Homeຂ່າວທ້ອງຖິ່ນຍິງໄວ 32ປີ ຕົ້ມຕຸນເດັກຊາຍ 13ປີ ເພື່ອເຂົ້າ 4 ເປົາ ບໍ່ແມ່ນການລັກພາຕົວ

ຍິງໄວ 32ປີ ຕົ້ມຕຸນເດັກຊາຍ 13ປີ ເພື່ອເຂົ້າ 4 ເປົາ ບໍ່ແມ່ນການລັກພາຕົວ

Published on

ອີງຕາມການລາຍງານຂ່າວຈາກ ປກສ ນະຄອນຫຼວງ ໃຫ້ຮູ້ວ່າ ຕໍ່ກັບເຫດການເດັກນ້ອຍຖືກລັກພາຕົວ ໃນວັນທີ 23 ກໍລະກົດ 2020, ເວລາ 10:00 ໂມງ ແລະ ຕໍ່ມາເວລາ 11 ໂມງ ແມ່ນພົບເຫັນຜູ້ກ່ຽວຊື່ ທ້າວ ວົງພະຈັນ ຫຼື ຕິກຕຸກ ອາຍຸ 13 ປີ ນັກຮຽນ ຢູ່ບ້ານເມືອງນ້ອຍ ເມືອງໄຊເສດຖາ ນະຄອນຫຼວງວຽງຈັນ ນັ້ນບໍ່ແມ່ນເປັນການລັກພາຕົວເດັກ, ແຕ່ເປັນການຕົ້ມຕຸນຫຼອກລວງເອົາເຂົ້າສານຈໍານວນ 4 ເປົາ; ເຊິ່ງຜູ້ກໍ່ເຫດແມ່ນ ນາງຄໍາຫຼ້າ ອາຍຸ 32 ປີ ວ່າງງານ ຢູ່ບ້ານນາດີ ເມືອງສິງ ແຂວງຫຼວງນໍ້າທາ; ປັດຈຸບັນ ພັກເຊົາຢູ່ເຮືອນພັກ ບ້ານໜອງໜ້ຽວ ເມືອງສີໂຄດຕະບອງ ນະຄອນຫຼວງວຽງຈັນ.

ພາຍຫຼັງໄດ້ຮັບແຈ້ງເຫດ ເຈົ້າໜ້າທີ່ພະແນກຕໍາຫຼວດສືບຂ່າວອາຍາ ປກສ ນະຄອນຫຼວງວຽງຈັນ, ຈຶ່ງໄດ້ສົມທົບກັບໜ່ວຍງານວິຊາສະເພາະກິດ ປກສ ເມືອງໄຊເສດຖາ ແລະ ອໍານາດການປົກຄອງ ບ້ານເມືອງນ້ອຍ, ໄດ້ນໍາຕົວຜູ້ກ່ຽວໄປໃຫ້ຂໍ້ມູນ ຢູ່ຫ້ອງການບ້ານເມືອງນ້ອຍ ເມືອງໄຊເສດຖາ ນະຄອນຫຼວງວຽງຈັນ ຈຶ່ງຮູ້ໄດ້ວ່າ: ໃນມື້ເກີດເຫດໄດ້ມີຍິງຄົນໜື່ງ ອາຍຸປະມານ 30-35 ປີ, ຂີ່ລົດເກງ, ສີດໍາ ບໍ່ຕິດປ້າຍທະບຽນ ມາຊື້ເຂົ້າສານນໍາ ຈໍານວນ 4 ເປົາ ແລະ ໄດ້ໃຫ້ຕົນຂຶ້ນລົດນໍາ ເພື່ອໄປຊ່ວຍຍົກເຂົ້າສານລົງຈາກລົດ ແລ້ວຈຶງຈະຈ່າຍເງິນຄ່າເຂົ້າສານໃຫ້. ຕົນຈຶ່ງໄດ້ຂຶ້ນລົດໄປນໍາຜູ້ກ່ຽວ, ແຕ່ພໍໄປຮອດທາງຮ່ອມຂ້າງສູນກາງຊາວໜຸ່ມ ບ້ານໂພນທັນ ເມືອງໄຊເສດຖາ, ຍິງຄົນດັ່ງກ່າວໄດ້ບອກໃຫ້ຕົນລົງຈາກລົດຢູ່ນັ້ນລໍຖ້າແລ້ວຈະມາຮັບ. ແຕ່ເວລາຜ່ານໄປໄດ້ປະມານ 1 ຊົ່ວ ໂມງ ກໍບໍ່ເຫັນຜູ້ກ່ຽວມາຮັບຕາມທີ່ເວົ້າ, ຕົນຈຶ່ງໄດ້ຍ່າງກັບ ໃນລະຫວ່າງທາງ ກໍພົບເຫັນໝູ່ຄົນບ້ານດຽວກັນຂີ່ລົດຈັກກາຍມາພໍດີ, ຈຶ່ງຂໍຊ້ອນທ້າຍກັບເຮືອນນໍາ.

