ເວັບໄຊຂ່າວ thairath ລາຍງານວ່າ ຄວາມສຳພັນຈີນ-ອາເມລິກາຖົດຖອຍລົງໄປເລື່ອຍໆ ເພາະຄວາມຂັດແຍ້ງຫຼາຍຢ່າງ ທັງເລື່ອງສົງຄາມການຄ້າ, ການແຜ່ລະບາດຂອງໂຄວິດ-19 ທີ່ອາເມລິກາກ່າວຫາຈີນ, ການແຜ່ຂະຫຍາຍອິດທິພົນຂອງຈີນໃນທະເລຈີນໃຕ້ ການລະເມີດສິດທິມະນຸດໃນພາກພື້ນຊິນຈຽງ ແລະ ການທີ່ຈີນບັງຄັບໃຊ້ກົດໝາຍຄວາມໝັ້ນຄົງສະບັບໃໝ່ໃນຮົງກົງ.
ຫຼັງຈາກວັນທີ 24 ກໍລະກົດ ທີ່ຜ່ານມາ ລັດຖະບານຈີນສັ່ງໃຫ້ອາເມລິກາປິດສະຖານກົງສູນໃຫຍ່ໃນເມືອງເສິນຕູ ມົນທົນເສສວນ ພາຍໃນ 72 ຊົ່ວໂມງ ຫຼື ວັນທີ 17 ກໍລະກົດ ໂດຍກ່າວຫາວ່າທີມງານສະຖານກົງສູນບາງຄົນແຊກແຊງກິດຈະການພາຍໃນ ເປັນໄພຄຸກຄາມຕໍ່ຄວາມໝັ້ນຄົງ ແລະ ຜົນປະໂຫຍດຂອງຈີນ ທັງນີ້, ເພື່ອຕອບໂຕ້ກັບທີ່ອາເມລິກາສັ່ງປິດສະຖານກົງສູນຈີນໃນເມືອງຮຸສຕັນ ລັດເທັກຊັສ ພາຍໃນ 72ຊົ່ວໂມງ ຫຼື ໃນວັນທີ່ 24 ກໍລະກົດ ໂດຍທາງອາເມລິກາໄດ້ກ່າວຫາວ່າ ຈີນລັກເອົາຂໍ້ມູນລັບຂອງບໍລິສັດອາເມລິກາ, ພະຍາຍາມລັກການວິໄຈທາງການແພດ ລວມເຖິງການວິໄຈວັກຊີນປ້ອງກັນຄວິດ-19.
ຫຼ້າສຸດ, ກະຊວງການຕ່າງປະເທດຈີນຖະແຫຼງການວ່າ ເຈົ້າໜ້າທີ່ຈີນໄດ້ເຂົ້າຢຶດສະຖານກົງສູນອາເມລິກາໃນເສິນຕູຮຽບຮ້ອຍແລ້ວ. ທາງດ້ານໂຄສົກກະຊວງການຕ່າງປະເທດອາເມລິກາໄດ້ສົ່ງອີເມລເຖິງສື່ ໂດຍລະບຸວ່າ ອາເມລິກາຜິດຫວັງທີ່ຈີນສັ່ງປິດສະຖານກົງສູນອາເມລິກາທີ່ເສິນຕູ ເຊິ່ງປັດຈຸບັນ, ທີມງານສະຖານກົງສູນປະມານ 200 ຄົນ ລວມເຖິງລູກຈ້າງຊາວຈີນປະມານ 150 ຄົນ ຖືກອົບພະຍົບໄປໝົດແລ້ວ.
ຮຽບຮຽງຂ່າວ: ພຸດສະດີ