ປ້ອງກັນຄວາມສະຫງົບ ນະຄອນຫຼວງວຽງຈັນ ລາຍງານ ໃນຕອນເຊົ້າຂອງວັນທີ 28 ສິງຫາ 2020, ເຈົ້າໜ້າທີ່ຕໍາຫຼວດຈະລາຈອນ ນະຄອນຫຼວງວຽງຈັນ ໄດ້ຈັດກອງປະຊຸມ ຜ່ານແຜນບັນຈຸກໍາລັງລົງລະບາຍລົດ ແລະ ແກ້ໄຂການສັນຈອນແອອັດ ຢູ່ນະຄອນຫຼວງວຽງຈັນ ໃນໄລຍະເປີດສົກຮຽນໃໝ່ປະຈໍາປີ 2020-2021 ໃນມໍ່ໆນີ້.
ພັທ ບຸນມາກ ສູນດາໄລ ຮອງຫົວໜ້າພະແນກຕໍາຫຼວດຈະລາຈອນ ນວ ໄດ້ໃຫ້ຮູ້ວ່າ: ການເປີດສົກຮຽນໃໝ່ໃນປີ 2020-2021 ນີ້, ເຈົ້າໜ້າທີ່ຕໍາຫຼວດຈະລາຈອນ ນວ ໄດ້ມີແຜນລະອຽດ ແລະ ພ້ອມກັນເຂັ້ມງວດໃນການຈັດຕັ້ງປະຕິບັດ. ໂດຍໄດ້ວາງກໍາລັງລົງປະຈໍາຈຸດ, ປ້ອມ, ໂຮງຮຽນ, ເສັ້ນທາງ, 3 ແຍກ, 4 ແຍກ ແລະ ວົງວຽນ ໃນຂອບເຂດທົ່ວນະຄອນຫຼວງວຽງຈັນ ມີທັງໝົດຈໍານວນ 114 ຈຸດ, 428 ສະຫາຍ ເພື່ອແກ້ໄຂການສັນຈອນແອອັດໃນການໄປ-ມາ ໂດຍສະເພາະນັກຮຽນ-ນັກສຶກສາ ໃຫ້ມີຄວາມສະດວກສະບາຍ, ຫຼີກລ່ຽງການເກີດບັນຫາອຸບັດຕິເຫດ ແລະ ເຮັດໃຫ້ການສັນຈອນມີຄວາມຄ່ອງຕົວດີຂຶ້ນ.
ໃນພິທີ, ພັທ ເພັງສະຫວັນ ທໍາມະບູນ ຫົວໜ້າພະແນກຕໍາຫຼວດຈະລາຈອນ ນະຄອນຫຼວງວຽງຈັນ ໄດ້ຮຽກຮ້ອງມາຍັງ ຜູ້ປົກຄອງທີ່ມາສົ່ງລູກຫຼານເຂົ້າໂຮງຮຽນ ຫ້າມບໍ່ໃຫ້ຈອດລົດຊະຊາຍຕາມແຄມທາງ ຫຼື ທາງຄົນຍ່າງ, ໃຫ້ໄປຈອດຕາມສະຖານທີ່ຂອງໂຮງຮຽນກຳນົດໃຫ້ ແລະ ບັນດາທ່ານຜູ້ໃຊ້ລົດ-ໃຊ້ຖະໜົນ ຕ້ອງເອົາໃຈໃສ່ປະຕິບັດຕາມກົດລະບຽບການສັນຈອນຢ່າງເຂັ້ມງວດ.
ຮຽບຮຽງຂ່າວ: ພຸດສະດີ