ການຈັດກິດຈະກໍາບໍລິຈາກເລືອດແມ່ນຫຼຸດລົງ ຍ້ອນໄດ້ຮັບຜົນກະທົບຈາກພະຍາດໂຄວິດ-19 ແຕ່ ຄວາມຕ້ອງການໃຊ້ເລືອດແມ່ນເພີ່ມຂຶ້ນ ແລະ ສາ ມາດສະໜອງໄດ້ພຽງແຕ່ 60.000 ຖົງຕໍ່ປີ ເຊິ່ງ ຄວາມຕ້ອງການແມ່ນ 80.000 ຖົງ/ປີ.
ຫົວໜ້າສູນເລືອດແຫ່ງຊາດອົງການກາແດງລາວ ທ່ານ ຈັນທະລາ ສຸກສາຄອນ ໄດ້ກ່າວຕໍ່ ທີມງານ ວຽງຈັນທາຍ ວ່າ: ບໍ່ມີປະເທດໃດໆທີ່ຈະມີເລືອດພຽງພໍກັບຄວາມຕ້ອງການໃນການປິ່ນປົວ ຄົນເຈັບ ເພາະວ່າຄວາມຕ້ອງການເລືອດໃນປະເທດ ໃດໜຶ່ງຈະເທົ່າກັບ 1% ຂອງປະຊາກອນ ໝາຍຄວາມວ່າຖ້າປະຊາກອນມີປະມານ 6 ລ້ານຄົນ ຄວາມຕ້ອງການເລືອດກໍ່ຈະປະມານ 60.000 ຖົງ (1 ຖົງ 350 ຊີຊີ). ສະເພາະຢູ່ ສປປ ລາວ ຄວາມຕ້ອງການໃຊ້ເລືອດກໍ່ມີສູງ ແຕ່ຖ້າທຽບກັບຄວາມຕ້ອງການແມ່ນຍັງບໍ່ພຽງພໍ ເຊິ່ງປະຊາກອນລາວຮອດປັດຈຸບັນນີ້ມີຫຼາຍກວ່າ 8 ລ້ານຄົນ ແຕ່ສາມາດຮັບບໍລິຈາກເລືອດຈາກສັງຄົມໄດ້ພຽງແຕ່ 60.000 ກວ່າຖົງເທົ່ານັ້ນ ເຊິ່ງທາງສູນເລືອດແຫ່ງຊາດກໍ່ໄດ້ມີການສະໜອງເລືອດໃຫ້ເພີ່ມຂຶ້ນ 5.000 ຖົງ/ປີ. ສະເພາະຄວາມຕ້ອງການໃຊ້ເລືອດຫຼາຍຢູ່ລາວແມ່ນຈະໃຊ້ກັບພະ ຍາດປ້າງກິນເລືອດ, ໜາກໄຂ່ຫຼັງຊຸດໂຊມ, ອຸປະຕິເຫດ, ການຜ່າຕັດ ແລະ ໄຂ້ເລືອດອອກ.
ທ່ານ ຈັນທະລາ ໄດ້ກ່າວຕື່ມວ່າ: ໃນວັນທີ 18 ກັນຍານີ້, ສູນເລືອດແຫ່ງຊາດກໍ່ຈະເຮັດກິດຈະກໍາບໍລິ ຈາກເລືອດຢູ່ສູນການຄ້າລາວໄອເຕັກ ນະຄອນຫຼວງວຽງຈັນ, ສ່ວນຫຼາຍແມ່ນຮັບບໍລິຈາກຈາກພະນັກ ງານ, ທະຫານ-ຕໍາຫລວດ, ພໍ່ແມ່ປະຊາຊົນ, ອ້າຍນ້ອງກໍາມະກອນ, ນັກຮຽນນັກສຶກສາ ແລະ ຈາກສະ ຖານທູດ ແລະ ນັກທ່ອງທ່ຽວ ເຊິ່ງຈະມີການຈັດກິດຈະກໍາບໍລິຈາກເລືອດຢູ່ຕາມສໍານັກງານ, ອົງການ ແລະ ໂຮງຮຽນຕ່າງໆເປັນປະຈໍາ. ການໃຊ້ເລືອດຢູ່ລາວເພີ່ມຂຶ້ນໃນແຕ່ລະປີຍ້ອນວ່າ ຢູ່ບັນດາໂຮງໝໍຕ່າງໆ ຢູ່ລາວມີການຜ່າຕັດຫຼາຍຂຶ້ນ, ປະຊາຊົນ ແລະ ຈໍານວນຄົນເຈັບກໍ່ເພີ່ມຂຶ້ນ.
ຮຽບຮຽງຂ່າວ: ພຸດສະດີ