ຫຼັງຈາກທີ່ ທຣໍ້າ ກຽມສັ່ງຫ້າມ “WeChat” ແລະ “TikTok” ໃນອີກ 45 ວັນ ທາງ “WeChat” ກໍ່ໄດ້ອອກມາເປີດເຜີຍຕົວເລກວ່າພວກເຂົາເກືອບບໍ່ໄດ້ຮັບຜົນກະທົບໃດໆເລີຍ.
ເມື່ອວັນທີ 13 ສິງຫາ 2020 ສຳນັກຂ່າວ BBC ລາຍງານວ່າ ບໍລິສັດເທນເຊນ (Tencent) ບໍລິສັດວິດີໂອເກມຍັກໃຫຍ່ ແລະ ເປັນເຈົ້າຂອງແອັຟພຣິເຄຊັ່ນ (WeChat) ໄດ້ອອກມາເປີດເຜີຍລາຍຮັບໃນໄຕມາດທີ 2 ວ່າ ບໍລິສັດມີລາຍຮັບເພີ່ມຂຶ້ນ 37% ໂດຍທາງເທນເຊນໄດ້ກ່າວວ່າ ທີ່ ທ່ານ ໂດນັລ ທຣໍ້າ ລົງ ນາມ ເມື່ອອາທິດທີ່ຜ່ານມາ ພວກເຂົາບໍ່ເຫັນຜົນກະທົບທີ່ເກີດຂຶ້ນກັບທຸລະກິດຂອງພວກເຂົາໃນປະ ເທດຈີນ ເນື່ອງຈາກຜູ້ໃຊ້ໃນປະເທດ ສ.ອາເມລິກາ ມີພຽງ 2% ຂອງຜູ້ໃຊ້ກວ່າພັນລ້ານຄົນ.
ທັງນີ້, ຫຼາຍຝ່າຍໄດ້ສະແດງຄວາມກັງວົນວ່າຜູ້ທີ່ຈະໄດ້ຮັບຜົນກະທົບຈາກຄຳສັ່ງຄັ້ງນີ້ອາດຈະບໍ່ແມ່ນທາງ ວີແຊດ ແຕ່ເປັນບໍລິສັດ ແອັບເປິລ ທີ່ມີຕະຫຼາດໃຫຍ່ໃນຈີນ ແລະ ຫາກຊາວຈີນຫັນໄປຊື້ໂທລະສັບລຸ້ນອື່ນແທນ ໂດຍຈາກການຄຳນວນຂອງສຳນັກຂ່າວບລູມເບຣິກ ຄາດເດົາວ່າຕະຫຼາດຈີນສ້າງລາຍຮັບໃຫ້ກັບແອັບເປິລກວ່າ 44,000 ລ້ານໂດລາຕໍ່ປີ.
ຮຽບຮຽງຂ່າວ: ພຸດສະດີ