ພາຍຫຼັງເຈົ້າໜ້າທີ່ໄດ້ຮັບຂໍ້ມູນຄືແນວນັ້ນ ເຈົ້າໜ້າທີ່ກໍຮີບຮ້ອນຕິດຕາມສືບຫາຜູ້ກໍ່ເຫດ ໂດຍສົມທົບກັບພື້ນຖານ ແລະ ເພື່ອນຮ່ວມງານ ຊ່ວຍກັນຕິດຕາມລົດຄັນເປົ້າໝາຍ, ຈຶ່ງສາມາດຮູ້ໄດ້ວ່າ: ລົດຄັນດັ່ງກ່າວແມ່ນຈອດ ຢູ່ເຮືອນພັກແຫ່ງໜື່ງ ເຂດບ້ານໜອງໜ້ຽວ ເມືອງສີໂຄດຕະບອງ. ດັ່ງນັ້ນ, ເຈົ້າໜ້າທີ່ຈຶ່ງໄດ້ຂໍເຂົ້າກວດຫ້ອງນອນບ່ອນຜູ້ກ່ຽວພັກ ແລະ ເຫັນວ່າຂໍ້ມູນກົງກັບ ທ້າວ ວົງພະຈັນ (ຜູ້ຖືກຕົວະໃຫ້ຂຶ້ນລົດໄປນໍາ) ລາຍງານ, ຈຶ່ງໄດ້ກັກຕົວຜູ້ກ່ຽວໄວ້; ພ້ອມທັງເຮັດບົດບັນທຶກລາຍງານ ສາມາດຮູ້ໄດ້ວ່າ: ຜູ້ກ່ຽວ ຊື່ນາງ ຄໍາຫຼ້າ ຫຼື ວັນ ອາຍຸ 32 ປີ ວ່າງງານ ຢູ່ບ້ານນາດີ ເມືອງສິງ ແຂວງຫຼວງນໍ້າທາ ປັດຈຸບັນພັກເຊົາ ຢູ່ເຮືອນ ພັກບ້ານໜອງໜ້ຽວ ເມືອງສີໂຄດຕະບອງ ນະຄອນຫຼວງວຽງຈັນ; ເຊິ່ງຜູ້ກ່ຽວໄດ້ໃຫ້ການຍອມຮັບສາລະພາບວ່າ: ໃນວັນທີ 23 ກໍລະກົດ 2020, ເວລາ 10:00 ໂມງ ຕົນໄດ້ໃຊ້ລົດເກງຂອງຕົນ ໄປຊື້ເຂົ້າສານ ຈໍານວນ 4 ເປົາ ຢູ່ຮ້ານຂາຍເຂົ້າແຄມທາງບ້ານເມືອງນ້ອຍ ເມືອງໄຊເສດຖາ ແລ້ວໃຫ້ເດັກທັງ 2 ຄົນທີ່ຂາຍເຂົ້າຊ່ວຍຫາມເປົາເຂົ້າຂຶ້ນລົດ. ຈາກນັ້ນ ກໍໄດ້ຂໍຢືມໂທລະສັບຂອງເດັກຜູ້ຍິງໂທຫາແມ່ຂອງເດັກໂດຍໄດ້ລົມກັນລັກສະນະຄືວ່າຮູ້ຈັກກັນມາກ່ອນ ແລ້ວກໍບອກໃຫ້ເດັກຜູ້ຊາຍຂຶ້ນລົດໄປນໍາ ເພື່ອຫາມເປົາເຂົ້າລົງຈາກລົດ. ເມື່ອຂີ່ໄປຮອດທາງຮ່ອມຂ້າງສູນກາງຊາວໜຸ່ມກໍໄດ້ຈອດໃຫ້ເດັກລົງຖ້າຢູ່ບ່ອນນັ້ນ ແລ້ວຕົນກໍຂັບລົດໜີໄປທາງສີໄຄ ພໍຮອດເຂດບ້ານໜອງໜ້ຽວ, ຈຶ່ງໄດ້ໂທລະສັບໃຫ້ຊາຍຄົນໜື່ງມາຮັບເອົາເຂົ້າສານນໍາຕົນ ເພື່ອໄປຂາຍໃຫ້ກໍາມະກອນຢູ່ສວນກ້ວຍ ເມືອງຫິນເຫີບ ແຂວງວຽງຈັນ. ຫຼັງຈາກນັ້ນ ຫຼັງຈາກສົ່ງເຂົ້າສານໃຫ້ຊາຍຄົນດັ່ງກ່າວແລ້ວກໍເຂົ້າໄປບ່ອນພັກ ພໍຮອດເວລາ 20:00 ໂມງ ຈຶ່ງຖືກເຈົ້າໜ້າທີ່ກັກຕົວໄດ້.

