ເວັບໄຊ sanook ລາຍງານວ່າ ນະຄອນປັກກິ່ງປະກາດຍົກລະດັບເຕືອນໄພສຸກເສີນເພື່ອຮັບມືກັບການແຜ່ລະບາດຂອງໄວຣັສໂຄວິດ-19 ຈາກລະດັບ 3 ເຂົ້າສູ່ລະດັບ 2 ພ້ອມທັງປະກາດວ່າປະຊາຊົນທຸກຄົນທີ່ຈະເດີນທາງອອກຈາກປັກກິ່ງຈະຕ້ອງໄດ້ຮັບການກວດເຊື້ອໂຄວິດກ່ອນ ຫຼັງຈາກພົບຜູ້ຕິດເຊື້ອລາຍໃໝ່ເພີ່ມຂຶ້ນ ແລະ ແຜ່ລະບາດໄປທີ່ມົນທົນໃກ້ຄຽງ.
ນອກຈາກນີ້, ທາງເທດສະບານນະຄອນປັກກິ່ງໄດ້ສັ່ງປິດໂຮງຮຽນທຸກແຫ່ງ ແລະ ຍັງສັ່ງໃຫ້ລົດແທັກຊີ ແລະ ບໍລິການຮຽກລົດໂດຍສານຂັບຢູ່ແຕ່ພາຍໃນຕົວເມືອງ ເພື່ອປ້ອງກັນ ແລະ ຄວບຄຸມການລະບາດຫຼັງພົບຜູ້ຕິດເຊື້ອແບບກຸ່ມກ້ອນເມື່ອບໍ່ເທົ່າໃດມື້ທີ່ຜ່ານມາ.
ທັງນີ້, ຄະນະກຳມະການສຸຂະພາບເທດສະບານນະຄອນປັກກິ່ງລາຍງານວ່າ ຕັ້ງແຕ່ວັນທີ 11-15 ມິຖຸນາ ປັກກິ່ງໄດ້ກວດພົບຜູ້ປ່ວຍຕິດເຊື້ອໂຄວິດ-19 ໃນປະເທດເພີ່ມ 106 ຄົນ ໂດຍຜູ້ຕິດເຊື້ອກຸ່ມນີ້ມີຄວາມເຊື່ອມໂຍງກັບຕະຫຼາດຊິນຟານຕີ້ ເຊິ່ງເປັນຕະຫຼາດຂາຍສົ່ງຜັກ, ໝາກໄມ້ ແລະ ເນື້ອສັດທີ່ມີຂະໜາດໃຫຍ່ທີ່ສຸດໃນເຂດເຟິງໄຖ ຂອງປັກກິ່ງ.
ຮຽບຮຽງຂ່າວ: ພຸດສະດີ