ສຳນັກຂ່າວສານປະເທດລາວ ລາຍງານວ່າ ໃນຕອນທຽ່ງຂອງວັນທີ 27 ກໍລະກົດ 2020 ການນຳພັກ-ລັດ, ພ້ອມດ້ວຍປະຊາຊົນ ແລະຊາວໝຸ່ມ ແຂວງບໍລີຄຳໄຊ, ນຳພາໂດຍ ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ເປັນກຽດຕ້ອນຮັບຂະບວນແຫ່ຮູບຫຼໍ່ຂອງພຣະຈົ້າໄຊຍະເຊດຖາທິຣາດ ມະຫາຣາດ, ພ້ອມດ້ວຍຊ້າງ ແລະ ພະພຸດທະຮູບ ຢູ່ເທສະບານເມືອງປາກຊັນ ເພື່ອມຸ່ງໜ້າໄປສູ່ຈຸດທີ່ພັກ ຢູ່ໂຮງແຮມ ສຸນັນທາ. ຖືວ່າເປັນແຂວງທຳອິດທີ່ຂະບວນໄດ້ມາແວ່ພັກຄ້າງຄືນເພື່ອສະເຫຼີມສະຫຼອງຄົບງັນ ແລະ ເຮັດພິທີທາງສາສະໜາ.
ສຳລັບໃນຕອນຄ່ຳໄດ້ມີພິທີສູດປະລິຕະມຸງຄຸນ, ຟັງທຳມະເທສະໜາ ເສີມບຸນປາລະມີຈາກພະສົງ 16 ອົງ, ພ້ອມທັງເປີດໂອກາດໃຫ້ມວນຊົນເຂົ້າກາບໄຫວ້ສັກກະລະບູຊາ ແລະ ໂມທະນາທານຕາມສັດທາ. ສ່ວນໃນຕອນ ເຊົ້າຂອງວັນທີ 28 ກໍລະກົດ 2020 ຈະມີພິທີໃສ່ບາດແດ່ພຣະສົງ ສາມະເນນ ເພື່ອອຸທິດບຸນກຸສົນເຖີງພະເຈົ້າໄຊຍະເຊດຖາທິຣາດ ມະຫາຣາດ ກ່ອນຈະເຄື່ອນຍ້າຍໄປສູ່ ແຂວງຄຳມ່ວນ.
ຮຽບຮຽງຂ່າວ: ພຸດສະດີ