ວິທະຍຸກະຈາຍສຽງແຫ່ງຊາດ ລາຍງານເມື່ອວັນທີ 6 ກໍລະກົດ 2020 ຕາມຂ່າວຈາກ lao people’s Armynews ໃຫ້ຮູ້ວ່າ: ໃນວັນທີ 2 ກໍລະກົດ ທີ່ຜ່ານມາ ໂຄງການສື່ສານຮັບໃຊ້ການນຳ ແລະ ພາກລັດບໍລິຫານ ກົມໃຫຍ່ເສນາທິການກອງທັບໄດ້ຈັດພິທີມອບ-ຮັບໂຄງການກໍ່ສ້າງ-ສ້ອມແປງ ສູນບັນຊາ ແລະ ສະໜາມບິນຍົນບໍ່ມີຄົນຂັບ (Drone) ລະຫວ່າງ ບໍລິສັດ ແອວຊີຂາເຂົ້າ-ຂາອອກ ຈຳກັດ ຜູ້ດຽວກັບ ໂຄງການສື່ສານ ຮັບໃຊ້ການນຳ ແລະ ພາກລັດບໍລິຫານ ໂດຍການເຂົ້າຮ່ວມເປັນປະທານຂອງ ພົນໂທ ສຸວອນ ເລືອງບຸນມີ ກຳມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບ, ມີ ພົນຈັດຕະວາ ຄຳຄິດ ໄຊສົງຄາມ ຫົວໜ້າກົມສື່ສານ ກົມໃຫຍ່ເສນາທິການກອງທັບ, ປະທານສະພາບໍລິຫານບໍລິສັດສະກາຍໂທລະຄົມ, ມີສະຫາຍ ກິນ້ອຍ ວິວົງພັນ ປະທານບໍລິສັດແອວຊີຂາເຂົ້າ-ຂາອອກຈຳກັດຜູ້ດຽວ ພ້ອມດ້ວຍ ພະນັກງານວິຊາການກ່ຽວຂ້ອງເຂົ້າຮ່ວມ.
ໂຄງການດັ່ງກ່າວໄດ້ມີການ ເຊັນສັນຍາ ໄດ້ເລີ່ມລົງມືກໍ່ສ້າງ ໃນວັນທີ 27 ພະຈິກ 2019 ຫາ ວັນທີ 30 ເມສາ 2020 (ກຳນົດ ເວລາ 06 ເດືອນ) ລວມມູນຄ່າການກໍ່ສ້າງທັງໝົດ 46.704 ໂດລາ.
ໃນພິທີສະຫາຍ ກິນ້ອຍ ວິວົງພັນ ປະທານບໍລິສັດແອວຊີ ຂາເຂົ້າ ຂາອອກຈໍາກັດຜູ້ດຽວ ໄດ້ຂຶ້ນຜ່ານ ບົດລາຍງານຫຍໍ້ກ່ຽວກັບໂຄງການກໍ່ສ້າງດັ່ງກ່າວ ເຊິ່ງໂຄງການກໍ່ສ້າງສູນບັນຊາການ ແລະ ສະໜາມບິນຍົນບໍ່ມີຄົນຂັບແມ່ນໂຄງການໜຶ່ງທີ່ມີຄວາມສຳຄັນຢ່າງຍິ່ງ ທີ່ນອນຢູ່ໃນແຜນຍຸດທະສາດ ການພັດທະນາຂອງກອງທັບໃຫ້ມີຄວາມເຂັ້ມແຂງ ແລະ ທັນສະໄໝຂຶ້ນເທື່ອລະກ້າວ ຮັບປະກັນວຽກງານສູ້ຮົບມີໄຊ. ດັ່ງນັ້ນ, ໂຄງການນີ້ແມ່ນສ່ວນໜຶ່ງຈະໄດ້ນຳໃຊ້ເຂົ້າໃນການເຝິກອົບຮົມຕົວຈິງໃນການຕິດຕໍ່ສື່ສານ ແລະ ບັງຄັບບັນຊາດ້ວຍຍົນບໍ່ມີຄົນຂັບໃຫ້ພະນັກງານຜູ້ນຳໃຊ້ສາມາດຮຽນຮູ້ ແລະ ປະຕິບັດໜ້າທີ່ຢ່າງຊຳນານໃນການຕິດຕໍ່ສື່ສານ, ບັງຄັບບັນຊາການບິນຍົນບໍ່ມີຄົນຂັບໃຫ້ໄປຕາມຈຸດປະສົງ, ເປົ້າໝາຍ, ໂດຍສະເພາະແມ່ນໃນຍາມໄພພິບັດຈາກທຳມະຊາດ ແລະ ພາວະເພີ່ມທະວີເພື່ອຊອກຄົ້ນ ແລະ ສືບຂ່າວຫາເປົ້າໝາຍ ເຊັ່ນ: ຈຸດພິກັດ GPS ຂອງວັດຖຸເທິງແຜນທີ່, ສະຖານີວິທະຍຸໃນພາກພື້ນດິນ, ຖ່າຍຮູບຄົງທີ່ ແລະ ບັນທຶກວີດີໂອ ທັງກາງເວັນ, ກາງ ຄືນໂດຍຜູ້ບັງຄັບການບິນສາມາດຮັບຮູ້ ແລະ ເຫັນສະພາບການເຄື່ອນໄຫວຕົວຈິງຢູ່ໃນພາກສະໜາມ ເພື່ອລາຍງານໃຫ້ຂັ້ນເທິງ, ເພື່ອສ້າງຄວາມຕັດສິນໃຈ. ດັ່ງນັ້ນໂຄງການນີ້ແມ່ນມີຄວາມຈຳເປັນ ແລະ ທັນສະໄໝພ້ອມທັງເປັນ ວຽກງານອັນໃໝ່ທີ່ມີຄວາມທ້າທາຍຕອບສະໜອງໄດ້ກັບຄວາມຮຽກຮ້ອງຕ້ອງການໃນສະເພາະໜ້າ ແລະ ສອດຄ່ອງກັບສະພາບການຕົວຈິງໃນປັດຈຸບັນ.
ຮຽບຮຽງຂ່າວ: ພຸດສະດີ