ່ງຄັດ.
ຮຽບຮຽງຂ່າວ: ພຸດສະດີ