ເວັບໄຊຂ່າວ ລາວທຽນທາມ ລາຍງານໃຫ້ຮູ້ວ່າ ລັດຖະບານໄທກຽມຮັບເອົາແຮງງານຈາກລາວ, ກຳປູເຈຍ, ແລະ ມຽນມາກັບເຂົ້າປະເທດ ໃນຂະນະທີ່ປະເທດກຳລັງດຳເນີນການເຂົ້າສູ່ໄລຍະທີ 7 ຂອງການຜ່ອນຄາຍມາດຕະການປ້ອງກັນໂຄວິດ-19.
ໃນອາທິດທີ່ຜ່ານມາມີຄົນອົບພະຍົບຫຼາຍຮ້ອຍຄົນຖືກຈັບໃນຂໍ້ຫາພະຍາຍາມຂ້າມເຂົ້າໄປໃນປະເທດຢ່າງຜິດກົດໝາຍ ປະເທດໄທຈະອະນຸຍາດໃຫ້ແຮງງານເຄື່ອນຍ້າຍຈາກສາມປະເທດເຂົ້າມາໃນອານາຈັກ ແລະ ເຮັດວຽກພາຍໃຕ້ລະບຽບການຄວບຄຸມພະຍາດຢ່າງເຂັ້ມງວດ ຜູ້ທີ່ໄດ້ຮັບອະນຸຍາດເດີນທາງເຂົ້າໄທແມ່ນຕ້ອງໄດ້ກັກກັນຕົວເອງເປັນເວລາ 14 ວັນ, ມີໃບຢັ້ງຢືນສຸຂະພາບ ແລະ ຂັ້ນຕອນການຕິດຕາມອື່ນໆ.
ອີງຕາມການປະກາດຫຼ້າສຸດຂອງ CAAT ໃນວັນທີ 23 ກໍລະກົດທີ່ຜ່ານມາ ລັດຖະບານຂອງປະເທດໄທໄດ້ອອກອະນຸຍາດໃຫ້ຄົນ 4 ປະເພດທີ່ສາມາດເດີນທາງເຂົ້າປະເທດໄດ້ຄື: 1) ຄົນຕ່າງປະເທດທີ່ເຂົ້າຮ່ວມງານວາງສະແດງສິນຄ້າຢູ່ປະເທດໄທ, 2) ນັກສາຍຮູບເງົາຕ່າງປະເທດທີ່ເຂົ້າມາຖ່າຍທຳຢູ່ໄທ, 3) ແຮງງານຕ່າງປະເທດຈາກກຳປູເຈຍ, ລາວ, ແລະມຽນມາ ສຳລັບອຸດສະຫະກຳອາຫານ ແລະ ການກໍ່ສ້າງ, 4) ນັກທ່ອງທ່ຽວຕ່າງປະເທດເພື່ອການແພດ ແລະ ການບໍລິການດ້ານສຸຂະພາບ.
ປະເທດໄທໄດ້ວາງແຜນເປີດ 3 ໄລຍະ, ເຊິ່ງຊ່ວຍໃຫ້ນັກທ່ອງທ່ຽວທຸລະກິດ ແລະ ພະນັກງານທີ່ມີຄວາມຊຳນິຊຳນານໃນໄລຍະທີ ໜຶ່ງ, ນັກທ່ອງທ່ຽວດ້ານການແພດໃນໄລຍະສອງ ແລະ ນັກທ່ອງທ່ຽວທົ່ວໄປໃນໄລຍະສາມ.
ຮຽບຮຽງຂ່າວ: ພຸດສະດີ