ເວັບໄຊຂ່າວ dailynews ລາຍງານເມື່ອວັນທີ 25 ພຶດສະພາວ່າ ກະຊວງການຕ່າງປະເທດຂອງກຳປູເຈຍອອກຖະແຫຼງການເມື່ອວັນຈັນວ່າ ກອງປະຊຸມອາຊຽນ-ເອີຣົບ (ອາເຊັມ) ຄັ້ງທີ 13 ທີ່ກຳປູເຈຍໄດ້ຮັບກຽດເປັນເຈົ້າພາບ ເຊິ່ງຈະຈັດຂຶ້ນໃນລະຫວ່າງວັນທີ 16-17 ພະຈິກ 2020 ທີ່ນະຄອນຫຼວງພະນົມເປນ ໂດຍໄດ້ຮັບການຢືນຢັນການສະມາຊິກທັງ 53 ປະເທດແລ້ວ.
ລັດຖະບານກຳປູເຈຍຍອມຮັບວ່າສະຖານະການການລະບາດໂຣກໂຄວິດ-19 ທີ່ຍັງວິກິດໃນຫຼາຍປະເທດ ແລະ ມີຄວາມສ່ຽງຕໍ່ການແຜ່ລະບາດຮອບສອງ ແຕ່ຢືນຢັນວ່າມີການຈັບຕາສະຖານະການຢ່າງໃກ້ຊິດ ແລະ ມີການກຽມມາດຕະການຮັກສາຄວາມປອດໄພດ້ານສາທາລະນະສຸກໃຫ້ກັບຜູ້ເຂົ້າຮ່ວມການປະຊຸມອາເຊັມທີ່ກຳລັງຈະເກີດຂຶ້ນ.
ສຳລັບກອງປະຊຸມອາເຊັມເປັນການພົບປະຫາລືກັນທຸກ 2 ປີ ລະຫວ່າງເຈົ້າໜ້າທີ່ລະດັບສູງຂອງລັດຖະບານໃນທະວີບອາຊີ ກັບ ເອີຣົບ ປັດຈຸບັນມີສະມາຊິກລວມ 53 ປະເທດ ເກີດຂຶ້ນຄັ້ງທຳອິດເມື່ອປີ 1996 ໂດຍການດຳເນີນງານຂອງອາເຊັມຕັ້ງຢູ່ບົນພື້ນຖານຂອງເສົາຫຼັກ 3 ເສົາ ໄດ້ແກ່: ເສົາການເມືອງ ແລະ ຄວາມໝັ້ນຄົງ, ເສົາເສດຖະກິດ ສັງຄົມ ວັດທະນະທຳ ແລະ ເສົາການສຶກສາ.
ຮຽບຮຽງຂ່າວ: ພຸດສະດີ