ໜັງສືພິມວຽງຈັນໃໝ່ ລາຍງານ ອີງຕາມຂໍ້ມູນຈາກສະຖານທູດຈີນ ໃຫ້ຮູ້ວ່າ: ແມ່ນ້ຳລ້ານຊ້າງ-ແມ່ນ້ຳຂອງໄຫຼຜ່ານຈີນ, ລາວ, ມຽນມາ, ໄທ, ກຳປູເຈຍ ແລະ ຫວຽດນາມ ເຊິ່ງຖືວ່າ ປະຊາຊົນ 6 ປະເທດດັ່ງກ່າວນີ້ ໄດ້ຮັບຜົນປະໂຫຍດຮ່ວມກັນ ແລະ ຮ່ວມຊາຕາກຳນຳກັນ, ຮ່ວມສ້າງວັດທະນະທຳ, ຮ່ວມສ້າງ ບ້ານເມືອງທີ່ດີງາມ, ຮ່ວມກັນສຸມກຳລັງເຂົ້າໃນການຕ້ານແລ້ງ-ຕ້ານຖ້ວມໃນພາກພື້ນ, ຮ່ວມຄວບຄຸມໄພພິບັດຈາກນ້ຳ, ຮ່ວມພັດທະນາໂຄງລ່າງພື້ນຖານຊັບພະຍາກອນນໍ້າ, ແກ້ໄຂອຸທົກກະໄພ ແລະ ອື່ນໆ ເຊິ່ງໄດ້ກາຍເປັນຫົວຂໍ້ສຳຄັນຂອງການຮ່ວມມືແມ່ ນ້ຳລ້ານຊ້າງ-ແມ່ນ້ຳຂອງ.
ໃນຊຸມປີຜ່ານມາ, ເນື່ອງຈາກໄດ້ຮັບຜົນກະທົບຈາກການປ່ຽນແປງຂອງດິນຟ້າອາກາດທົ່ວໂລກ, ໄພນ້ຳຖ້ວມ ແລະ ໄພແຫ້ງແລ້ງທີ່ເກີດຂຶ້ນຢູ່ພາກພື້ນແມ່ນ້ຳລ້ານຊ້າງ-ແມ່ນ້ຳຂອງໄດ້ຮຸນແຮງຂຶ້ນ ເຊິ່ງບັນດາປະເທດຢູ່ຕາມແມ່ນ້ຳລ້ານຊ້າງ-ແມ່ນ້ຳຂອງໄດ້ແບ່ງປັນຂໍ້ມູນຂ່າວສານ ແລະ ປະສານສົມທົບວາງແຜນນຳກັນເພື່ອຮ່ວມກັນຮັບມືກັບສິ່ງທ້າທາຍ. ໃນຕະຫຼອດໄລຍະ 18 ປີຜ່ານມາ, ຈີນໄດ້ສະໜອງຂໍ້ມູນອຸທົກກະສາດຂອງແມ່ນ້ຳລ້ານຊ້າງໃຫ້ແກ່ປະເທດຕ່າງໆຢູ່ລຸ່ມແມ່ນ້ຳຂອງ. ພາຍຫຼັງກົນໄກແມ່ນ້ຳລ້ານຊ້າງ-ແມ່ນ້ຳຂອງສ້າງຕັ້ງຂຶ້ນແລ້ວ, ການຮ່ວມມືດ້ານການພັດທະນາ, ນຳໃຊ້ ແລະ ການຄຸ້ມຄອງຊັບພະຍາກອນນ້ຳຍິ່ງມີວິທີການທີ່ດີ ແລະ ມີປະສິດທິຜົນຫຼາຍຢ່າງ ເຊິ່ງໄດ້ຮັບການຊົມເຊີຍໂດຍທົ່ວໄປຈາກບັນດາ ປະເທດສະມາ ຊິກໃນກົນໄກດັ່ງກ່າວ.
ໃນກອງປະຊຸມຜູ້ນຳຂອບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຄັ້ງທີ 3 ທີ່ຫາກໍ່ອັດ ລົງເມື່ອບໍ່ດົນມານີ້, ຈີນໄດ້ປະກາດວ່າເລີ່ມແຕ່ປີນີ້ເປັນຕົ້ນໄປຈະແບ່ງປັນຂໍ້ມູນອຸ ທົກກະສາດຂອງແມ່ນ້ຳລ້ານຊ້າງຕະຫຼອດປີໃຫ້ກັບບັນດາປະເທດລຸ່ມແມ່ນ້ຳຂອງ ແລະ ຮ່ວມກັບບັນດາຝ່າຍສ້າງເວທີແບ່ງປັນຂໍ້ມູນຂ່າວສານການຮ່ວມມືດ້ານຊັບພະຍາກອນນ້ຳຕາມແມ່ນ້ຳລ້ານຊ້າງ-ແມ່ນ້ຳຂອງ, ເລັ່ງລັດຊຸກຍູ້ການປະຕິບັດໂຄງການຕ່າງໆເຊັ່ນ: ຄວາມ, ປອດໄພຂອງເຂື່ອນ, ຄວາມປອດໄພຂອງນ້ຳດື່ມເປັນຕົ້ນ, ຍົກສູງຄວາມສາມາດບໍລິຫານລ້ອງແມ່ນ້ຳໂດຍ ສັງລວມ ແລະ ຄຸ້ມຄອງຊັບພະຍາກອນນ້ຳ.
ຮຽບຮຽງຂ່າວ: ພຸດສະດີ