ເວັບໄຊ bangkokbiznews ລາຍງານໂດຍອ້າງແຫຼ່ງຂ່າວຈາກສຳນັກຂ່າວຊິນຫົວວ່າ ອຸໂມງມິດຕະພາບທີ່ມີຄວາມຍາວ 9.59 ກິໂລແມັດ ເຊິ່ງເປັນອຸໂມງຂ້າມຊາຍແດນຂອງທາງລົດໄຟລາວ-ຈີນ ໂດຍໃນຝັ່ງຈີນ 7.17 ກິໂລແມັດ ແລະ ຝັ່ງລາວ 2.42 ກິໂລແມັດ ໄດ້ກໍ່ສ້າງສຳເລັດແລ້ວໃນວັນອາທິດທີ 13 ກັນຍາ 2020.
ທ່ານ ຫຼິວ ຈວິ້ນ ເສິງ ຈາກທາງລົດໄຟແຫ່ງປະເທດຈີນ ສາຂາຄຸນໝິງ (CR Kunming) ໜຶ່ງໃນຜູ້ຮັບຜິດຊອບການກໍ່ສ້າງທາງລົດໄຟ ລະບຸວ່າການກໍ່ສ້າງອຸໂມງແຫ່ງນີ້ຖືເປັນບາດກ້າວສຳຄັນຂອງການກໍ່ສ້າງທາງລົດໄຟລາວ-ຈີນ.
ສ່ວນການກໍ່ສ້າງອຸໂມງຕ່າງໆ ຂອງທາງລົດໄຟຊ່ວງ ອວີ້ຊີ-ໂມ໋ອັນ (Yuxi-Mohan) ເຊິ່ງເປັນສ່ວນທີ່ຢູ່ໃນຈີນໄດ້ສຳເລັດແລ້ວ 97.5% ໂດຍທ່ານ ຫຼິວ ໄດ້ກ່າວເສີມວ່າ ການວາງລາງ ແລະ ການກໍ່ສ້າງຖານນີເປັນໄປຕາມແຜນທີ່ວາງໄວ້.
ທາງລົດໄຟລາວ-ຈີນ ດຳເນີນການກໍ່ສ້າງໂດຍໃຊ້ມາດຕະຖານທາງເທັກນິກ ແລະ ອຸປະກອນຂອງຈີນ ມີໄລຍະທາງກວ່າ 1,000 ກິໂລແມັດ ແລ່ນຈາກນະຄອນຄຸນໝິງ ເມືອງເອກຂອງມົນທົນອວິ໋ນໜານ (ຍຸນນານ) ທາງຕະເວັນຕົກສຽງໃຕ້ຂອງຈີນເຖິງນະຄອນຫຼວງວຽງຈັນ ເມືອງຫຼວງຂອງ ສປປ ລາວ ເຊິ່ງມີກຳນົດສ້າງສຳເລັດ ແລະ ເປີດໃຫ້ບໍລິການໃນທ້າຍປີ 2021.
ຮຽບຮຽງຂ່າວ: ພຸດສະດີ