ໜັງສືພິມວຽງຈັນທາມ ລາຍງານວ່າ ການກໍ່ສ້າງເຮືອນຖາວອນໃຫ້ປະຊາຊົນຜູ້ປະສົບໄພພິບັດຈາກສັນເຂື່ອນເຊປຽນ-ເຊນ້ຳນ້ອຍແຕກຢູ່ເມືອງສະໜາມໄຊ ແຂວງອັດຕະປື, ມາຮອດປະຈຸບັນນີ້ສຳເລັດແລ້ວ ປະມານ 30-40%, ເຊິ່ງມີທັງໝົດ 811 ຫລັງ. ປະຊາຊົນຜູ້ປະສົບໄພດັ່ງກ່າວຫຼາຍກ່ວາ 10.000 ຄົນຍັງອາໄສຢູ່ສູນພັກພິງຊົ່ວຄາວເພື່ອລໍຖ້າເຮືອນຫຼັງໃໝ່.
ອໍານາດການປົກຄອງເມືອງສະໜາມໄຊ ແຂວງອັດຕະປື ແຈ້ງໃຫ້ຮູ້ເມື່ອບໍ່ດົນມານີ້ວ່າ: ການຈັດສັນ ແລະ ກໍ່ສ້າງທີ່ຢູ່ອາໄສໃຫ້ພໍ່ ແມ່ປະຊາຊົນ ແມ່ນພວມດໍາເນີນການກໍ່ສ້າງເຮືອນ 811 ຫລັງໃຫ້ປະຊາຊົນ 5 ບ້ານ ແລະ 1 ຄຸ້ມ, ໂດຍແບ່ງອອກເປັນ 4 ຈຸດ ຫລື 4 ບ້ານຈັດສັນໃໝ່ ຄື: ບ້ານດົງບາກໃໝ່ຫິນຄໍາ, ບ້ານດອນບົກ, ບ້ານຕາມໍຢອດ ແລະ ບ້ານທ່າແສງຈັນ, ເຊິ່ງການກໍ່ສ້າງຖືວ່າຊ້າຫຼາຍກໍ່ເນື່ອງມາຈາກຫຼາຍປັດໄຈໂດຍສະເພາະເກີດຈາກປະຊາຊົນຜູ້ປະສົບໄພຈໍານວນໜຶ່ງ ເປັນຕົ້ນແມ່ນເຂົາບໍ່ມັກແບບເຮືອນ, ເຊິ່ງຜູ້ໜຶ່ງມັກແບບໜຶ່ງ ຜູ້ໜຶ່ງພັດມັກອີກແບບໜຶ່ງ, ຜູ້ເຄີຍມີເຮືອນນ້ອຍພັດຢາກໄດ້ຫຼັງໃຫຍ່ ຜູ້ທີ່ເຄີຍມີເຮືອນໃຫຍ່ ພັດຢາກໄດ້ຫຼັງທີ່ໃຫຍ່ກວ່າເກົ່າ ເລີຍເຮັດໃຫ້ມີຄວາມຫຍຸ້ງຍາກ ແລະ ແກ່ຍາວເວລາໃນການປຸກສ້າງອອກໄປ ເພາະວ່າທຸກຢ່າງຕ້ອງເຮັດໃຫ້ສົມເຫດສົມຜົນ ແລະ ມີຄວາມເໝາະສົມທີ່ສຸດ.
ສໍາລັບການຟື້ນຟູພື້ນຖານໂຄງລ່າງ ຢູ່ເມືອງສະໜາມໄຊ ແມ່ນສໍາເລັດໂດຍພື້ນຖານແລ້ວ ໂດຍສະເພາະ ແມ່ນການສ້ອມແປງທາງ ແລະ ຂົວ ແມ່ນສໍາເລັດ ສາມາດໄປມາສະດວກ, ສ່ວນການສ້ອມແປງຄອງຊົນລະປະທານ ພວມເລັ່ງສ້ອມແປງຄືນ ຄາດວ່າຈະສຳເລັດໃນໄວໆນີ້, ສ່ວນການບຸກເບີກເນື້ອທີ່ການຜະລິດໃຫ້ປະຊາຊົນ ມາຮອດປັດຈຸບັນ ສາມາດບຸກເບີກເນື້ອທີ່ ເພື່ອໃຫ້ປະຊາຊົນປູກມັນຕົ້ນ ໄດ້ທັງໝົດ 2.140 ເຮັກຕາ, ໃນນີ້ໄດ້ບຸກເບີກ ຢູ່ 4 ຈຸດຄື: ຈຸດ ບ້ານຕາມໍຢອດ, ຈຸດ ບ້ານດົງບາກ, ຈຸດ ບ້ານດອນບົກ ແລະ ຈຸດ ບ້ານປິນດົງ.
ຮຽບຮຽງຂ່າວ: ພຸດສະດີ