ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ໄດ້ທຳລາຍປາມືກແຊ່ໂຊດາໄຟ ແລະ ມີສານຟໍມາລີນປົນເປື້ອນຖິ້ມໃນວັນທີ 2 ຕຸລາ 2020 ທີ່ຜ່ານມາຢູ່ສະໜາມບໍາບັດຂີ້ເຫຍື້ອ ຫຼັກ 32 ບ້ານນາຜາສຸກ, ເມືອງໄຊທານີ ເຊິ່ງໄດ້ກວດຢຶດຈາກແມ່ຄ້າຄົນໜຶ່ງ (ບໍ່ປະສົງອອກນາມ) ຢູ່ ສະຖານທີ່ປຸງແຕ່ງປາມຶກແຊ່ໂຊດາໄຟ ຢູ່ບ້ານນາງ່າ ເມືອງນາຊາຍທອງ ນະຄອນຫຼວງວຽງຈັນ ລວມນໍ້າໜັກ 560 ກິໂລ.
ໜັງສືພິມວຽງຈັນທາມ ລາຍງານວ່າ ຕາມການສອບຖາມແມ່ຄ້າດັ່ງກ່າວໄດ້ສາລະພາບວ່າ: ໄດ້ຊື້ປາມຶກດັ່ງກ່າວມາຈາກປະເທດເພື່ອນບ້ານ ໂດຍຂົນສົ່ງໃສ່ລົດເມ ມາລົງຄີວລົດ 13 ໃຕ້ ເພື່ອມາປຸງແຕ່ງເປັນປາມຶກແຊ່ໂຊດາໄຟ ເພື່ອນຳສົ່ງຂາຍໃຫ້ລູກຄ້າຢູ່ບັນດາຕະຫຼາດຕ່າງໆ.
ໃນການກວດຢຶດໃນຄັ້ງນີ້ ຍ້ອນວ່າ ປາມຶກດັ່ງກ່າວບໍ່ມີເອກະສານຢັ້ງຢືນແຫຼ່ງທີ່ມາເຊັ່ນ: ໃບແຈ້ງເສຍພາສີ ແລະ ໃບຢັ້ງຢືນສຸຂະນາໄມສັດ ນອກນັ້ນ ສະຖານທີ່ປຸງແຕ່ງປາມຶກແຊ່ໂຊດາໄຟ ແມ່ນບໍ່ມີອະນຸ ຍາດຈາກພາກສ່ວນທີ່ກ່ຽວ.
ສະນັ້ນ, ທາງເຈົ້າໜ້າທີ່ກວດກາການຄ້າ ພະແນກອຸດສາຫະກຳ ແລະ ການຄ້ານະຄອນຫຼວງວຽງຈັນ ຈຶ່ງໄດ້ເຮັດບົດບັນທຶກກັບແມ່ຄ້າຫ້າມເຮັດອີກ, ຢຶດເອົາປາມຶກແຊ່ໂຊດາ ແລະ ໄປທໍາລາຍຖີ້ມ ນອກນັ້ນສະເພາະສະຖານທີ່ປຸງແຕ່ງແມ່ນໃຫ້ຢຸດເຊົາ.
ຮຽບຮຽງຂ່າວ: ພຸດສະດີ