ສຳນັກຂ່າວສານປະເທດລາວ ໃຫ້ຮູ້ວ່າ ນັບແຕ່ວັນທີ 1 ມັງກອນ 2020 ຫາ 17 ສິງຫາ 2020, ມີຜູ້ຕິດເຊື້ອໄຂ້ເລືອດອອກ ສະສົມທັງໝົດ 5.093 ຄົນ, ມີການລາຍງານການຕິດເຊື້ອສະສົມ ຫຼາຍກວ່າໝູ່ແມ່ນນະຄອນຫຼວງວຽງຈັນ 1.187ຄົນ, ຖັດລົງມາແມ່ນ ແຂວງວຽງຈັນ 570 ຄົນ ແລະ ບໍລິຄຳໄຊ 599 ຄົນ.
ທ່ານ ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ຖະແຫຼງຂ່າວໃນວັນທີ 18 ສິງຫາ ນີ້ໃຫ້ຮູ້ວ່າ: ສະພາບການລະບາດຂອງພະຍາດໄຂ້ຍຸງລາຍ ຢູ່ໃນປະ ເທດເຮົາ ສະເພາະໃນວັນທີ 17 ສິງຫາ 2020 ມີຜູ້ຕິດເຊື້ອທັງໝົດ 69 ຄົນ (ບໍ່ມີຜູ້ເສຍຊີວິດ). ນັບແຕ່ວັນທີ 1 ມັງກອນ ຫາ 17 ສິງຫາ 2020 ມີຜູ້ຕິດເຊື້ອກໍລະນີສະສົມທັງໝົດ 5.093ຄົນ (ມີລາຍງານກໍ ລະນີຕິດເຊື້ອໃນ 18 ແຂວງ, ແຂວງທີ່ມີການລາຍງານຫຼາຍກວ່າໝູ່ແມ່ນນະຄອນຫຼວງວຽງຈັນ ມີ 1.187ຄົນ, ຖັດລົງມາແມ່ນແຂວງວຽງຈັນ 570 ຄົນ ແລະ ບໍລິຄຳໄຊ 599 ຄົນ). ຈຳນວນຜູ້ເສຍຊີວິດຍ້ອນພະຍາດໄຂ້ຍຸງລາຍມີທັງໝົດ 9 ຄົນ, ໃນນັ້ນ ນະຄອນຫຼວງ 4 ຄົນ, ບໍລິຄຳໄຊ 2 ຄົນ, ຄຳມ່ວນ 1 ຄົນ, ໄຊຍະບູລີ 1 ຄົນ ແລະ ຊຽງຂວາງ 1 ຄົນ.
ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ຮຽກຮ້ອງໃຫ້ພໍ່ແມ່ປະຊາຊົນ, ຊຸມຊົນ ແລະ ອຳນາດການປົກຄອງ ຮ່ວມແຮງຮ່ວມໃຈກັນໃນການປ້ອງກັນບໍ່ໃຫ້ຍຸງກັດ ແລະ ທຳລາຍແຫຼ່ງແຜ່ພັນຂອງຍຸງເປັນປະຈຳທຸກໆອາທິດ, ຖືເປັນໜ້າທີ່ ແລະ ຄວາມຮັບຜິດຊອບຂອງໝົດທຸກຄົນ.
ຮຽບຮຽງຂ່າວ: ພຸດສະດີ