ວິທະຍຸກະຈາຍສຽງແຫ່ງຊາດລາວ ລາຍງານວ່າ ພະແນກຖະແຫຼງຂ່າວ, ວັດທະນະທໍາ ແລະ ທ່ອງ ທ່ຽວແຂວງຫຼວງພະບາງ ພວມຮ່ວມກັບບັນດາຂະແໜງການກ່ຽວຂ້ອງ ເລັ່ງຟື້ນຟູຫົວໜ່ວຍທຸລະກິດທ່ອງທ່ຽວພາຍໃນແຂວງທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ໃຫ້ຟື້ນໂຕໂດຍໄວ. ຂະນະດຽວກັນ ໄດ້ແນະນໍາໃຫ້ທຸກຫົວ ໜ່ວຍທຸລະກິດທ່ອງທ່ຽວປະຕິບັດໂຄງການຫຼຸດລາຄາແຕ່ຮັກສາກໍາໄລ ເພື່ອໃຫ້ສາມາດຢູ່ລອດໄດ້ຕໍ່ໄປ.
ທ່ານ ນາງ ສຸດາພອນ ຄົມທະວົງ, ຫົວໜ້າພະແນກ ຖວທ ແຂວງຫຼວງພະບາງ ໃຫ້ສໍາພາດວ່າ: ເພື່ອຊ່ວຍໃຫ້ຫົວໜ່ວຍທຸລະກິດທ່ອງທ່ຽວພາຍໃນແຂວງຟື້ນຕົວນັບມື້ດີຂຶ້ນ ພະແນກ ຖວທ ແຂວງ ໄດ້ຈັດກອງປະຊຸມປຶກສາຫາລືກັບສະມາຄົມໂຮງແຮມ, ເຮືອນພັກ ແລະ ຮ້ານອາຫານ ຈັດຕັ້ງປະຕິບັດກິດຈະກໍາເພື່ອສົ່ງເສີມການທ່ອງທ່ຽວ ເປັນຕົ້ນ, ໄດ້ຮ່ວມກັບລັດວິສາຫະກິດການບິນລາວຈັດກິດຈະກໍາ ສົ່ງ ເສີມການທ່ອງທ່ຽວຄື: ການຫຼຸດຄ່າປີ້ຍົນໄປ-ກັບ ແລະ ໃຫ້ພັກຢູ່ໂຮງແຮມ 2 ຄືນຢູ່ຫຼວງພະບາງ, ຈັດເທດສະການກາເຟລາວ ແລະ ກິດຈະກໍາໄຫລເຮືອໄຟໃນມື້ອອກພັນສາສໍາເລັດແລ້ວ, ສ່ວນໃນຕໍ່ໜ້າຈະຈັດອີກຫຼາຍກິດຈະກໍາ ເປັນຕົ້ນແມ່ນ ເທດສະການອາຫານລາວ, ການແຂ່ງ ຂັນຖີບລົດເພື່ອສຸຂະພາບ ແລະ ອື່ນໆ.
ທ່ານ ນາງ ສຸດາພອນ ຄົມທະວົງ ໃຫ້ຮູ້ຕື່ມວ່າ: ຄຽງຄູ່ກັບການຈັດກິດຈະກໍາຕ່າງໆ ທາງແຂວງໄດ້ແນະນໍາໃຫ້ຜູ້ປະກອບການທ່ອງທ່ຽວ ຫັນປ່ຽນວິທີດໍາເນີນກິດຈະການ ໂດຍແນໃສ່ນັກທ່ອງທ່ຽວພາຍໃນເປັນຕົ້ນຕໍ ດ້ວຍການປະຕິບັດໂຄງການຫຼຸດລາຄາແຕ່ຮັກສາກໍາໄລຄືການຫຼຸດລາຄາຄ່າບໍລິການເຊັ່ນ: ຄ່າທີ່ພັກ, ອາຫານ ແລະ ການບໍລິການອື່ນໆ ລົງຈາກລາຄາປົກກະຕິ ແຕ່ຍັງພໍໄດ້ກໍາໄລ ເພື່ອສົ່ງເສີມລາວທ່ຽວລາວ ແລະ ເຮັດໃຫ້ນັກທ່ອງທ່ຽວພາຍໃນສາມາດໃຊ້ການບໍລິການຕ່າງໆໄດ້. ຄຽງຄູ່ກັນນີ້ ໄດ້ແນະນໍາໃຫ້ບັນດາທຸລະກິດການທ່ອງທ່ຽວພາຍໃນແຂວງ ສືບຕໍ່ຈັດຕັ້ງປະຕິບັດມາດຕະການປ້ອງກັນພະຍາດໂຄວິດ-19 ຕາມທີ່ລັດຖະບານວາງອອກ ເປັນຕົ້ນ: ການຮັກສາໄລຍະຫ່າງ ແລະ ການປະກອບເຈວລ້າງມືຢູ່ບັນດາທີ່ພັກ ແລະ ຮ້ານອາຫານ, ໄປພ້ອມໆກັບການປັບປຸງສະຖານທີ່ທ່ອງທ່ຽວຄືນໃໝ່ເຊິ່ງໃນໄລຍະທີ່ປິດກິດຈະການຊົ່ວຄາວຍ້ອນການລະບາດຂອງພະຍາດໂຄວິດ-19 ທາງແຂວງໄດ້ປັບປຸງຫຼາຍຢ່າງຢູ່ຕາດກວາງຊີ ແລະ ທາດພູສີໃຫ້ດີຂຶ້ນ ແລະ ສວຍງາມກ່ວາເກົ່າ ເພື່ອດຶງດູດນັກທ່ອງທ່ຽວເຂົ້າມາທ່ຽວຊົມແຂວງຫຼວງພະບາງໃຫ້ນັບມື້ເພີ່ມຂຶ້ນ.
ນັບແຕ່ຕົ້ນປີ 2020 ມາຮອດປະຈຸບັນ ມີນັກທ່ອງທ່ຽວມາທ່ຽວແຂວງຫຼວງພະບາງ ພຽງແຕ່ 420.000 ກວ່າຄົນ ຫຼຸດຄາດໝາຍທີ່ວາງໄວ້ 64%. ຂະນະທີ່ປີ 2019 ມີນັກທ່ອງທ່ຽວເຂົ້າໄປທ່ອງທ່ຽວ 860.000 ກວ່າຄົນ.
ຮຽບຮຽງຂ່າວ: ພຸດສະດີ