ການເບິ່ງຢູທູບແລ້ວໄດ້ເງິນເປັນທຸລະກິດອອນໄລນ໌ຮູບແບບໜຶ່ງທີ່ມີລັກສະນະເປັນແບບທລະກິດລູກໂສ້ ຍ້ອນເງື່ອນໄຂທີ່ໃຫ້ຜູ້ສະໝັກເປັນສະມາຊິກຄົນທຳອິດ ສາມາດນຳລິ້ງຂອງຕົນໄປໃຊ້ສະໝັກໃຫ້ກັບຜູ້ອື່ນໄດ້ໃນຈຳນວນ 30 ຄົນ.
ວິທີການໄດ້ເງິນຈາກການເບິ່ງຢູທູບຄືຄົນທີ່ສະໝັກເປັນສະມາຊິກໄດ້ຈະເງິນຢູ່ 2 ຊ່ອງທາງຫຼັກຄື: 1. ໄດ້ເງິນຈາກທີ່ຕົວເອງເບິ່ງຢູທູບເອງ ແລະ 2. ໄດ້ຈາກສະມາຊິກເບິ່ງວິດີໂອໃນຢູ່ທູບ (ຄົນ/ຄັ້ງ/ວິດີໂອ) ໂດຍອີງຈາກຂໍ້ມູນເວັບໄຊ adrepay ວິດີໂອໜຶ່ງມີຄວາມຍາວປະມານ 10 ນາທີ ມູນຄ່າວິດີໂອນັ້ນ 0.03 ບາດ ໂດຍທ່ານຈະໄດ້ເງິນເພີ່ມຈາກສະມາຊິກຂອງທ່ານ 0.01ບາດ ຕໍ່ຄົນ/ຄລິບ/ວິດີໂອ.
ຜູ້ທີ່ສະໝັກຕ້ອງມີບັນຊີທະນາຄານບໍ່ວ່າຈະເປັນບັນຊີ Master Card, PayPal ຫຼື Western Union ເພື່ອຮັບເງິນເຂົ້າ ແຕ່ມີເງື່ອນໄຂກ່ອນທີ່ຈະສາມາດຖອນເງິນອອກມາໄດ້ແມ່ນຕ້ອງຈ່າຍເງິນໃຫ້ເວັບໄຊກ່ອນ 15 ໂດລາ.
ການສະສົມເງິນເຂົ້າໃນບັນຊີ ແຕ່ລະເວັບມູນຄ່າຂອງວິດີໂອຈະໃຫ້ແຕກຕ່າງກັນອອກໄປ ພ້ອມກັບເງື່ອນໄຂການຊໍາລະເງິນ ແລະ ເງື່ອນໄຂອື່ນໆ ກໍ່ຕ່າງກັນອອກໄປ. ເຊິ່ງທຸລະກິດອອນໄລນ໌ໃນຮູບແບບນີ້ມັນເລີ່ມມີມາຕັ້ງແຕ່ປີ 2010 ໃນຕ່າງປະເທດ ແຕ່ສຳລັບປະເທດລາວແມ່ນຫາກໍ່ເລີ່ມມີກະແສເມື່ອຕົ້ນເດືອນ ສິງຫາ ເປັນຕົ້ນມາ.
ປັດຈບັນ, ໄດ້ມີຫຼາຍຄົນທີ່ລອງສະໝັກ ແລະ ເຮັດການເບິ່ງຢູທູບເພື່ອສະສົມເງິນ, ໂດຍມີຫຼາຍຄົນອອກມາກ່າວເຕືອນດ້ວຍຄວາມຫວັງດີ ເນື່ອງຈາກວ່າພວກເຂົາເຫຼົ່ານັ້ນລອງເຮັດແລ້ວ ກໍ່ເສຍເງິນ 15 ໂດລາ ໄປລ້າໆ ເມື່ອສົ່ງຂໍ້ຄວາມໄປທວງຖາມເລື່ອງເງິນ ບາງຄົນກໍ່ຖືກປິດບັນຊີໄປເລີຍກໍ່ມີ.
ເພາະທຸລະກິດໃນຮູບແບບນີ້ມັນສາມາດຫຼອກລໍ້ຜູ້ຄົນມາຕິດກັບໄດ້ງ່າຍ ເນື່ອງຈາກທີ່ຮູ້ກັນດີວ່າທຸກວັນນີ້ ຢູທູບ ຄືໂຊຊຽວມີເດຍໃຫຍ່ທີ່ສຸດໃນໂລກທີ່ລວມສູນຄວາມບັນເທີງ ແລະ ຄວາມຮູ້ ເປັນທີ່ນິຍົມທົ່ວ ໂລກ ປົກກະຕິຄົນເຮົາກໍ່ເຂົ້າເບິ່ງຢູທູບກັນຢູ່ແລ້ວ ແຕ່ຖ້າເບິ່ງແລ້ວໄດ້ເງິນພ້ອມມັນແຮງກະຕຸ້ນຄວາມຕ້ອງການຂອງຄົນໄດ້ຢ່າງຕອບໂຈດ ຈ່ຶງເຮັດໃຫ້ເກີດມີກຸ່ມມິດສາຊີບສ້າງບັນຊີປອມ, ເອກະສານປອມ, ເວັບໄຊປອມ ແລະ ອື່ນໆຂຶ້ນມາ ເພື່ອຕົ້ມຕຸນ ເຮັດໃຫ້ມີຫຼາຍຄົນຕົກເປັນເຫຍື່ອໂດຍປະລິຍາຍ. ສະນັ້ນ, ກ່ອນຈະຕັດສິນໃຈສະໝັກຕ້ອງສຶກສາຂໍ້ມູນໃຫ້ດີກ່ອນ, ສຶກສາຄວາມໜ້າເຊື່ອຖື ແລະ ວິເຄາະຄວາມເປັນໄປໄດ້ໃຫ້ລະອຽດຖີ່ຖ້ວນກ່ອນຕັດສິນໃຈ. ສຳລັບຄົນທີ່ໄດ້ເງິນຈາກການເບິ່ງຢູທູບກໍ່ຍິນດີນຳ ແຕ່ສຳລັບຜູ້ທີ່ບໍ່ໄດ້ກໍ່ຖືວ່າເປັນບົດຮຽນຊີວິດ.
ບົດໂດຍ: ພຸດສະດີ