ໜັງສືພິມວຽງຈັນທາມ ລາຍງານໃຫ້ຮູ້ວ່າ ສປປ ລາວ ສະເໜີອົງການແຮງງານສາກົນ ຊ່ວຍເຫຼືອແກ້ໄຂຜົນກະທົບດ້ານແຮງງານ ໃນໂອກາດເຂົ້າຮວ່ມກອງປະຊຸມທາງໄກ ສະໄໝພິເສດ (Video conference) ຂອງລັດຖະມົນຕີແຮງງານ ອາຊຽນກ່ຽວກັບການຮັບມືຈາກຜົນກະທົບຂອງພະຍາດໂຄວິດ-19 ຕໍ່ຜູ້ອອກແຮງງານ ແລະ ການຈ້າງງານ, ເຊິ່ງໄດ້ຈັດຂຶ້ນໃນວັນທີ 14 ພຶດສະພາ 2020.
ໃນໂອກາດກອງປະຊຸມດັ່ງກ່າວ ທ່ານ ປອ ຄຳແພງ ໄຊສົມແແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ໄດ້ສະເໜີອົງການແຮງງານສາກົນ ພິຈາລະນາແນະນຳດ້ານນະໂຍບາຍ ແລະ ການຊ່ວຍເຫຼືອດ້ານເຕັກນິກ-ວິຊາການ ແລະ ແຫຼ່ງທຶນເພື່ອມາແກ້ໄຂຜົນກະທົບດ້ານແຮງງານ ຈາກພະຍາດໂຄວິດ-19 ໃຫ້ມີປະສິດທິຜົນດີຂຶ້ນ ແລະ ຍັງໄດ້ສະເໜີຕໍ່ບັນດາປະເທດສະມາຊິກອາຊຽນ ທີ່ມີຜູ້ອອກແຮງງານລາວ ໄປເຮັດວຽກຢູ່ປະເທດສະມາຊິກໃດໜຶ່ງ ທີ່ຍັງຢູ່ ຫຼື ກັບຄືນປະເທດແລ້ວ, ຂໍໃຫ້ມີການປະຕິບັດນະໂຍບາຍການອຸດໜູນຕ່າງໆ ຕາມກົດໝາຍທີ່ກ່ຽວຂ້ອງຂອງປະເທດນັ້ນ.
ປອ ຄຳແພງ ໄຊສົມແແພງ ກ່າວຕື່ມວ່າ ເຖິງແມ່ນວ່າຈຳນວນຜູ້ຕິດເຊື້ອພະຍາດໂຄວິດ-19 ຢູ່ປະເທດພວກເຮົາຈະບໍ່ມີຫຼາຍ ແຕ່ຜົນກະທົບທີ່ມີຕໍ່ເສດຖະກິດ-ສັງຄົມ ພາຍໃນປະເທດ ກໍ່ມີຫຼາຍດ້ານ ເຊັ່ນ: ເປັນຕົ້ນການປິດຫົວໜ່ວຍແຮງງານ, ຫົວໜ່ວຍທຸລະກິດ ເຊິ່ງໄດ້ສົ່ງຜົນກະທົບໂດຍກົງທາງທຸລະກິດ ໂດຍເຮັດໃຫ້ຜູ້ອອກແຮງງານຈຳນວນຫຼາຍ ຕ້ອງໄດ້ພັກວຽກ, ມີຫຼາຍຫົວໜ່ວຍທຸລະກິດທີ່ມີຄວາມຈຳເປັນໃນການຫຼຸດຜ່ອນການຜະລິດ ກໍ່ມີຄວາມສ່ຽງໃນການຍົກເລີກສັນຍາແຮງງານ ມີຫຼາຍຫົວໜ່ວຍທຸລະກິດ ບໍ່ສາມາດຈ່າຍຄ່າແຮງງານໃຫ້ຜູ້ອອກແຮງງານໄດ້ໃນເວລາທີ່ຍັງບໍ່ສາມາດດໍາເນີນກິດຈະການ ໂດຍສະເພາະແມ່ນຂະແໜງບໍລິການທ່ອງທ່ຽວ, ໂຮງແຮມ, ຮ້ານອາຫານ ແລະ ອື່ນໆ.
ສໍາລັບຂະແໜງອຸດສາຫະກໍາຈໍານວນໜຶ່ງຍັງສາມາດຮັກສາກໍາມະກອນໄວ້ໂດຍການຫຼຸດຄ່າແຮງງານ ທີ່ເຄີຍໄດ້ຮັບປົກກະຕິລົງ. ພ້ອມກັນນັ້ນ, ຜູ້ອອກແຮງງານລາວ ຈຳນວນໜຶ່ງແສນກວ່າຄົນໄດ້ເດີນທາງກັບຈາກຕ່າງປະເທດ ເຊິ່ງມີຜົນກະທົບຕໍ່ຄ່າແຮງງານ ແລະ ຊີວິດການເປັນຢູ່ຂອງເຂົາເຈົ້າ. ບັນຫານີ້, ເປັນພຽງຜົນກະທົບໃນໄລຍະເບື້ອງຕົ້ນເທົ່ານັ້ນ, ຖ້າຫາກສະພາບການແຜ່ລະບາດຂອງພະຍາດ ໂຄວິດ-19 ຍັງແກ່ຍາວໄປຕື່ມ ຈະມີສິ່ງທ້າທາຍອັນໃຫຍ່ຫຼວງໃຫ້ແກ່ລັດຖະບານ ທີ່ຈະຕ້ອງໄດ້ຫາວິທີການແກ້ໄຂ ຊຶ່ງຕາມການຄາດຄະເນໃນເບື້ອງຕົ້ນເຫັນວ່າ ຜົນກະທົບຂອງພະຍາດໂຄວິດ-19 ຫາກມີການແກ່ຍາວ ຈະເຮັດໃຫ້ອັດຕາການວ່າງງານພາຍໃນປະເທດ ເພີ່ມຂຶ້ນຈາກອັດຕາປົກກະຕິ 2% ຂຶ້ນເປັນ 25%.
ຮຽບຮຽງຂ່າວ: ພຸດສະດີ