ສຳນັກຂ່າວ South China Morning Post ລາຍງານວ່າ ລັດຖະບານຈີນໄດ້ເຊີນນັກການທຸດຈາກ 10 ປະເທດໃນອາຊຽນ ມາປະຊຸມຮ່ວມກັນ ແລະ ຝ່າຍຈີນສະແດງຄວາມກັງວົນກ່ຽວກັບຄວາມສ່ຽງທີ່ຈະເກີດຄວາມຂັດແຍ້ງຢູ່ທະເລຈີນໃຕ້ ເຊິ່ງຈີນມີກໍລະນີຂັດແຍ້ງຮ່ວມກັບນານາປະເທດອາຊຽນ ແລະ ຕອນນີ້ອາເມລິກາຍັງປະກາດຈຸດຢືນໃນທະເລຈີນໃຕ້ຊັດເຈນຂຶ້ນ.

ໃນລະຫວ່າງການປະຊຸມທີ່ປັກກິ່ງເມື່ອເດືອນສິງຫາ ເຈົ້າໜ້າທີ່ຈີນເຊິ່ງຮັບຜິດຊອບກິດຈະການທາງທະເລ ແລະ ເຂດແດນສະແດງຄວາມກັງວົນວ່າໃນເວລານີ້ມີ “ຄວາມສ່ຽງສູງ” ຈາກກິດຈະກຳທາງທະຫານຂອງ “ປະເທດນອກພາກພື້ນ” ເຊິ່ງເປັນຄຳທີ່ຈີນມັກໃຊ້ເມື່ອເວົ້າເຖິງບົດບາດຂອງອາເມລິກາໃນອາຊຽນ.

ທາງລັດຖະບານຈີນຮຽກຮ້ອງໃຫ້ສະມາຊິກສະມາຄົມແຫ່ງຊາດອາຊຽນ ທຳງານຮ່ວມກັບລັດຖະບານຈີນເພື່ອກັບມາເຈລະຈາເລື່ອງແນວທາງປະຕິບັດ (code of conduct) ສຳລັບທະເລຈີນໃຕ້ໂດຍໄວທີ່ສຸດ ເພາະຈີນບໍ່ຕ້ອງການໃຫ້ມືທີສາມເຂົ້າມາຍາດຊິງໂອກາດນີ້ ຈາກປະເທດທີ່ບໍ່ໄດ້ເປັນສ່ວນໜຶ່ງຂອງການເຈລະຈາ.

ທັງນີ້, ແນວປະຕິບັດ ຫຼື code of conduct ເປັນສິ່ງທີ່ອາຊຽນກັບຈີນເຈລະຈາກັນມາຫຼາຍປີ ແລະ ບໍ່ມີຄວາມຄືບໜ້າ ເປັນທາງອອກສຳລັບທຸກຝ່າຍໃນການໃຊ້ທະເລຈີນໃຕ້ຮ່ວມກັນ.

ນັກການທູດຕ່າງໆ ຈາກອາຊຽນເຊື່ອວ່າການປະຊຸມດັ່ງກ່າວເນັ້ນຢໍ້າເຖິງຄວາມຕັ້ງໃຈຂອງຈີນທີ່ຈະໃຫ້ເພື່ອນບ້ານໃນອາຊຽນໃກ້ຊິດກັບຕົນຫຼາຍຂຶ້ນ ແລະ ຜັກດັນອາເມລິກາອອກໄປ.

ຮຽບຮຽງຂ່າວ: ພຸດສະດີ