 

ຮຽບຮຽງຂ່າວ: ພຸດສະດີ

ບົດຄວາມຫຼ້າສຸດ

ລັດຖະມົນຕີ ຍທຂ ລົງຕິດຕາມ ການກໍ່ສ້າງ ແລະ ສ້ອມແປງເສັ້ນທາງ ຢູ່ແຂວງໄຊຍະບູລີ ຢູ່ 4 ເມືອງໃຕ້ ແລະ ເສັ້ນທາງໄປຊາຍແດນລາວ-ໄທ, ໄຊຍະບູລີ-ເລີຍໂຄງການກໍ່ສ້າງຕ້ານເຈື່ອນຢູ່ນໍ້າເຫືອງ ເມືອງແກ່ນທ້າວ ແລະ ເມືອງບໍ່ແຕນ

ໃນວັນທີ 11 ພຶດສະພາ 2026 ທີ່ຫ້ອງວ່າການແຂວງ ໄຊຍະບູລີ ທ່ານ ເພັງນິລັນ ຄໍາພັນເພັງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ປະທານສະພາປະຊາຊົນ ໄຊຍະບູລີ ພ້ອມດ້ວຍຄະນະ...

ສັ່ງປະຫານຊີວິດ ຈີນໄດ້ຕັດສິນປະຫານຊີວິດ ອະດີດລັດຖະມົນຕີ ກະຊວງປ້ອງກັນປະເທດ 2 ຄົນ ໃນຂໍ້ຫາສໍ້ລາດບັງຫຼວງ ແຕ່ໄດ້ໂຈະໂທດໄວ້ 2 ປີ ຖ້າບໍ່ກະທຳຜິດຕື່ມ ຈະປ່ຽນເປັນຈຳຄຸກຕະຫຼອດຊີວິດ

ວັນທີ 7 ພຶດສະພາ 2026 ທີ່ຜ່ານມາ ສຳນັກຂ່າວປະເທດຈີນລາຍງານວ່າ ອະດີດລັດຖະມົນຕີກະຊວງປ້ອງກັນປະເທດຈີນ 2 ຄົນຄື ລີ ຊາງຟູ (Li Shangfu) ແລະ...

ເປີດລົງທະບຽນເຂົ້າຮ່ວມພັນທະກິດທາງເສດຖະກິດຂອງກຸ່ມປະເທດ ທີ່ໃຊ້ພາສາຝຣັ່ງປະຈຳອາຟຣິກາຕາເວັນອອກໃນວັນທີ 6-8 ຕຸລາ 2026 ທີ່ປະເທດຈິບູຕີ

ຫຼັງຈາກຜົນສຳເລັດຂອງການຈັດງານຫົກຄັ້ງຢູ່ທີ່ພາກພື້ນທີ່ໃຊ້ພາສາຝຣັ່ງໃນເຂດຕ່າງໆ, ອົງການສາກົນຂອງກຸ່ມປະເທດທີ່ໃຊ້ພາສາຝຣັ່ງ (OIF) ຍັງສືບຕໍ່ມຸ່ງໝັ້ນສ້າງຄວາມສາມັກຄີ ແລະ ຄວາມທະເຍີທະຍານທາງເສດຖະກິດຂອງກຸ່ມປະເທດທີ່ໃຊ້ພາສາຝຣັ່ງໂດຍຮ່ວມມືກັບອຳນາດການປົກຄອງຂອງຈິບູຕີຈັດຕັ້ງພັນທະກິດທາງເສດຖະກິດຂອງກຸ່ມປະເທດທີ່ໃຊ້ພາສາຝຣັ່ງຄັ້ງຕໍ່ໄປໃນວັນທີ 6 ຫາ 8 ຕຸລາ 2026 ທີ່ປະເທດຈິບູຕີ. ໂຄງການລິເລີ່ມນີ້ເປັນສ່ວນໜຶ່ງໃນຄວາມພະຍາຍາມສົ່ງເສີມການແລກປ່ຽນທາງການຄ້າລະຫວ່າງບັນດາປະເທດສະມາຊິກ ແລະ ລັດຖະບານ...

ສຶກສາຄວາມເປັນໄປໄດ້ເສັ້ນທາງລົດໄຟ ແຕ່ຄໍາມ່ວນ-ຈໍາປາສັກ-ຊາຍແດນລາວ-ກຳປູເຈຍ ແລະ ເຊື່ອມຕໍ່ໄປພະນົມເປັນ ນະຄອນໂຮ່ຈິມິນ ແລະ ບາງກອກ

ທ່ານ ສອນໄຊ ສີພັນດອນ ກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ ໄດ້ເປັນກຽດໂອ້ລົມຕໍ່ກອງປະຊຸມວຽກງານ ໂຍທາທິການ ແລະ ຂົນສົ່ງ (ຍທຂ) ທົ່ວປະເທດ...