ເວັບໄຊຂ່າວ ລາວທຽນທາມ ລາຍງານໃຫ້ຮູ້ວ່າ ເຈົ້າໜ້າທີ່ຕຳຫຼວດກ່າວເມື່ອວັນອັງຄານທີ່ຜ່ານມາ ພົບຄົນລາວ 7 ຄົນຖືກຍິງເສຍຊີວິດໃນຟາມກັນຊາຜິດກົດໝາຍທີ່ເປີດໃຫ້ບໍລິການໃນຊົນນະບົດຂອງລັດແຄລິຟໍເນຍ.
ເຈົ້າໜ້າທີ່ຕຳຫຼວດອາເມລິກາພົບສົບຜູ້ເຄາະຮ້າຍ 6 ຄົນທີ່ຖືກຍິງເສຍຊີວິດໃນສະຖານທີ່ເກີດເຫດ ເຊິ່ງຄົນທີ 7 ແມ່ນເພດຍິງເສຍໄດ້ຊີວິດທີ່ໂຮງໝໍໃນເວລາຕໍ່ມາ.
ຕຳຫຼວດໄດ້ກ່າວວ່າ ມີປະຊາຊົນຫຼາຍກວ່າ 20 ຄົນ ອາໄສຢູ່ທີ່ພັກໃນ Aguanga ເຂດຊົນນະບົດຂອງລັດແຄລິຟໍເນຍ ເປັນທີ່ຢູ່ອາໄສຊົ່ວຄາວ. ເຮືອນກ້າເບ້ຍ ແລະ ຍານພາຫະນະຖືກໃຊ້ໃນການຜະລິດກັນຊາ.
ເຈົ້າໜ້າທີ່ໄດ້ຢຶດຢາບ້າຈຳນວນຫຼາຍກວ່າ 1,000ເມັດ ແລະ ຕົ້ນກັນຊາອີກຫຼາຍຮ້ອຍຕົ້ນ ເຊິ່ງມີມູນຄ່າສູງເຖິງ 5 ລ້ານໂດລາສະຫະລັດ. ກັນຊາກຳລັງຖືກນຳໄປແປຮູບເປັນນໍ້າມັນ, ນໍ້າເຜິ້ງ ເຊິ່ງເປັນສານເຂັ້ມຂຸ້ນທີ່ສະກັດເອົາສານເຄມີ THC ທີ່ມີສານເຄມີສູງຈາກກັນຊາ.
ຜູ້ເຄາະຮ້າຍທີ່ຖືກພົບເສຍຊີວິດທັງ 7 ຄົນ ແມ່ນຄົນລາວ ສຳລັບແຮງຈູງໃຈໃນການສັງຫານຄັ້ງນີ້ຍັງຢູ່ໃນຂັ້ນຕອນການສືບສວນ-ສອບສວນ ແລະ ໃນພື້ນທີ່ເກີດເຫດຍັງບໍ່ພົບຜູ້ຕ້ອງສົງໃສເທື່ອ.
FBI ໄດ້ຖືກຮຽກໃຫ້ເຂົ້າມາຊ່ວຍໃນການສືບສວນຄະດີນີ້ ເນື່ອງຈາກວ່າເຈົ້າໜ້າທີ່ເຊື່ອວ່າການປະຕິບັດງານດັ່ງກ່າວແມ່ນມີການພົວພັນກັບໜ່ວຍງານໃນລັດອື່ນໆ. ຍານພາຫະນະຈຳນວນໜຶ່ງທີ່ພົບເຫັນຢູ່ສະຖານທີ່ເກີດເຫດແມ່ນໄດ້ລົງທະບຽນຢູ່ນອກພື້ນທີ່ແຄລິຟໍເນຍ.
ຮຽບຮຽງຂ່າວ: ພຸດສະດີ