ເພື່ອແນໃສ່ແກ້ໄຂປາກົດການຫຍໍ້ທໍ້ໃນຂົງເຂດວັດທະນະທຳ ແລະ ທ່ອງທ່ຽວ ໂດຍສະເພາະ ການຮັບຟັງຄໍາສະເໜີຂອງຜູ້ປະກອບການ ຫົວໜ່ວຍທຸລະກິດຮ້ານບັນເທີງ ຮ້ານອາຫານ ຄາຣາໂອເກະ ທີ່ໄດ້ຮັບຜົນກະທົບຈາກການແຜ່ລະບາດພະຍາດໂຄວິດ-19 ເພື່ອພ້ອມກັນຊອກຫາວິທີທາງອອກ ແລະ ແກ້ໄຂກ່ຽວກັບການເຄື່ອນໄຫວດຳເນີນກິດຈະການດັ່ງກ່າວໃຫ້ມີຄວາມຖືກຕ້ອງ ແລະ ສອດຄ່ອງຍິ່ງຂຶ້ນ. 

ອີງຕາມການລາຍງານ ຈາກໜັງສືພິມວຽງຈັນໃໝ່ ໃນວັນທີ 7 ກັນຍາ 2020ທີ່ຜ່ານມາວ່າ ພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ (ຖວທ ນວ) ໄດ້ຈັດກອງປະຊຸມປືກສາຫາລືກ່ຽວກັບການແກ້ໄຂປະກົດການຫຍໍ້ທໍ້ທາງດ້ານວັດທະນະທໍາ ແລະ ທ່ອງທຽວຂອງບັນດາທຸລະກິດບັນເທີງ-ຄາຣາໂອເກະ ຂຶ້ນວັນທີ 4 ກັນຍາ 2020.

ກອງປະຊຸມຄັ້ງນີ້ ໄດ້ຄົ້ນຄວ້າ ແລະ ປຶກສາຫາລືກັນກ່ຽວກັບການປະຕິບັດມະຕິຄຳສັ່ງຂອງຂັ້ນເທິງ ທີ່ກຳນົດໃຫ້ກິດຈະການບັນເທີງ ແລະ ຄາຣາໂອເກະ ຢຸດຕິການດຳເນີນທຸລະກິດຊົ່ວຄາວ ໃນສະພາບທີ່ຍັງມີການລະບາດຂອງພະຍາດໂຄວິດ-19 ໃນທົ່ວໂລກ ໂດຍໃຫ້ພາກລັດຊ່ວຍພິຈາລະນາກ່ຽວກັບເລື່ອງເວລາເປີດ-ປິດ ໂດຍສະເໜີໃຫ້ພິຈາລະນາຂໍເປີດຮ້ານອາຫານຮອດເວລາ 23:30 ໂມງ ສ່ວນບັນເທີງ ຄາຣາໂອເກະ ຮອດ 2 ໂມງເຊົ້າ ແຕ່ໃນເງື່ອນໄຂຕ້ອງຮັບປະກັນການປະຕິບັດມາດຕະການປ້ອງກັນພະຍາດໂຄວິດ-19 ຄວາມສະຫງົບ ປອດໄພ ແລະ ອື່ນໆ ເພື່ອເປັນການແກ້ໄຂສະພາບຄວາມຄ່ອງຕົວດ້ານລາຍຮັບ-ລາຍຈ່າຍຂອງພາກທຸລະກິດ ແລະ ຊ່ວຍແບ່ງເບົາຄ່າໃຊ້ຈ່າຍຂອງຜູ້ປະກອບການ ເປັນຕົ້ນ ຄ່າອາກອນ ຄ່ານໍ້າ ຄ່າໄຟ ແລະ ຄ່າຈ້າງພະນັກງານ ແລະ ອື່ນໆ.