ໜັງສືພິມວຽງຈັນທາມ ລາຍງານໃຫ້ຮູ້ວ່າ ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ລາຍງານຕໍ່ສະມາຊິກສະພາແຫ່ງຊາດ ຢູ່ ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ VIII ທີ່ໄດ້ໄຂຂື້ນຢ່າງເປັນທາງການມື້ເຊົ້ານີ້ ກ່ຽວກັບສະພາບການແກ້ໄຂໜີ້ສິນຂອງໂຄງການລົງທຶນຂອງລັດ ແລະ ບັນຍາກາດການລົງທຶນພາກເອກະຊົນພາຍໃນ ແລະ ຕ່າງປະເທດ ວ່າ: ການແກ້ໄຂໜີ້ສິນໂຄງການລົງທຶນຂອງລັດສະເພາະ 6 ເດືອນຕົ້ນປີ 2020 ໄດ້ເອົາໃຈໃສ່ແກ້ໄຂໜີ້ສິນບັນດາໂຄງການທີ່ໄດ້ຈັດຕັ້ງປະຕິບັດ ສໍາເລັດ 100% ແລະ ເປັນໂຄງການທີ່ເປັນໜີ້ຄ້າງຈ່າຍມາດົນແລ້ວ ໂດຍນໍາໃຊ້ຫຼາຍແຫຼ່ງທຶນ ແລະ ຫຼາຍຮູບແບບ ເປັນຕົ້ນທຶນປົກກະຕິ, ທຶນບ້ວງສະເພາະ, ແກ້ໄຂໜີ້ 3 ແຈ ແລະ ພັນທະບັດ. ສໍາລັບ 6 ເດືອນທ້າຍປີ, ລັດຖະບານ ຍັງຈະສືບຕໍ່ຄົ້ນຄວ້າແກ້ໄຂໜີ້ສິນໃນຮູບແບບອວ່າຍ 3 ແຈ ແລະ ອອກພັນທະບັດຈໍານວນໜຶ່ງ ເພື່ອສ້າງສະພາບຄ່ອງຕໍ່ການດໍາເນີນທຸລະກິດ ແລະ ການພັດທະນາ ເພື່ອຟື້ນຟູເສດຖະກິດທີ່ໄດ້ຮັບຜົນກະທົບຈາກການລະບາດ ຂອງພະຍາດ ໂຄວິດ-19.
ສະເພາະການລົງທຶນຂອງພາກເອກະຊົນພາຍໃນ ແລະ ຕ່າງປະເທດ ຍັງສືບຕໍ່ດໍາເນີນໄປພາຍໃຕ້ນະໂຍບາຍ ແລະ ມາດຕະການປ້ອງກັນພະຍາດໂຄວິດ-19. ຮອດທ້າຍເດືອນ 5 ປີ 2020 ປະຕິບັດໄດ້ 750 ລ້ານໂດລາສະຫະລັດ ຫຼື ເທົ່າກັບ 7.125 ຕື້ກີບ (ແຜນການ 23.125 ຕື້ກີບ).
ປັດຈຸບັນ ບັນດາໂຄງການລົງທຶນໃຫຍ່ ເປັນຕົ້ນ ໂຄງການທາງລົດໄຟ ລາວ-ຈີນ ມີຄວາມຄືບໜ້າ 89,45%, ໂຄງການກໍ່ສ້າງທາງດ່ວນນະຄອນຫຼວງວຽງຈັນ-ວັງວຽງ ມີຄວາມຄືບໜ້າ 71%. ນອກນັ້ນ, ຍັງມີບັນດາໂຄງການຕ່າງໆ ທີ່ຍັງຢູ່ໃນໄລຍະສຶກສາຄວາມເປັນໄປໄດ້ ເຊັ່ນ: ໂຄງການກໍ່ສ້າງ ທາງດ່ວນວຽງຈັນ-ຮ່າໂນ້ຍ, ທາງດ່ວນວຽງຈັນ-ປາກເຊ, ທາງດ່ວນເລກ 1 ແລະ ອື່ນໆ.
ຮຽບຮຽງຂ່າວ: ພຸດສະດີ