ພະຍາດໄຂ້ຍຸງລາຍ ເປັນພະຍາດໜຶ່ງ ທີ່ມີລັກສະນະຮ້າຍແຮງ ແລະ ອັນຕະລາຍ, ເຊິ່ງໃນປີນີ້ ພະຍາດດັ່ງກ່າວ ໄດ້ພາກຊີວິດຂອງຄົນທີ່ທ່ານຮັກໄປແລ້ວ 12 ຊີວິດ. ຂະນະດຽວກັນ, ຍອດຜູ້ຕິດເຊື້ອສູງເຖິງ 7.453 ຄົນ.
ທ່ານ ນາງ ລັດສະໝີ ຄຳຊາວ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ລາຍງານໃຫ້ຮູ້ໃນວັນທີ 26 ຕຸລາ 2020 ນີ້ວ່າ: ນັບຕັ້ງແຕ່ຕົ້ນເດືອນມັງກອນ ຫາ ວັນທີ 25 ຕຸລາ 2020 ມີຜູ້ຕິດເຊື່ອໄຂ້ຍຸງລາຍ 7.453 ຄົນ ແລະ ເສຍຊີວິດ 12 ຄົນ. ໃນນັ້ນ, ນະຄອນຫຼວງວຽງຈັນ ພົບຜູ້ຕິດເຊື້ອໄຂ້ຍຸງລາຍ ສູງອັນດັບໜຶ່ງ ຢືນຢັນຜູ້ຕິດເຊື້ອທັງໝົດ 1.702 ຄົນ, ບໍລິຄຳໄຊ 867 ຄົນ, ບໍ່ແກ້ວ 706 ຄົນ ແລະ ແຂວງວຽງຈັນ 695 ຄົນ. ສະເພາະໃນວັນທີ 21 ຕຸລາ 2020 ກະຊວງສາທາລະນະສຸກ ຢືນຢັນພົບຜູ້ຕິດເຊື້ອໄຂ້ຍຸງລາຍທັງໝົດ 9 ກໍລະນີ.
ເມື່ອຮູ້ດັ່ງນີ້ແລ້ວ ພວກເຮົາບໍ່ຄວນຖືເບົາໃນການປ້ອງກັນ ໂດຍການທຳລາຍ ແຫຼ່ງເພາະພັນຂອງໜອງນໍ້າຍຸງລາຍ. ພ້ອມນີ້, ກໍຕ້ອງໄດ້ເອົາໃຈໃສ່ເປັນພິເສດ ໃນການປ້ອງກັນຄົນໃນຄອບຄົວບໍ່ໃຫ້ຍຸງກັດ ດ້ວຍຫຼາຍວິທີ ເຊັ່ນ: ທາຢາກັນຍຸງ, ນອນໃນມຸ້ງ, ບໍ່ໄປສະຖານທີ່ສ່ຽງ ເຊັ່ນ: ພຸ້ມໄມ້, ຄອງລະບາຍນໍ້າ ຫາກມີອາການເປັນໄຂ້ ຄວນໄປພົບແພດ ເພື່ອຮັບປະກັນຄວາມປອດໄພຂອງທ່ານ ແລະ ຄົນທີ່ທ່ານຮັກ.
ຮຽບຮຽງຂ່າວ: ພຸດສະດີ