ຮ່າງດໍາລັດວ່າດ້ວຍກອງທຶນຄຸ້ມຄອງໄພພິບັດ ໄດ້ຍົກຂຶ້ນມາພິຈາລະນາໃໝ່ ໂດຍເປັນປະທານ ຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ.
ໜັງສືພິມວຽງຈັນທາມ ລາຍງານວ່າ ທີ່ກອງປະຊຸມລັດຖະບານ ສະໄໝສາມັນປະຈຳເດືອນສິງຫາ 2020 ທີ່ໄດ້ຈັດຂຶ້ນເມື່ອບໍ່ດົນມານີ້ ຄະນະລັດຖະບານໄດ້ພິຈາລະນາ ແລະ ປຶກສາຫາລື ຮັບຮອງເອົາດໍາລັດ ວ່າດ້ວຍກອງທຶນຄຸ້ມຄອງໄພພິບັດ ເພື່ອກຳນົດຫຼັກການ, ລະບຽບການ ກ່ຽວກັບການຄຸ້ມຄອງ ແລະ ນໍາໃຊ້ກອງທຶນຄຸ້ມຄອງໄພພິບັດ ເພື່ອລະດົມທຶນ ແລະ ສະສົມທຶນຈາກພາຍໃນ ແລະ ຕ່າງປະເທດ ແນໃສ່ສະໜອງທຶນ ໃຫ້ແກ່ການຊ່ວຍເຫຼືອສຸກເສີນ, ການສ້ອມແປງໂຄງລ່າງພື້ນຖານທີ່ຈໍາເປັນ, ການຊອກຄົ້ນ, ຄົ້ນຫາ ແລະ ກູ້ໄພ ເຮັດໃຫ້ຊີວິດການເປັນຢູ່ຂອງຜູ້ປະສົບໄພພິບັດ ກັບຄືນສູ່ສະພາບປົກກະຕິ ຫຼື ດີຂຶ້ນກວ່າເກົ່າ.
ນອກນັ້ນ, ຄະນະລັດຖະບານ ຍັງໄດ້ມີການປຶກສາຫາລືກັນ ໃນການປັບປຸງຊື່ຂອງກອງທຶນ ເປັນ ດຳລັດວ່າດ້ວຍ ກອງທຶນໄພພິບັດ ແລະ ເຮັດເປັນກອງທຶນດຽວ ໂດຍມອບໃຫ້ພາກສ່ວນກ່ຽວຂ້ອງນໍາເອົາ ຮ່າງດຳລັດດັ່ງກ່າວໄປປັບປຸງເນື້ອໃນໃຫ້ຊັດ ເຈນເປັນຕົ້ນ ພາລະບົດບາດຂອງກອງທຶນ, ການລະດົມທຶນ, ແຫຼ່ງລາຍຮັບ ແລະ ການນໍາໃຊ້ກອງທຶນ, ການຄຸ້ມຄອງບໍລິຫານກອງທຶນ, ການເປີດບັນຊີການກວດສອບ, ລະບຽບການລາຍງານ ແລະ ການກວດກາກອງທຶນ.
ຮຽບຮຽງຂ່າວ: ພຸດສະດີ