ແຜນຜັງລວມຕົວເມືອງ ນະຄອນຫຼວງວຽງຈັນ ສະບັບໃໝ່ຫຼ້າສຸດ ເຊິ່ງມີເນື້ອທີ່ 61,6 ພັນເຮັກຕາ ນອນໃນ 7 ເມືອງ ເພີ່ມຈາກສະບັບ ກ່ອນເຖິງ 3 ເທົ່າ ຫຼືກວມເອົາ 16% ຂອງນະຄອນຫຼວງວຽງຈັນ ທັງ ນີ້ໃນແຜນຜັງລວມດັ່ງກ່າວໄດ້ກໍານົດເອົາໂຄງການບູລິມະສິດທັງໝົດ 79 ໂຄງການປະກອບມີ 7 ແຜນງານພັດທະນາໃນອະນາຄົດ.
ໜັງສືພິມເສດຖະກິດ-ສັງຄົມ ລາຍງານວ່າ ທ່ານ ບຸນຈັນ ສິນທະວົງ ລັດຖະມົນຕີ ກະຊວງໂຍທາທິການ ແລະ ຂົນສົ່ງໄດ້ລາຍງານກ່ຽວກັບການຄົ້ນຄວ້າ ແລະປັບປຸງແຜນຜັງລວມ ຕົວເມືອງນະຄອນຫຼວງວຽງຈັນ ສະບັບທີ III ຕໍ່ກອງປະຊຸມສະພາ ເມື່ອວັນທີ 3 ພະຈິກຜ່ານມາເຊິ່ງໄດ້ຍົກໃຫ້ເຫັນບາງຕອນສໍາຄັນວ່າ: ແຜນຜັງລວມຕົວເມືອງນະຄອນ ຫຼວງວຽງຈັນ ສະບັບທີ I ໄດ້ ຖືກ ຮັບຮອງ ແລະ ປະກາດໃຊ້ຢ່າງເປັນທາງການໃນປີ 1991 ໂດຍມີເນື້ອ ທີ່ວາງ ແຜນ 9,3 ພັນເຮັກຕາ, ກວມເອົາ 100 ບ້ານໃນ 4 ເມືອງຄື: ເມືອງຈັນທະບູລີ, ສີສັດຕະນາກ, ໄຊເສດຖາ ແລະ ສີໂຄດຕະບອງ.
ການວາງແຜນຜັງແມ່ນຄອບຄຸມເອົາເນື້ອທີ່ຂອງເຂດວາງແຜນ ທັງຫມົດ 61,6 ພັນເຮັກຕາເພີ່ມຂຶ້ນຈາກແຜນຜັງສະບັບທີ່ສອງ ປະມານ 3 ເທົ່າ ໂດຍກວມເອົາ 288 ບ້ານທີ່ນອນຢູ່ໃນເມືອງຈັນທະບູລີ, ສີສັດຕະນາກ ແລະ ສ່ວນໜຶ່ງຂອງເມືອງ ສີໂຄດຕະບອງ, ໄຊເສດຖາ, ຫາດຊາຍຟອງ, ນາຊາຍທອງ ແລະ ເມືອງໄຊທານີ ຫຼື ມີເນື້ອທີ່ ກວມເອົາ 16% ໃນເນື້ອທີ່ທັງຫມົດຂອງນະຄອນຫຼວງວຽງຈັນ.
ທ່ານ ບຸນຈັນ ສິນທະວົງ ກ່າວຕໍ່ວ່າ: ສໍາລັບແຜນຜັງລວມຕົວເມືອງ ນະຄອນຫຼວງວຽງຈັນ ສະບັບທີ III ນີ້ໄດ້ສ້າງຂຶ້ນ ເພື່ອຮອງຮັບຕໍ່ ສະພາບການຂະຫຍາຍຕົວ ຢ່າງວ່ອງໄວ ແລະ ຕໍ່ເນື່ອງທາງດ້ານ ເສດຖະ ກິດ-ສັງຄົມ ແລະຄວາມຮຽກຮ້ອງຕ້ອງການຂອງການນໍາໃຊ້ ທີ່ດິນເພື່ອການພັດທະນາລວມເຖິງເພື່ອເປັນແນວທາງໃນການສຶບຕໍ່ ແກ້ໄຂສະພາບບັນຫາຕ່າງໆ ທີ່ຖອດຖອນໄດ້ຈາກການຈັດຕັ້ງ ປະຕິບັດແຜນຜັງຕົວເມືອງສະບັບຜ່ານມາ ແລະ ເພື່ອໃຫ້ສອດຄ່ອງ ກັບວິໄສທັດການພັດທະນານະຄອນຫຼວງວຽງຈັນໃນໄລຍະໃໝ່.
ສ່ວນດ້ານເນື້ອໃນສະເພາະເຊັ່ນ: ດ້ານການແບ່ງເຂດນໍາໃຊ້ທີ່ດິນ ໂຄງຕາໜ່າງຖະໜົນ ແລະ ລະບົບລະບາຍນ້ຳແມ່ນໄດ້ສືບຕໍ່ປັບປຸງ ລະບົບທີ່ໄດ້ວາງແຜນໃນສະບັບກ່ອນໆອີງຕາມສະພາບຄວາມເປັນ ຈິງຂອງກໍາມະສິດທີ່ດິນໃນນີ້ເພື່ອເປັນເຮັດໃຫ້ການຈັດຕັ້ງປະຕິບັດ ຕົວຈິງມີຈຸດສຸມ ແລະ ບັນລຸໄດ້ຕາມເປົ້າໝາຍໂດຍແຜນຜັງລວມ ສະບັບໃຫມ່ນີ້ໄດ້ກໍານົດໂຄງການບຸລິມະສິດທັງໝົດ 79 ໂຄງການ ປະ ກອບມີ 7 ແຜນງານ.
ຮຽບຮຽງຂ່າວ: ພຸດສະດີ