news.ch7 ລາຍງານເມື່ອວັນທີ 13 ກໍລະກົດວ່າ ລັດຖະບານຈີນເລັ່ງແກ້ໄຂບັນຫາລະດັບນໍ້າໃນອ່າງເກັບນໍ້າຫຼັກ ຕາມສາຍສາຂາແມ່ນໍ້າແຍງຊີ (Yangtze) ເພື່ອຊ່ວຍໃຫ້ຫຼາຍພາກພື້ນໃນພາກກາງຮັບມືກັບໄພນໍ້າຖ້ວມ ທີ່ເກີດຈາກຝົນທີ່ຕົກລົງມາຢ່າງໜັກໃນຫຼາຍວັນໃນຊ່ວງຕົ້ນເດືອນທີ່ຜ່ານມາ ມີລະດັບນໍ້າໄຫຼເຂົ້າອ່າງເກັບນໍ້າສູງເຖິງ 30,000 ແມັດກ້ອນຕໍ່ວິນາທີ ໃນຂະນະທີ່ກົມອຸຕຸນິຍົມ ແລະ ອຸທົກກະສາດຄາດການວ່າ 10 ວັນ ຕໍ່ໜ້ານີ້ຈະມີປະລິມານນໍ້າເພີ່ມສູງຂຶ້ນເຖິງ 150 ມິລລີແມັດ ນອກຈາກນີ້ຍັງຄາດການວ່າລະດັບນໍ້າໃນທະເລສາບ ໄທ່ຫູ ຈະເກີນລະດັບຄວາມປອດໄພ ໃນຊ່ວງລະຫວ່າງວັນທີ 15-16 ກໍລະກົດນີ້ ເຊິ່ງອາດສົ່ງຜົນໃຫ້ນໍ້າຖ້ວມໜັກ.

ກະຊວງຊັບພະຍາກອນນໍ້າຂອງຈີນລະບຸວ່າ ລະດັບນໍ້າທັງໝົດ 433 ສາຍ ເພີ່ມສູງກວ່າລະດັບຄວາມປອດໄພ ມາຕັ້ງແຕ່ເດືອນມິຖຸນາທີ່ຜ່ານມາ ສົ່ງຜົນກະທົບກັບປະຊາຊົນ 38 ລ້ານຄົນ ໃນ 27 ມົນທົນ ລວມເຖິງເຂດປົກຄອງຕົນເອງ ແລະ ເຂດເທດສະບານເມືອງ ມີຜູ້ເສຍຊີວິດ 141 ຄົນ ບ້ານເຮືອນປະຊາຊົນພັງຖະລົ່ມເສຍຫາຍ 28,000 ຫຼັງ, ຄວາມເສຍຫາຍທາງເສດຖະກິດ 6 ໝື່ນລ້ານຢວນ ແລະ ແມ່ນໍ້າ 200 ສາຍ ມີລະດັບນໍ້າລົ້ມຕາຝັ່ງສົ່ງຜົນໃຫ້ເກີດນໍ້າຖ້ວມໜັກໃນພື້ນທີ່ໃກ້ຄຽງ.

ປັດຈຸບັນ, ມີເຂື່ອນຈຳນວນ 4 ແຫ່ງ ທີ່ຕ້ອງເລັ່ງລະບາຍນໍ້າສຸກເສີນ ລວມທັງຍັງມີອ່າງເກັບນໍາຈຳນວນ 200 ແຫ່ງ ທີ່ມີລະດັບນໍ້າສູງເກີນກວ່າລະດັບທີ່ສາມາດກັກເກັບໄວ້ໄດ້.

ຮຽບຮຽງຂ່າວ: ພຸດສະດີ