ໜັງສືພິມວຽງຈັນທາມ ລາຍງານວ່າ ປັດຈຸບັນນີ້, ໂຄງການຍົກລະດັບໄຟເຍືອງທາງໃນເທດສະບານ 7 ເສັ້ນທາງໃຈກາງຕົວເມືອງນະຄອນ ຫຼວງວຽງຈັນ ແລະ ລະບົບນໍ້າພຸສວນປະຕູໄຊ ກຳລັງເລັ່ງໃສ່ການຟື້ນຟູທາງຍ່າງ, ປັບປຸງບ່ອນຕິດຕັ້ງຕີນເສົາຈຳນວນໜຶ່ງ, ຕິດຕັ້ງລະບົບກ້ອງວົງຈອນປິດ ແລະ ຫ້ອງຄວບຄຸມທັງລະບົບສັນຍານສົ່ງຂໍ້ມູນເພື່ອໃຫ້ສຳເລັດຕາມແຜນໃນເດືອນກຸມພານີ້ ກ່ອນທີ່ຈະມີການມອບ-ຮັບ ໃນວັນທີ 25 ມີນາ 2021.

ໂດຍລວມແລ້ວໂຄງການດັ່ງກ່າວແມ່ນສຳເລັດໂດຍພື້ນຖານພາຍຫຼັງທີ່ເລີ່ມປະຕິບັດມາແຕ່ເດືອນກັນຍາ 2020 ເຊິ່ງໄດ້ສຳເລັດການຕິດຕັ້ງໄຟເຍືອງທາງໃນເທດສະບານ 7 ເສັ້ນທາງ ແລະ ສຳເລັດກສຍຕິດຕັ້ງລະບົບນໍ້າພຸ, ສວນປະຕູໄຊ ແລະ ມີພິທີເປີດນຳໃຊ້ຢ່າງເປັນທາງການເມື່ອບໍ່ດົນມານີ້ ໂດຍການເຂົ້າຮ່ວມຂອງເຈົ້າຄອງນະຄອນຫຼວງວຽງຈັນ ທ່ານ ປອ. ສິນລະວົງ ຄຸດໄພທູນ, ລັດຖະມົນຕີກະຊວງອຸດສາຫະກຳ ແລະ ການຄ້າ. ທ່ານ ນາງ ເຂັມມະນີ ພົນເສນາ ແລະ ເອກອັກຄະລັດຖະທູດ ຈີນ ປະຈຳ ສປປ ລາວ ທ່ານ ຈຽງຈ້າຍຕິ່ງ.

ໂຄງການນີ້ໄດ້ຮັບການຊ່ວຍເຫຼືອຈາກລັດຖະບານຈີນ ມູນຄ່າສູງເຖິງ 87,5 ລ້ານຢວນ ເພື່ອເປັນຂອງຂວັນໃຫ້ແກ່ລັດຖະບານລາວ ແລະ ປະຊາຊົນລາວ ໃນການສະເຫຼີມສະຫຼອງວັດຊາດທີ 2 ທັນວາ ຄົບຮອບ 45ປີ.

ຮຽບຮຽງຂ່າວ: ພຸດສະດີ