ນັບວ່າເປັນຂ່າວດີທີ່ສຸດໃນໄລຍະ ເກືອບ 2 ເດືອນ ທີ່ ສປປ ລາວ ບໍ່ມີຜູ້ຕິດເຊື້ອໂຄວິດ-19 ເພີ່ມ, ຍິ່ງໄປກວ່ານັ້ນ ຂ່າວດີສໍາລັບມື້ນີ້ ນອກຈາກຈະປອດເຊື້ອເຊັ່ນເຄີຍແລ້ວ ຜູ້ຕິດເຊື້ອໂຄວິດ-19 ພຽງຄົນດຽວທີ່ຍັງປິ່ນປົວຢູ່ໂຮງໝໍນັ້ນ ມື້ນີ້ 9 ມິຖຸນາ 2020 ຜູ້ກ່ຽວໄດ້ອອກໂຮງໝໍແລ້ວ.
ອີງຕາມຂໍ້ມູນຈາກ ສູນຂ່າວສານດ້ານການແພດສຸຂະສຶກສາ Centre of Information and Education for Healthໄດ້ອອກມາເປີດເຜີຍຂໍ້ມູນຄົນເຈັບຜູ້ຕິດເຊື້ອໂຄວິດ-19 ໄດ້ອອກໂຮງໝໍເພີ່ມອີກ 1 ຄົນ ວ່າ: ຊົມເຊີຍຜົນສຳເລັດຄັ້ງຍິ່ງໃຫຍ່ຂອງ ສປປ ລາວ ທີ່ປິ່ນປົວຄົນຕິດເຊື້ອພະຍາດໂຄວິດ-19 ໄດ້ສຳເລັດໝົດແລ້ວ, ໂດຍຜູ້ທີ່ອອກໂຮງໝໍຄົນຫຼ້າສຸດແມ່ນ ກໍລະນີທີ 8 ເພດຊາຍ ອາຍຸ 18 ປີ ບ້ານ ດອນນົກຂຸ້ມ ເມືອງ ສີສັດຕະນາກ ນະຄອນຫລວງວຽງຈັນ ທີ່ເຂົ້າປິ່ນປົວຢູ່ໂຮງໝໍມິດຕະພາບ ວັນທີ 28 ມີນາ 2020 ໄດ້ປິ່ນປົວຫາຍດີ ແລະ ໄດ້ອອກໂຮງໝໍໃນມື້ນີ້ 9 ມິຖຸນາ 2020 ເຊິ່ງເປັນຄົນສຸດທ້າຍ.
ຮຽບຮຽງຂ່າວ: ພຸດສະດີ